Söz adamı Məmməd İlqarla bir gün
Bu yazını müsahibə yox, xəstəliyə qalib gələndən sonra sağlamlığını yavas-yavaş bərpa edən şairin evindən reportaj adlandıraq
Məmməd İlqar:” Şairlər arasında çox sevdiyim, belə ən çox sevdiyim Məmməd Arazdır”
Şairlərin bu “defisit” vaxtında eşitdik ki, dəyərli şairimiz, ağır taxtalı söz ustadı Məmməd İlqar beyin insultu keçirib. Mütəxəssislərin söylədiyinə görə beyin insultu iki cür olur. Biri beyinə qan sızma, o biri isə, beyinə qanın işləməməsidir. İkinci variantda, səhhətində ciddi problemlər yaratmaqla yanaşı, xəstənin beynində yaddaş pozğunluğu da əmələ gəlir. Ünlü şairimiz Məmməd İlqarı məhz ikinci variant haqlamışdı. Bu səbəbdən həkimlər müalicə dövründə şairin effektli müalicəsi baxımından, onu narahat etməmək, həyacanlandırmamaq üçün hətta ən yaxınları ilə belə görüşlərə məhdudiyyət qoymuşdular. Ancaq buna baxmayaraq, yaxın dostum, şairin bacısı oğlu Rasimdən və oğlu Babəkdən Məmməd İlqar barədə mütəmadi məlumatlar alırdım. Onu da öyrənmişdim ki, Şairin məşhur “...Gül üstündə arıya bax bircə sən, Gör gülün nazını nə gözəl çəkir...” təcnisində dediyi kimi, oğlu Babək də xəstəliyinin böhranlı anlarında atasının başına pərvanə tək fırlanaraq, onun bütün nazını, qayğısını yoruldum- demədən çəkib. İndi şükürlər olsun, çətinliklər arxada qalıb. Yaranmış cüzi yaddaş zəifliyi də aparılan intensiv müalicələr nəticəsində artıq aradan qalxmaqdadır.
Odur ki, şairlə çoxdan arzuladığım görüşə yollandım. Məmməd İlqara tez-tez baş çəkən, maraqlı söhbətləri ilə onu darıxmağa qoymayan gənc həmyerlisi və həmkarımız Həmid Ormanlı da mənimlə birlikdə şairin görüşünə gəlmişdi. Sumqayıtdakı evinin həyətində, təzəcə qızarmağa başlamış albalı, yetişmiş ağ və qara tut ağaclarının əhatəsində gözəl bir görüşümüz alındı. Artıq bir balaca yaddaş zəifliyi olmasa, sanarsan ki, Məmməd İlqar elə əvvəlki duzlu-məzəli, sözlü-söhbətli Məmməd İlqardır. Düzü, əvvəldən qərara gəlmişdim ki, şairi yormamaq üçün yazını müsahibə janrında hazırlamayacağam. İstədim hər şey təbii olsun. Ona görə də Məmməd İlqarın ömür-gün yoldaşı, xəstə vaxtlarında bir an da olsa, yanından çəkilməyən Fatma xanım birinci çayı gətirən andan diktafonu işə salıb, stolun üsyünə qoydum. Bununla da diktafonun varlığını unudub, çay və yemək süfrəsi arxasında Məmməd İlqar, oğlu Babək, həmkarımız Həmid Ormanlı ilə birlikdə müxtəlif mövzularda çox maraqlı, yadda qalan söhbətlər edərək, deyib, güldük. Bəli, həmin gün ömrə yazılan mənalı günlərdən biri oldu. İnanıram ki, yemək-içmək süfrəsi arxasında şairlə olan söhbətimiz həm Məmməd İlqarı, həm də bütün poeziya sevərlərin ürəyincə olacaq.
