Məmməd Arazlı günlərin kitabəsi:
“Ömürdən yarpaqlar”
Ustad Məmməd Arazın ömür-gün yoldaşı Gülxanım Fətəliqızının bu kitabı çox gizli mətləblərin açarıdır, bizim kim olduğumuzun güzgüsüdür...
“Təzadlar”ın ötən sayında xəbər verdiyimiz kimi, bu günlərdə ustad Məmməd Arazın həyat yoldaşı Gülxanım Fətəliqızının şairin həyatı ilə bağlı xatirələrindən bəhs edən “Ömürdən yarpaqlar” kitabını nəşr etdirib. Gülxanım Fətəli qızının Məmməd Araz ömründən bəhs edən “Ömürdən yarpaqlar” kitabının dərsini davam etdiririk:
(Əvvəli ötən saylarda)
18 iyul - Xatirəsi:
- 1956 - cı il idi. Budaqla mən Ləzə kəndinin kənarında bulaq başında çadır qurmuşduq. Bizi orada gecələməyə qoymadılar, olmaz dedilər, qonaq saxlamağa yerimiz çoxdur. Evə apardılar. Qonaq qaldığımız evdə 100 yaşlı kişi vardı. Adına Ata deyirdilər. Beli əyilmiş bir arvad da gəlib bizimlə görüşdü. Qoca dedi ki, arvadıdır və yaşda məndən böyükdür. Arvadın 100 yaşdan sonra dişləri çıxmışdı. Dişlər ağ sədəfə oxşayırdı. Ata adlanan qoca söhbətə başladı:
- Çar dövründə dəmir yolu çəkiləndə Bakıda işləyirdim. Məni vərəm tutdu, qayıdıb gəldim. Anam məni təmiz inək südünə tutdu, xəstəlik yoxa çıxdı, mən sağaldım. 100 il yaşadım. Südün qüdrəti çox böyükdür.
Mən də hər səhər süd içirəm, o söhbət yadıma düşdü, sənə danışdım.
26 iyul - Uşaqlar hələ yatırdı. Səhər dünənki verilişin təkrarı gedirdi. Veriliş ağdamlı Zeynal müəllimdən idi. Zeynal müəllim hamıdan çox Bəxtiyar müəllimlə yaxın idi. Soruşdum:
- Görəsən, Bəxtiyar müəllim də çəkilib? Zeynal müəllim gözüaçıq adam idi. Torpağın vurğunu olduğunu görmüşdüm. Turşsuda torpağı qucaqlayıb necə öpdüyünü görmüşdüm. Belə adamları qorumaq lazımdır, - dedim
Düzdür, - təsdiqlədi Məmməd, - amma bizdə belə bir adət yoxdur.
Hə, o günlərimiz yuxu kimi keçdi, Zeynal müəllim indi xatirələrdə yaşayır.
29 iyul - Dünən Aqillə İsmayıl Şıxlı haqqında nə danışırdın?
- Heç, İsmayılın mənə qarşı hörmətindən danışırdım. Danışırdılar ki, mənə dövlət mükafatı verilməyində onun rolu olub. O vaxt İsmayıl İttifaqın üçüncü katibi idi, Əməkdar incəsənət xadimi adına da məni o təqdim edib. Yazıçıların rəyasət heyətində Şamil Salmanov haqqında çox qəti çıxışı olub, onun haqqımda yazdığı qərəzli məqaləsini tənqid edib. Mənim və Səməd Vurğunun haqqında danışıb. Onun apardığı şeir dərnəyinə qəbul olunduğum gündən ta ömrünün axırına kimi, mənim haqqımda yaxşı fikirdə olub. Fikrini heç dəyişdirməyib.
İsmayıl müəllim Hüseyn Ariflə də dost idi. Hüseyn Arifin şeirlərini tez-tez “Azərbaycan təbiəti” juranalında verər, şeirlərindən misallar gətirərdik. Ona görə də Hüseynin redaksiyamıza vaxtaşırı yolu düşərdi.
Bir dəfə Hüseyn mənə zəng etdi ki, axşam bizə gəl, qaban ətindən yaxşı kabab verəcəyəm. Getdim, İsmayıl Şıxlı və İsaq İbrahimov da orada idilər. O məclisdəki söhbətlər yadımda deyil, ancaq Hüseyn Arifin oğlunu yadına salıb ağlaması yadımdan çıxmır. Kişinin elə göz yaşı tökməsini birinci dəfə görürdüm. İsaq İbrahimov ona çox misallar gətirdi, lakin əlavə etdi ki, bunlar təskinlik üçündür səni heç nə kiridə bilməz.
