Övliya Mir Möhsün Ağa – 126

İlahi qanunauyğunluqlar dövriyyəyə girirsə..

İdeya sona qədər qorunmalıdır. İdeya daimi nəzərlərlə süslənməli, qidalanmalıdır ki, aydınlaşıb aktivləşsin. İdeyaya çoxlu hadisələr, variantlar yükləmək vacibdir. Onda ideya səfərbəredicilik keyfiyyətini daha da artırır. İdeya zənginliyi fərqli mahiyyətli şeylərin, əsərlərin, hadisələrin yaranmasına böyük imkanlar yaradır. Bu silsilə potensial mövcudluqların üzə çıxarılması deməkdir. İdeya gerçəkləşməyi tələb edir və şərait gözləyir. Gözəl ideyalar tapmaq üçün gözəl və qeyri-adi düşüncə (və səssizlik) tərzini vərdiş halına gətirmək gərəkdir. Real dünya yalnız işıqlanmış insan ağlının səviyyəsinə uyğundur. Təbii ki, kömək də elə işıqlanma ilə Allahdan yönəlir.

Əslində Sahibi-Əz Zaman haqq-ədalət istəyini Allah iradəsi ilə təmin edən məna anlamındadır. Bu anlam "Mehdi" adı ilə də ifadə olunur. Mənəvi aləm tam gerçək aləmdir. Nurlanmanın cazibəsinə bircə dəfə düşənin daxili aləmi haqq nurunun axımına açıq olur. Elə mənəvi aləm də mərifət nuru ilə bilinib, bəsirət gözü ilə görülür. Bu zaman maddi aləmlə mənəvi aləm arasında müəyyən vasitəçilik yaranır. Bu hal epizodik olsa da.

Az insanların dəyəri fiziki sağlıqlarında bilinir. Bu bəşəri bir xəstəlikdir. Qurani-Kərimdə də buyrulur ki, adamlar cahildirlər. Allahın ilk hökmü "Oxu!"-dur. Bu "Oxu!" hökmü tək baş-gözü ilə, dünya təhsilinə aid deyil. Axı müqəddəs kitablar yalnız yer qanunlarından bəhs eləmir. Bu kitablar daha çox kainatı oxumağı ərz edir. Kainat isə baş-gözü ilə oxunmur.

Çarəsizlik insanın Allaha olan ehtiyaclarını Ona hiss etdirir

Atalar-babalar öz aktivliklərinin qurbanı olmaq istəmirlərsə, onda övladları onların passivliyinin qurbanı olacaqlar. Bu, kainatda enerjinin itməməsi qanunudur. Bütün dünya azərbaycanlılarının taleyi bu qanunauyğunluqda kodlanıb. Amma bu kod tədricən dəyişiləcək. Bu barədə xalq da dərindən-dərinə dualarla düşünəcək və ilahi varlıqlardan, inşallah, köməkliklər alacaq.

Diktə edilən ilahi gerçəyi yazmamaq cəza törədər

Məlumdur ki, övliyaların (əsl Allah adamlarının) sayının 100, 200 və hətta 300 mindən çox olduğu hələ yüz illər öncələrdən bilinib. Onlar daim olub və olacaqlar. çoxları gizli qalır. Bəziləri övliya dərəcələrini bilsələr də bunu etiraf etməyiblər və etmirlər. Bəziləri də heç övliya mərtəbəsində olduğunu heç sağlıqlarında da bilməyiblər. Belə hallar həm şəraitlə, həm şəxsiyyətlə, həm də anlaşılmaz ən fərqli səbəblərlə bağlı ola bilir. Müqəddəs sirlərin lətafətini qəlbləri yetərincə təmiz, yalançı, ehtiras və emosiyalardan uzaq olan insanlar dərk edə bilər. Kim düşünürsə ki, övliyalıq yalnız seyidliklə bağlıdır, bu yanlış fikirdir. çünki övliyalıqda millət, irq, soy və s. şərt deyil, əsas olan Allah eşqidir. Bu barədə bir az fikir yürüdək. Əvvəla, kim övliya olmaq istəsə, ola bilməz. çünki bu dərəcənin verilməsi qulun istəyinə bağlı deyil, Yaradanın təqdiri ilədir. İkincisi, Allahı tanımaq övliyanı tanımaqdan asandır. çünki Allahı danmaq olmaz, Onun paxıllığını da çəkmək olmaz. üçüncüsü, Allah özünü ad və sifətlərində təcəlli etdirib bildirirsə, övliyalar gizliliyi saxlamağa daha çox məhkum olur.

Ən böyük savablardan biri gizli övliyanı xalqa tanıtmaqdır. İstər sağlığında, istərsə də dünyadan köçəndən sonra. Bir ilahi şərt var. Əgər isnad verilən şəxsiyyət övliya deyilsə (və ya bu yolda yoxdursa), onda həmin şəxsiyyəti övliya kimi tanıdan insan ölüm cəzasını haqq etmiş olur. Yəni bu tanıtmanın iki başı var. Başqa ifadə ilə ruhi məsuliyyətini dərk etməyənlərin üzərinə həmin məsuliyyət daha ağır yüklə yönəlir. Seyid Mir Möhsün Ağanın kitabında İçərişəhərdə hörmətli axund Hacı Mir Tahirin övliyalıq yolunda olduğundan yazmışam. Kim inanmırsa, ona bir yamanlıq eləsin, onda görər ki, Allah həmin yamanlıq edən adama hansı bəlalar yetirər. çünki övliyanı təhqir etməyi Allah qətiyyən bağışlamır. İfrata varmadan deyim ki, axund Hacı Mir Tahir kimi övliyalar yüz minlərlə insanların arasında tək-tək olur. O da var ki, günəşi görməmək görməyənlərin öz günahıdır.