(əvvəli ötən sayda)
Söz ustadı Məmməd İlqarın həyətində, yemək-içmək süfrəsi arxasında poeziyadan, şairlərdən olan söhbətimiz davam edir. Çay süfrəsi arxasında olan söhbətimizi ötən sayımızda təqdim etmişdim. İndi isə şairin ömür-gün yoldaşı Fatma xanımın dadlı təamlarından yeməyə başlayırıq. Ötən sayımızda qeyd etmişdik ki, Fatma xanım həkimin məsləhəti ilə şairə araq içməyi qadağan edib. Amma Qazaxdan gətirilmiş təmiz çaxıra isə qadağa yox idi. Odur ki, ilk sağlıq ağsaqqalımız Məmməd İlqara həvalə olunur:
- Ayə, xoş gəlmisiniz, hamınızın canı sağ olsun. Bu qapıya tez-tez gəlin. Görək Fatma xanım nə verib bizə yeməyə? Amma nədənsə, Fatma xanım bizə içməyə araq vermir. Belə götürəndə təmiz çaxır da pis deyil, eləmi? İçək sizlərin sağlığına. Yeyin, için, nuş olsun!
Badələr toqquşdurulub, içilir. Lakin mənim içki ilə aram olmadığına görə bir-iki qurtum içib badəni yerə qoymağım Məmməd İlqarın gözündən yayınmadı:
- Sən niyə badəni axıra qədər içmədin? Ayə, belə çaxır vallah, həmişə ələ düşmür.
Məmməd İlqarın bu zarafatı hamımızın eynini açır. Bu vaxt həmkarımız, şairin yaxın dostu Həmid Ormanlı əvvəlki söhbətə qayıdaraq deyir:
- Elçin müəllim, şair olan Məmmədlərdən- Məmməd Arazdan, Məmməd İsmayıldan, Məmməd İlqardan xoş sözlərlə danışdın. Məmməd Aslanı isə nədənsə, bir şair kimi bəyənmədin, Mən də Məmməd əminin sözlərinə qoşularaq deyirəm ki, Məmməd Aslan gözəl şairdir. Amma heç o biri məmmədlərdən- Məmməd Namazdan, Məmməd Orucdan danışmadın...
- Nə vaxt mənə öz kitablarını versələr, onda onlar haqqında da nəsə demək olar. Ona görə də indi heç nə deyə bilmirəm.
H. Ormanlı:
- Məmməd Namaz uşaq şeirləri yazır. Sənə verməz axı kitabını...
(Hamımız gülüşürük)
M.İlqar:
- Məmməd Arazdan danışmaq lazımdır. O çox böyük şairdir. Şairlər arasında çox sevdiyim, belə ən çox sevdiyim Məmməd Arazdır. Allah ona rəhmət eləsin.
- Bəs Söhrab Tahirlə münasibətin necədir?
- Söhrab Tahir də sevdiyim şairlərdəndir. Amma ola bilər o, məni yaxşı tanımır...
- Söhrab Tahir səni çox yaxşı tanıyır. Onun yanında sənin “Qara camaat” şerini söylədim, çox xoşuna gəldi və dedi ki, Məmməd İlqar gözəl şairdir, yaxşı tanıyıram, özü də Sumqayıtda yaşayır.
- Eləmi dedi? Çox sağ olsun! Deyəsən arada xəstələnmişdi....
- İndi maşallah olsun, yaxşıdır.
- Yaxşı olsun, qadan alım, yaxşı olsun!
Oğlu Babək əlavə edir:
- Atam Söhrab Tahirə şeir də həsr edib. Amma hələ çap etdirməyib.
- Nə əcəb? Verərsiniz, biz onu “Təzadlar”da dərc edərik.
M.İlqar:
- Canın sağ olsun sənin, çox sağ ol. A Babək, mən onu niyə çap etdirməmişəm?
- Ata, tək o deyil ki, şeirlərinin çoxunu çap etdirməmisən.
- Ola bilər nəsə yerində olmayıb, üstündə yenidən işləmək lazım olub və belə yaddan çıxıb qalıb.