31 iyul - Sakit kənd gecələrində Məmməd yatmayıb söhbət edərdi:
- Yadıma neçə illər bundan əvvəlki bir əhvalat düşdü. Mən və Tofiq Bayram Xasıgilə (Xasməmməd mənim qardaşımdır) düşdük. Xası bizi Xucbaladan aşağı bir kəndə apardı. Yaxşı bir məclis qurdular. Bağçada ot dizə qədər qalxmışdı. Təmiz havada oturduq. Həm Tofiq, həm də Xası içən idilər. Ay işığında səhərə qədər yatmayıb söhbət etdiyimiz yadımdadır. Cavan idik, qayğımız bir o qədər yox idi. Onda cavan şairləri tez-tez görüşə çağırardılar. Biz də elə ona görə getmişdik. Həmin görüşdən gözəl bir gecə yadigar qaldı bizə.
Yasamaldakı evimiz də yadımdan çıxmır. Ay işığında çinarların kölgəsi yataq otağımızın divarına döşərdi. Onda bilirdim ki, sən də yatmamısan, aya baxırsan...
Hə, keçdi yuxu kimi o günlər...
4-10 avqust - Səhər Aqilin qonaqları - Bayram Bayramovun qardaşı oğlu ailəsilə birlikdə gəldilər. Həyətimizə daxil olan qonaqlar dilləndi:
- Aqilin xoşbəxtliyi bir də ondadır ki, qaynanası belə gözəl kənddəndir.
Aqil bildirdi ki, bu gün yenə qonağım olacaq. İradə etiraz etdi ki, evimiz qonaq qəbul edilməli ev deyil. Mən isə evi təriflədim:
- Bura
bizim üçün bağ yeridir. Daimi
yaşamırıq ki, hər cür şərait yaradaq.
Bir - iki həftə qalıb, çıxıb gedirik, lap
yaxşıdır.
Soyuq hava olsa da hamımız Qəçrəşə
getdik.
Qonaqlardan Adil Minbaşyev dedi:
- Bu
süfrə gözəl və tarixi bir süfrədir ki, Məmməd
müəllim başda oturub. İçək Azərbaycanın
dahi şairi Məmməd Arazın sağlığına,
valideynlərin sağlığına, onların
sağlığına ki, sağlığında qiymətlərini
bilmirik, adam elə bilir ki, belə də
olmalıdır. Onları itirdikdə hiss edirsən ki,
ölüm yavaş-yavaş sənə də
yaxınlaşır.
13 avqust - Artıq təbiətdən şəhərin
tüstülü havasına qayıtmışıq. Qardaşxan
Əzizxanlı Məmmədə bildirdi ki, təbiətlə
əlaqədar bir xeyriyyə cəmiyyəti təşkil etmək
istəyirlər. İcazə versən, sənin
də adını ora yazarlar. Onda nazirlikdən
keçər.
Məsələni sonraya qoydular.
- Məqalələrini
yazanda yenə də sənin maraqlı bir birləşmənə
rast gəldim.
- Nə
demişəm yenə?
- “Kəklik küsəyənliyi” ifadəsi təzədir.
- Hə,
“Məhəbbətdə kəklik küsəyənliyi olmaz”
misrasını, deyəsən, “Araz axır” poemasında
işlətmişəm. Yazıçılar
İttifaqında bir çoxlarına sual verdim ki, “Kəklik
küsəyənliyi” nə deməkdir? Heç kim cavab verə bilmədi, Qasım Qasımzadədən
qeyri. Əslində belədir: Kəklik
yuva qurub yumurtlayır. Əgər həmin kola
insan nəfəsi, hənirtisi dəysə kəklik ora
qayıtmaz.
Dostu
İsa ilə söhbətində Məmməd bir də bu
ifadəyə qayıtdı:
-
Gülxanımdan başqa stoluma toxunan olsa, məndə də
kəklik küsəyənliyi baş verir.
15 avqust -Bəxtiyar müəllimin
71 illiyi ilə əlaqədar “İstiqlal şairi” adlı veriliş gedirdi:
- Bəxtiyar
müəllimi tez-tez yada salırlar - dedim.