Xatırladıb xatırlayanlara və xatırlananlara Allahdan salamlar olsun! Vaxt içində ən yaxşı iş o vaxt üçün gərəklini etməkdir.

Kimi qəlbi, kimi gözü ilə baxar

Azərbaycanın Milli Qəhrəmanı ağdamlı Asif Yusif oğlu Məhərrəmov (Fred Asif) haqqında "Haqqa həsr edilmiş ömür" əsərini yazdım. 400 səhifəlik kitab əruzla və nəsrlə bitdi. MDB məkanlarında və Avropada az vaxtda yayıldı. Dünyamızda cəmi 42 il qısa bir ömür yaşamış Asif Yusif oğlunun övliyalıq yolundan keçdiyini kəşf etdim. Olmuş hadisədir ki, onu Bakıda xiyabanda dəfn edərkən səmada ağ göyərçinlər də onun hüznünə gəlmişdilər. Belə faktlar yüzlərcədir. Dağ uzaqdan yaxşı göründüyü kimi, bir çox övliyalar da öz dərəcələrindən xəbərsiz dünyadan köçmüşlər. Necə qəhrəman adı bəzi insanlara dünyasını dəyişəndən sonra verilirsə, övliyalıqda axirət aləmində bəzi insanlara Allah tərəfindən verilə bilir. İnsanlar da bunun fərqində sonralar olurlar. Elələri də var ki, sağlığında övliyadır. özü də bilmir, xalq da. Amma Allah bilir.

Mir Möhsün Ağa

Övliya Mir Möhsün Ağa xalqın içindəki duyğuları, gücü hərəkətə keçirməyə daha çox qabildir. Təbii ki, Allahın izni ilə. O, çoxdan maddilikdən çıxaraq, tam mənəviləşib. övliyamız ad və soyaddan ibarət islami şəxsiyyətdən çox keçmiş, indiki və gələcəyi əhatə edən zəmanədədir. O, xeyir qavramının (anlamının) inkar edilməz simvollarındandır. Amma təbii ki, bu barədə hər şeyin açıq olması imtahan-sınaq dünyası prinsiplərinə zidd olar.

Allahın mahiyyəti bütün dərklərdən gizlidir. Və insan dərrakəsi üçün bağlıdır. Qəlb Allahın substansiyası olduğuna ("nəzərgahi-ilahi") görə təbii ki, sirlər də İlahiyə bağlıdır. Kəramətdən feyz ala bilməyənlər. İlahi bəxşişdən məhrum qalar. Bu uzaqlıq isə əfvə yetişməyi daha da uzaqlaşdırar. İnsan ən yüksək pillə üçün seçilib, amma ruhini və ilahi keyfiyyətlərlə bağlı mövcud olan fərqlər də Allahın seçiminə əsaslanır. Mir Möhsün Ağa haqqında yazdıqlarım kitabda (xüsusən əruz divanında) kosmik bağlantıdan çox bəhrələndim. Bu adi hadisə deyil. Alimlər və ekspertlər mənaların fərqinə istəsələr vara bilərlər. Amma nə yazıqlar ki, Azərbaycanda paxıllıqlar daha çox üstünlük təşkil edir. Və çox şey də ölçü vahidi təmənnalardır. Belə insanların alimliyini də qətiyyən qəbul edə bilmirəm. Əl qərəz. Maddi səbəbləri üstün tutub, mənadan və mənəvi dəyərlərdən bəhanəlik imtina doğru deyil. övliyadan kitab yazan insan qəlbinə minnətlər, ruhuna töhmətlər yığmağı heç xoşlamaz. Bilər ki, daxili çirkinliyə güzəştlər sonralar taleyə çevrilə bilir. Sözüm şükr əhlindən şirk əhlinədir. Misalı İçərişəhərdəki övliyamızın müqəddəs ocağından min uzaq. övliyanı sevən onun simsarlarını da sevməyə bilməz. Amma söz əsl simsarlardan gedir. Nəzəri qüvvətli olanlar insana məqsədini demədən onu hadisə yerinə gətirə bilir. Sözü deməklə deyil, gərək əməlini də biləsən.

Məqam

İki ay yarım ailəmizi mülki iddia ilə elə hey məhkəməyə çəkdilər. Bu çirkin bir haqsızlıq idi iddiaçılar tərəfindən. "Təzadlar"da bundan əvvəlki yazımda övliya Mir Möhsün Ağanın cəddindən Allahın izni ilə kömək istədim. Bu niyazdan sonra üzümüzə haqsızcasına dirənən qarşı tərəf and olsun Allaha ki, üç dəfə dalbadal məhkəməyə gəlib qarşımızda dura bilmədi. Hakim işi baxılmamış saxladı. Bu faktdır. özü də hələ biz sübutlarımızın yarısını hər ehtimala qarşı qəsdən ehtiyatda saxlamışdıq. Nə isə... Elə məqamlar var ki, bu yazıda onları yazmaq olmaz. Amma...

Vaxtdır deyək ki...

17 noyabr 1950-ci ildə böyük seyid övliya Mir Möhsün Ağa fani dünyamıza baş-gözlərini əbədi yummuşdu. Amma onun ruhiləşmiş mübarək gözləri kainata daim açıqdır. İçərişəhərdə ocağında hörmətli Hacı Həsən Ağa seyidin anımının 126-cı ildönümünü keçirir. Mərasim saat 03:00-də başlanacaq.

Ehtiramla,

Nizami MƏMMƏDOV

525-ci qəzet.- 2009.- 17 noyabr.- S.13.