- İndi zəhmət çəkin, o yaddan çıxan şeirlərdən verin, çap edək.
Babək gedib M.İlqarın əlyazmalarından ibarət böyük bir qovluğu gətirir. H.Ormanlı şairin gözəl xəttinə baxıb deyir:
- A Məmməd əmi, nə gözəl xəttin var, elə bil pasportstolda-zadda işləmisən...
(Hamımız gülüşürük)
- Həmid bəy, sənin qəzetimizdə dərc olunan yazılarından gözəl qələminin olduğunu bilirdim. Amma özünü yaxından tanımırdım. Əməkdaşımız Elbar Şirinov səni yaxından tanıyırdı deyə, həmişə tərifləyirdi. İndi görürəm doğrudan da həm yaxşı insan, həm də əsl məclis adamısan.
- Çox sağ ol, Elçin müəllim. Elbarla çoxdan dostluq edirik, çox yaxşı insandır, yaxşı da jurnalistdir.
Bu arada Babək Məmməd İlqarın Söhrab Tahirə həsr etdiyi şeiri tapıb oxuyur:
Vətən deyəndə
Söhrab Tahirə ithaf olunur
Bir saz dinər bu yollarin başında
Sinən boyu istəklərin qıvrılar.
Bir saz yanar bu
yollarin başında
Hər telində
bir nisgilin qovrular.
Bir çay axar gözlərinin içindən,
Ləpələri gözlərini yalayar...
İldirimlar çaxıb-sönər içində-
Səbrin
səni söküb yeyər,talayar.
Bu çay dönər bir ovxarlı qılınca,
Yuxuların dilimlənər,çapılar.
Boylanarsan
bir umudun dalınca-
Xəyalında - Açmadıgın, döymədiyin qapılar...
Karvançəkməz dərdlər var ki,çəkərsən,
Qızınarsan bir gümann qoruna.
Küləklərə bir bayatı bükərsən-
Bəlkə çatdi babalarin
goruna...
Dagı-daşı ünləyərsən köməyə,
Gilə-gilə əriməkdən bezərsən...
Ürəyini deşən sözü
deməyə-
Bu dünyanın qulagını
gəzərsən.
- Çox gözəl, çox əla! Məmməd
müəllim, Məmməd
İsmayıla da bir neçə şeir ithaf etmisən.
- Hə, var elə
şeirlərim, Amma onları çoxdan yazmışam, yadımda qalmayıb.
- Onda icazə ver, “ Onu
tanıdınmı, Məmməd
İsmayıl?” şeirini
söyləyim.
- Əzbər bilirsənmi?
- Bilirəm.
- Onda söyləsən yaxşı olar.
- Məmnuniyyətlə:
Onu tanıdınmı,
Məmməd İsmayıl?
Baxırsan insandı insan içində,
Min bir şər böyüdür bir can içində.
Şeytan
barmağıdı- bir
an içində,
Neçə el tərpədir, oba hərləyir.
Bilir qılıq çəkmək,
çəm tutmaq nədi,
Sərsəm zurnalara dəm tutmaq nədi.
Şam tutan görmüşəm,-şam
tutmaq nədi,
Əlində aşkarca lopa hərləyir.
Kəllələr gəmirir- kəlləsi
çatmır,
Nəfsinə Haqqın da şilləsi çatmır.
Özünün başınin gülləsi
çatmır,
Özgənin başına zopa hərləyir.
Yüz möcüzə göstər,
heyrəti yoxdu...
Mərhəmət, mərifət- hey qəti
yoxdu!
Qanında tükcə də
qeyrəti yoxdu,
Burnunun altında
lopa hərləyir.
Yalandı əzəli, sonu
yalandı,
Əlli
dona girsə,
donu yalandı.
Beş kəlmə danışsın,onu yalandı,
Dilinin altında
“toba” hərləyir.
M.İlqar:
- Ayə, sənin nə yaxşı yaddaşın var. Canın
sağ olsun sənin, çox sağ ol!