- Bəxtiyar
müəllim məndən 10 yaş böyükdür,
çox yazıb, yaxşı yazıb, gözəl də sənətkardır.
Bir ağıllı fransız deyib ki, dahilik kəmiyyətdədir.
O, özü də bilirdi ki, yalan deyir. Lakin hər-halda
düz də deyirdi. Bir-iki əsərlə
dahi olmaq olmaz. L.Tolstoy bir əsər
yazsaydı Tolstoy olmazdı.
Hər-halda şərəfli keçmişin çox
oğullarına bu günün pasportunu vermək olar. Sənət
sarayının yaşı bəşərin yaşı qədərdir.
Sənət hamının anladığı,
hamının deyə bilmədiyi qeyri-adilikdir. Hər bir sənətkarın
öz yeri, öz yaradıcılıq yolu vardır...
6 avqust - İşdən gətirdiyin “Vaxt” və “Azərbaycan
təbiəti” qəzetinə baxıram. Biri səlyanlılara,
neftçalalılara və biri də qazaxlılara xidmət
edir. Məmməd Araz, bunu bilirsənmi?
- Hiss
etmişəm, belədir, nə edim?
25 avqust - Arxivə əl gəzdirirdim. Balaca qız
Lemanın yazdığı məktubu ona oxudum. Söhbət
Şəhla adlı bir qızdan düşdü:
- O,
qızın yazdığı məktublar çox qəribə
məktublar idi. Bir məktubunda belə
yazmışdı. - Sən insansan, yoxsa Allah? Şeirlərindəki bu fikirlər hardandır səndə?
- Şeirlərimin təhlilini elə verirdi ki, heç
bir tənqidçi şeirlərimin tənqidini bu vaxta qədər
belə verə bilməyib. Axırda gördüm
ki, başı xarab olur, mənə sevgi elan edir. Daha məktublarına cavab yazmadım. Ona yazdığım cavab məktublarımda etikadan
kənara çıxmamışdım. Bir dəfə mənə
zəng edib dedi ki, rəfiqəmə sizə
yazdığım son məktubumu vermişəm. Səhər sənə çatdıracaq. Yadımda deyil, səhər nəyə görəsə
işə çıxmamışdım. Səhərisi
Şəhlanın məktub verdiyi qız mənə zəng
edib bildirdi ki, Şəhla öldü.
- Məktub
sənə çatdımı?
- Yox heç
maraqlanmadım da. Bilmədim qız həqiqətən
ölüb, yoxsa ərə verdilər. Sənə deyirəm, arxivdə mənim
adıma böyük bir papka var. Orada xeyli sevgi məktubları
da var ki, hərəsi bir sevgi dastanıdır. Gələcəkdə
onları da işlərsən, mən istəyirəm ki,
onları sən işləyib çapa verəsən.
- Bəs
niyə arxivə verdin?
- Evimiz
darısqal idi, həm də sən cavan idin, ürəyinə
xal salmaq istəmədim.
-
Vaxtım olanda gedib onlara baxacağam. Bu saat sənin
haqqında çəkilmiş kinolentləri yığmaqla məşğulam.
-
Kinostudiyada xeyli çəkilişlər olduğunu sən də
bilirsən. Faiq Dərgahov xeyli çəkiliş
aparıb. Mənim çəkildiyim
kadrları da salnamə adlandırıb. Ümumiyyətlə,
“Ədəbiyyat salnaməsi” adı ilə orada
yazıçılara aid xeyli çəkilişlər
olmalıdır. Yəqin
baxımsızlıq üzündən lentlər
çürümüş olar.
- Pulum olanda düşəcəyəm
üstünə, hər iş pula bağlıdır.
-
Bütün bunlar sən qalana kimidir. Sonra arxiv kimə
lazımdır, hamısını atacaqlar, itib-batacaq hər
şey...
- Yox, elə
demə, iki qızın, üç nəvəndən biri necə
olsa, bu işi öhdəsinə götürər.
26 avqust - Nazim Hikmət çox içən rus şairlərinə
zəng edərmiş.
- Monoqo
denqi poluçil, idi beri.
Pulu çox olduğuna görə rus şairlərinə
paylayardı.
