Unudulmaz anım

O, möhtərəm insan həyat tərzini dəyişdi. Heydər Əliyevsizlik üşütdü, sıxdı, əzdi bizləri. Qayıdışı ilə sevindirmişdi, gedişi ilə ağlatdı. Məhəmməd Peyğəmbər (s) tövsiyə edir: “Məzarlığa get, səssizcə qal, orada susmuş söyləyənləri dinlə”. Biz onu daim dinləyəcəyik. Buna ehtiyacımız böyükdür. Onun gözləri ilə işin sonunu əvvəldən görən gözlər torlandı sanki... O, uzun bir yoldan zamanın ağır yüklü sirləri ilə yorğunluğunu dərməyə getdi. Biz öz milli xüsusiyyətlərimizlə mənalıyıq. Yoxluğu sıralarımızı sıxlaşdırır və sıxlaşdıracaq. Möhtərəm adını əzizlikdən müqəddəsliyə daşıyacağıq.

Varlıqlar aləmində insan duyğularının qavramadığı yaradılışlar mövcuddur. Onların arasında dünyasını dəyişən insan cismindən ayrılan ruhlar da olur. Bu görünməz varlıqlar fövqəladə enerjiyə, gücə sahibdir. Onlar istədikləri zaman istədikləri insanlarla əlaqə qurur, duyğular aləminə təsir göstərir. Onun uca ruhu daim onu sevənlərə həyan olacaq.

Bənzərsizliyi həm də xəyalda qalan ən gözəl xatirələrlə seziləcək. O, ruhumuzun dərinliyində həmişə ən xoş dualarla anılacaq. Bizlər onun müasirləri idik, indi varisləri olduq.

Ondan vətən, dövlətçilik, ilhamlar sabahlar qaldı. Yoxluğunu varlığı ilə öncə möhtərəm varisi olan oğlu ovudur və ovudacaq. Bu yoxluğu tam hiss etməmək mümkünsüz olsa da...

XX-XXİ əsrin fenomenal insanı - böyük Heydər Əliyev cismən torpağa tapşırılandan üzü bəri xalqımız onun məzarını həmişə çiçəklərə qərq edir və bu həmişə də belə olacaq. O, möhtərəm kişi bizlərə dərmanı dərdindən çox olan bir ölkə qoyub getdi. Ona görə də hər iki mənada onun varisi olan çağdaş prezidentimiz möhtərəm İlham Əliyevə Azərbaycan naminə xalqımızın arxa durması həm də elə xalqımızın özünün özünə köməyə - söykəyə çevrilməsi deməkdir. Biz ən müxtəlif daxili, xarici təzyiqlər və sınaqlar qarşısında Azərbaycanımızı, dövlətimizi və bu dövlətin başçısını qorumağa məsuluq. Ən azı ona görə ki, Azərbaycanın taleyi hər birimizin taleyinə öz təsirini göstərib, göstərir və göstərəcək.

Ölkə başçısı möhtərəm İlham Əliyevin son çıxış və sərəncamlarındakı ümidverici mesajların zənginliyi isə nikbinliyə ümumi fonda böyük zəmanətdir.

Görkəmli dövlət xadiminə duyulan sevginin böyük miqyasında vətən, xalq, dövlət, haqq, milliklə bəşərilik olduğuna görə unudulmazdır. Elə sevgi də unudulmayana qədər gerçək olur.

“Mənim qapım ziyalıların üzünə həmişə açıqdır”

Heydər Əliyev

Ömrünün gündəlik fəaliyyətində cismindən qat-qat çox fikirlərini yaradıcı, müsbət istiqamətlərə işlədənlər ziyalıdır. Ziyalı öz zamanının, cəmiyyətinin, tarixinin taleyindən, ictimai münasibətlərin fərqli tərəflərindən agahdır. Öz hissiyyatlarını, necəliyini, durumunu, nə etməli olduğunu vicdanla hiss və dərk edir. Ona görə də əsl ziyalıya kütlələr də sayğı duyur, rəhbərlər də. Təbii ki, bu sayğılar həmişə uyğun reaksiyalar doğurur.