H.Ormanlı:
- Elçin müəllimin həm də yaxşı şeir deməyi var.
M.İlqar:
- Ayə, ay Babək, Elçin müəllimin ünvanını, telefonunu
götür, lazım
olanda dəvət edək, məclislərimizdə
şeir desin.
Babək:
- Yaxşı ata, götürərəm. Elçin
müəllim, atamın
kefini əməlli-başlı
açmısan haa... çox sağ ol!
- Məmməd İlqara eşq olsun ki, belə gözəl şeirlər
yazıb. Məmməd
müəllim, şairlərdən,
şeirlərdən söz
düşmüşkən bir məsələ məni maraqlandırdı.
Bilirik ki, şairlərin sevgiləri bir başqa aləmdir. Ona görə də sənə bir sual verəcəyəm, amma səmimi cavab ver. Gözəl məhəbbət şeirlərin
var. Şair də ki, sevmədiyi qıza necə şeir yaza bilər? İndi Fatma xanım da evdədir, bizi eşitmir. Düzünü de görək, sevdiyin
qız olubmu ki, belə məhəbbət
şeirləri yazmısan?
- Ayə, Fatma xanımdan başqa qızmı görmüşəm?
Məmməd İlqarın bu zarafatyana cavabı bizi uzun müddət
şaqqanaq çəkib,
gülməyə vadar
etdi. Handan-hana özümüzə
gələndən sonra,
dedim:
- Məmməd müəllim,
bax bunu gərək Fatma xanım eşidəydi...
M.İlqar:
- Amma o məhəbbət şeirlərini necə yazmışam, heç özüm də bilmirəm.
- Təkcə məhəbbət
şeirlərin yox, dövrün nəbzini tutan, ictimai əhəmiyyət kəsb
edən şeirlərin
də olduqca düşündürücü və mənalıdır.
Şeirlərində çox maraqlı,
özü də indiyə qədər eşidilməmiş qafiyyələr
işlətmisən. Məsələn, götürək elə “Qara camaat” şeirini.
Mən bu yaxınlarda gənclik illərindən dostum
olan dilçi professor
Asif Rüstəmlinin də iştirak etdiyi bir tədbirdə
həmin o “Qara camaat” şeirini
söylədim. Təbii ki,
hamının xoşuna
gəldi. Mütəxəssis
kimi isə Asif Rüstəmli axırıncı bənddəki
qafiyyələri çox
yüksək qiymətləndirərək
dedi:” Bax bu, əsl tapıntıdır.
“Əfəndi, kəfəndi”. Görün nə
gözəl qafiyyədir.
Dilçilər bunun üzərində
işləməlidirlər.”
M.İlqar:
- Asif Rüstəmli ilə bir-iki dəfə məclislərdə olmuşuq. O çox gözəl alimdir. Sağ olsun mənim şerimə verdiyi qiymətə görə. Ona salamlarımı çatdırarsan.
- Mütləq çatdıraram.
Artıq məclisi yekunlaşdırmaq lazım idi. Çünki stola qoyulan çaxır da qurtarmışdı. Şairə səhhəti ilə bağli Fatma xanımın qoyduğu həddən artıq içmək olmazdı. Amma M.İlqar çox təəssüfləndi ki, Fatma xanım bizə araq vermədi. Eybi yox Məmməd müəllim, araq da qalsın sən tam sağalandan sonraya. Bax onda söz verirəm ki, içən olmasam da, mütləq yüz qram içəcəyəm...
Beləliklə gözəl şairimiz, söz ustadı Məmməd İlqar və onun şeirləri ilə birlikdə mənalı, yadda qalan bir gün yaşadıq. Sevimli şairimizə də belə mənalı, sağlam uzun ömür və yeni yaradıcılıq uğurları ilə bizləri sevindirməyi arzulayırıq.
Elçin MƏMMƏDLİ
Təzadlar.-
2014.- 19 iyun.- S.11.