Pyesləri xaricdə tamaşaya qoyulurdu, pul hər
tərəfdən üstünə axırdı, o da
paylayırdı.
- Bu
sözlər birdən niyə yadına düşdü?
- Elə-belə.
Telefonda İsa Həbibbəylinin səsi eşidildi.
- İsa, nə əcəb səndən?
- Niyə
elə deyirsiniz, Sabir Rüstəmxanlının yubileyinə gəlmişdim,
sizə zəng edə bilmədim. Hacı Heydəri
gözləyirəm, onunla gəlib şairlə
görüşək.
- Yox,
Hacını gözləmə, xanımını
götür, gəl bizə.
27 avqust - Fikrət Qoca haqqında nə danışa bilərsən?
- Fikrət
insan kimi yaxşı insandır.
- Şair kimi yox?
- İnsafla demək lazımdır, şair kimi də təkrarsız
şairdir. Bəzən elə şeirlər yazır ki, bənzəri
olmur. Deyirsən, hardandır bunlar? Çox səxavətli idi, qəpiyi də olsa onu
yoldaşları ilə bölüşərdi. Əkrəmlə
dost idilər. Əkrəm ona Kotanarxlı deyərdi. Fikrət həmişə
mənim haqqımda yaxşı fikirdə olub.
Sonra
söhbət 1947-ci ildə Vedidən köçürülən
azərbaycanlılardan düşdü:
- Mənimlə
söhbətlərində Samvel Qriqoryan
danışırdı ki, ermənilər mənə azərbaycanlılara
satılmısan, azərbaycanlılar da erməni
satqını deyirlər. Ermənilərə
başa salmağa çalışıram ki, Orta Asiyadan
tutmuş böyük bir zolaq türk xalqlarınındır.
Bu reallıqla hesablaşın. Avatik İsaakyan mənə söyləyərdi ki,
Samvel, elə bilirsən bizim babalarımızın
ağlı olub. Babalarımız müsəlman dinini qəbul
eləsə idi,
indi Qafqazda adam kimi yaşayardıq. Nə itirərdik...
Poeziya
görüşləri olanda həmişə Paryur Sevak mənimlə
mübahisə edərdi ki, Məmməd, Naxçıvan bizim
olub...
Cavab verərdim ki, Ay Sevak, mən babamdan, babam
babasından, o öz babasından və sairə eşidib ki,
Naxçıvanda yaşayıblar. Bu da nəsillikcə
eramızdan əvvələ gedib çıxır. Necə olur ki, Naxçıvan bizimkidir deyirsən?
- Yox,
ancaq sonuncu min ili sizin olub - cavabını
verərdi.
Soruşardım bəs, XII əsrdə Mömünə
xatun məqbərəsi, ondan əvvəl tikilmiş abidələr. Onlar necə?
Sonralar Paryur Sevak qəzaya düşüb öldü.
28 avqust -
Axşam Yusif Məmmədəliyev haqqında söz açdı:
- Moskvada
mənim “Payo Araks” kitabım çıxmışdı. Yusif müəllimin qardaşı oğlu Həbib Məmmədəliyev
mağazada kitabımı görüb alır. Kitabı oxuduqdan sonra şeirlər xoşuna gəldiyinə
görə müəllifini - yəni məni axtarır. Bir gün Mirmehdi Seyidzadə mənə telefonla
bildirir ki, Həbib müəllim səninlə
görüşmək istəyir, müəllifdən yadigar
kimi “Payo Araks”ı və Azərbaycan dilində olan
kitablarından ona göndər.
Mən ünvanı götürüb kitablarımı Həbib
müəllimə göndərdim. 70-ci illər idi.
Günlərin birində Mirmehdi zəng edib dedi ki, Həbib
müəllim Moskvadan gəlib, səninlə
görüşmək istəyir. Köhnə
“İnturist”də onunla görüşdük. Ondan sonra hər Bakıya gələndə mənimlə
görüşməmiş getməzdi. Yadındadı,
bizim evimizə də gəlmişdi, sən plov
bişirmişdin. Bakıdakı
arvadından ayrılmışdı. Bir
qızı vardı. Hər Moskvaya gedəndə
məni evinə qonaq aparardı. İki
otağı vardı. Bir otağı ancaq
Azərbaycan dilində kitablar idi. Rəsul Rza, Mehdi
Seyidzadə ilə dost idi.
Sənə çoxdan demişdim ki, “Yaxşı adamlar”
adlı silsilə xatirələr yazmaq istəyirəm. Həbib
müəllimi də fikrimdə ora daxil etmişdim. Ancaq xatirələri işləyə bilmədiyimə
görə ona şeir həsr etdim, “Həbib müəllim”
şeirimi.
Dilinin əzbəri
bir sözü vardı, “Yusif əmi”, bu kəlmələr ən gözəl
aforizm idi onun dilində. Bütün söhbətlərində
Yusif Məmmədəliyevdən danışar, ondan misal gətirərdi.
Bir də, Şərq ədəbiyyatının
çox gözəl üstünlükləri var, - deyərdi.
29 avqust -
Gəl sənə bir əhvalat danışım dedi Məmməd:
-
60-cı illərin ortaları idi. Özbəkistanda
ədəbiyyat günləri keçirilirdi. Əli Vəliyev, Süleyman Rüstəm və Qabil
nümayəndə kimi orada iştirak edirdilər. Banketdə kommunistlərin şərəfinə badə
qaldırırlar. Qabil yerindən deyir ki, mən
badəmi Əmir Teymurun şərəfinə
qaldırıram. Əli Vəliyev tez dillənir:
- Qabil,
olmaz.
- Niyə,
Əli müəllim?
- Ona
görə ki, Əmir Teymur kommunist deyil.
- Elə
ona görə də içirəm Əmir Teymurun şərəfinə
deyir, - və Əmir Teymura həsr etdiyi şeiri oxuyur.
Məclisdəki adamlar yaman pərt olur. Bakıya qayıdan
günün səhərisi Yazıçılar
İttifaqına çatdırırlar ki, Qabil Özbəkistanda
belə bir iş görüb. Tez Rəyasət
Heyətini çağırıb hərəsi bir tərəfdən
Qabili danlayırlar. Qabil iclasda söz verir ki, bir də həmin şeiri
oxumayacaq.
Sonra Qabili MK-ya çağırırlar. Şixəli Qurbanov Qabildən
soruşur:
- Qabil, nə
etmisən?
- Əmir Teymura həsr etdiyim şeirimi oxumuşam.
- Şeiri mənə də oxu görək.
- Oxumuram.
- Niyə?
-
Çünki söz vermişəm ki, bu şeiri heç bir
yerdə daha oxumayım.
-
Yaxşı, onda get işinlə məşğul ol.
Məmməd
nəyi isə xatırlayıb gülür:
-Gəl sənə
Qabilin məzəli sözlərindən danışım.
- Əhməd müəllim, heç padvala
düşüb 100 qram vurmusanmı?
Əhməd
Cəmil cavab verərdi:
- Ay,
Qabil, mən xəstə adamam, mənə olmaz axı.
Qabil pis sürdüyü
üçün heç kim onun maşınına minməzdi.
Bir dəfə Qabil görür ki, Hüseyn Arif
Yazıçılar İttifaqı tərəfə gedir:
-
Hüseyn, min maşına aparım.
- Qabil, sən get,
mən tələsirəm.
Bir dəfə
də Əli Vəliyevə maşına minməyi təklif
edir:
- Əli müəllim, gəl səni aparım.
- Qabil, əvvəl
özümü sığorta etdirim, sonra minərəm.
Axşam İsa Həbibbəyli yoldaşı Həqiqət
xanımla Məmmədin görüşünə gəldilər. İsa üzürxahlıq
etdi:
- Məmməd
müəllim, bağışla, “əli uşaqlıyam”,
dünən Qalaaltına getmişdik, ona görə söz
verdiyim gün gələ
bilmədik. 12 gün orada qaldıq. Böyük oğlumun ödündə daş var,
ona görə getmişdik. Heydər Həsənoğlunu
görmək istədim, görmədim. İşçiləri
dedilər ki, aldığı krediti xərcləyib
qurtarıb, indi pulu yoxdur ki, yarımçıq işlərini
bitirsin. Qəçrəşə
getmişdik, çox gözəl yerlərdir, yol boyu
almaları düzüblər, hərəsi bir yanan lampaya
oxşayır.
-
Gördün ki, bizim yerlər də gözəldir.
31 avqust -
Tezliklə Səməd Vurğunun 90 illiyini keçirəcəklər, mənə yenə
ondan danış.
-Səməd Vurğun məni yaxından
tanımırdı. Ancaq harada görüşü olsa idi, mən
də həmin görüşlərdə iştirak edərdim.
Bir dəfə APİ-nin zalında Səməd
Vurğunla görüş keçirirdilər. Sən, həmin
zalı görmüsənmi?
- Hə,
sənin APİ-də görüşün keçiriləndə
məni də özünlə aparmışdın. Rasim
Balayev Söhrabın şeirini oxudu, sənə dedi ki,
“şair, sənə borclu qaldım”.
- Bax, həmin
zalda görüş old
u. Mehdi
Hüseyn də Səmədlə gəlmişdi. Zal dolu idi. Yer qalmadığı
üçün qapını bağladılar. Çöldə qalanlar arxadan qapını zərblə
itələdilər, qapı adamların üstünə
düşdü. Hamı ona qulaq asmaq istəyirdi,
çünki Səməd xalqın istəklisi idi.
Görüş vaxtı zaldan Səmədə sual verdilər:
- İndi niyə pyes yazmırsınız?
- İşıq yandı, işıq söndü, mədəniyyət
evi göründü, bu, mövzu deyil axı. Mövzu yoxdur, ona görə
- cavabını verdi.
- Bəs
“Vaqif”?
- “Vaqif”də
döyüş var, mübarizə var. Elə bir mövzu olsa
yenə də yazaram...
Mehdi
Hüseyn çıxışında “bizim ağ
saçlı şairimiz” ifadəsini işlədəndə Səməd
də zarafatla demişdi:
- Ə, nə
ağ saçlı deyirsən, cəmi iki
yaş məndən kiçiksən.
Molla Pənah Vaqifin yubileyinə Moskvaya gedirdik. Mən Cabirlə
qabaqda Mirzə İbrahimovun yanında oturmuşduq. Ona Səməd Vurğuna aid suallar verirdim. Mirzə
müəllim danışırdı:
- Məmməd,
bilirsən Səməd necə cəsarətli adam
idi? Mircəfər Bağırov bizi
“öldürüb quyuya salanda” əl atıb bizi oradan xilas edərdi.
Heç nədən qorxmazdı.
Səməd Vurğun yataqda xəstə yatarkən
şeir müsabiqəsi keçirirdilər. Mən də
onda “Sən tələsmədin” şeirini yazdım və bəyənilib
çap olunan şeirlər içində mənim də
şeirim vardı.
1 sentyabr
- Gəzinti vaxtı sual verdim:
- Məmməd,
Səməd Vurğun haqqında xatirən qurtardı?
- Yox, hələ
var. Bir dəfə yazıçıların plenumuna
hazırlıqla əlaqədar “Natəvan” klubunda
yığıncaq keçirilirdi. Onda
Yazıçılar İttifaqının sədri Mirzə
İbrahimov, məsul katibi Əli Vəliyev idi.
Biz
cavanlar - Sərdar Əsəd, Famil Mehdi, İlyas Tapdıq,
Tofiq Bayram belə
yığıncaqlara gedərdik. Hamıdan əvvəl
gəlib Rəsul Rza oturdu. Sonra Anarla Nigar xanım gəldi. Səməd Vurğun onlara yaxınlaşıb Nigar
xanımla görüşdü. Sonra Anara tərəf
dönüb soruşdu:
- Anar, mən
yaxşı şairəm, yoxsa Rəsul?
- Rəsul,
- deyə, - Anar cavab verdi.
Hamı Anarın kəsə cavabına
gülüşdü.
İclas başlandı. Cəfər Xəndan
məruzəçi idi. Məruzə
qurtarandan sonra zalda narazılıq oldu. Onda
tərəflər arasında - Süleyman Rəhimov, Səməd
Vurğun, Əli Vəliyev, Mirzə İbrahimov arasında
çəkişmələr vardı. Mirzə
İbrahimov iclasa gəlməmişdi. Cəfər
Xəndanın məruzəsindən razı
qalmamışdılar. Əli Vəliyev dedi:
- Elmlər
doktoru, universitetin rektoru, tənqidçi Cəfər Xəndandan
başqa məruzəni kimə verməli idim ki?
Həmin iclasda MK-da təbliğat şöbəsinin
müdiri Cəfər Cəfərov çıxış etdi. O, Stalin mükafatına
göndərilməsi nəzərdə tutulan əsərlərin
sənədlərini hazırlayıb vaxtında MK-ya göndərilməməsində
Yazıçılar İttifaqını təqsirləndirdi. Cəfər Cəfərov çıxış edəndə
Səməd Vurğun da zalda oturmuşdu. O, Cəfərovun
çıxışına replikalarla cavab verirdi. Sonra dözə
bilməyib ayağa durdu, papiros çəkə-çəkə
qapıya yaxınlaşdı, papirosu zibil qabına atdı və
voobşe yazıçıya məsləhət lazım deyil, deyib
çıxıb getdi. O vaxt bu, böyük cəsarət idi.
Məmməd
Rahim mənə Səmədlə bağlı belə bir əhvalat
danışmışdı:
- “Vaqif” əsəri Stalin mükafatına təqdim
olunmaq üçün əvvəlcə Yazıçılar
İttifaqında müzakirə edildi. Bəzi
yazıçılar əsərin müasir tələblərə
cavab vermədiyini deyib mükafata layiq olmadığını
söylədilər. Sonra əsərin
müzakirəsi Mircəfər Bağırovun iştirakı
ilə keçirildi. Yenə də əsəri tənqid edib məsələni
tamamilə ayrı səmtə döndərdilər. Onda
Əli Vəliyev durub dedi:
- Səməd Vurğun xalqımızın ən
böyük şairidir, ən böyük şairi olaraq
qalacaq, əsəri də mükafata layiqdir.
Sonra fasilə elan olundu. Fasilədən
qayıdanlar gördülər ki, Səməd Vurğun Mircəfər
Bağırovla oturub çay içir. Bunu
görən yığıncaqdakılar əsəri tərifləməyə
başladılar.
Yaşlı
yazıçılar həmişə söhbət edərdilər
ki, Mircəfər Bağırov yazıçıların fəaliyyətini
tənqid edib deyirmiş:
-
Yazıçılar sosializmi yaxşı təbliğ etmir, gələcəyi,
kommunizmi əsərlərində yaxşı əks etdirmir və
sair.
Onda Səməd Vurğun söz alıb
çıxış edər, zal alqışlarla
sözünü kəsər, Səməd təzədən
danışardı. Yenə də alqışlayardılar.
Onda Bağırov da məcbur olub əl
çalarmış.
2 sentyabr
- Məmmədə Nüsrət Kəsəmənlinin ruhlarla
danışığı haqqında yazılmış məqaləni oxudum. Məqalənin adı “Məni birinci həyatımda
balta ilə öldürüblər!” idi. Məmməd dedi:
- Nə olsun, o, özünü elə inandırır, başqasına ziyanı dəymir ki, qoy elə fikirləşsin. Nüsrətin axır vaxtlar yazdığı şeirlərindən xəbərim yoxdur. Əvvəllər yaxşı yazırdı. İndiki nəslin özündən əvvəlki şairlərdən öyrənmək imkanı var. Hüseyn Arifi, Bəxtiyarı, məni oxuyub bəhrələnirlər.
- Necə ki, Nizami məktəbi, Füzuli məktəbi, hə kişi?
Güldü Məmməd:
- Hə, məktəbin Nizami, Füzuli kimi başçıları qalır, qalanları isə tökülür.
Orta məktəbdə oxuyanda S. Vurğunu o qədər tərifləyirdilər ki, şairin bu şöhrətinə vurulurduq, şeir yazmağa həvəslənirdik. Mən də o zaman “Ararat” adında bir şeir yazdım. Şeirin məzmunu belə idi ki, Ararat dağı kapitalistlərin əlində göz yaşı tökür, azad deyil, nə bilim nə, nə. Şeiri Şahbuzda çıxan “Sosializm maldarlığı”, - ada bax a, əlavə etdi - qəzetinə apardım. Qəzetin redaktoru Bayram Qurbanov idi. Kişi mənə dedi:
- Ay Məmməd, axı belə sözlər yazmazlar, onlar bizim qardaşlarımızdır. Fikrini, sözlərini mənə elə incə şəkildə çatdırdı ki, yəni başa saldı ki, türklər bizim qardaşımızdır. Sonralar Bayram Qurbanovu görəndə şeirimə görə xəcalət çəkirdim.
(Ardı var)
Təzadlar.- 2014.- 18 yanvar.- S.6-7.