Azərbaycanlı bəstəkar beynəlxaq festivalda iştirak edib

Almaniyanın Ausburq şəhərində Leopold Motsart adına VIII Beynəlxalq Musiqi Müsabiqəsinin açılışı olub. Azərbaycan Bəstəkarlar İttifaqının mətbuat xidmətindən verilən məlumata görə, aprelin 28-də başa çatacaq müsabiqədə iştirakçılar fortepiano, violina, violonçel və bəstəkarlıq kateqoriyalarında yarışırlar. Qeyd edək ki, 2009-cu ildə keçirilən müsabiqənin 132 iştirakçısı ikinci turda dünya şöhrətli bəstəkar Firəngiz Əlizadənin məxsusi olaraq bu musiqi yarışması üçün bəstələdiyi «Dastan» əsərini ifa etməklə imtahana çəkilmişdilər. Bu dəfə isə Firəngiz xanım Zubin Meta, Kşiştof Penderetski, Qidon Kremer, Kristian Tilemann, Benjamin Şmid və Maksim Venqerov kimi dünya musiqisinin ən görkəmli nümayəndələri ilə birlikdə müsabiqənin bədii məşvərətçi şurasında təmsil olunub. Sözü gedən müsabiqə bu dəfə yeni konsepsiya əsasında keçirilir. Belə ki, əvvəlki illərdə müsabiqələrdə iştirakçıların ifaçılıq məharəti əsas götürülürdüsə, bu dəfə gənc musiqiçilərin ifaçılıq mədəniyyətinə xüsusi diqqət yetirilir. Müsabiqənin açılışı da dünya şöhrətli bəstəkarımız üçün əlamətdar hadisə ilə yadda qalıb. Belə ki, açılış mərasimində sözügedən müsabiqənin bədii rəhbəri professor Yulius Bergerin UNESCO-nun birgə dəstəyi ilə hazırladığı «Pease pieses» (Sülh nəğmələri) albomu təqdim edilib. Sevindirici haldır ki, yaradıcı gənclər üçün nəzərdə tutulan alboma S.Prokofyev, B.Britten, C.Adams kimi klassiklərlə yanaşı F.Əlizadənin «Metomorfozalar» əsəri də salınıb. Bu yaxınlarda İrlandiyada «Metomorfozalar» adlı yeni disk işıq üzü görüb. Albomda postsovet ölkələrində yetişib, lakin bu gün bütün dünyaya məxsus olan Dmitrii Yanovski, Sofiya Qubaydullina və Aleksandr Knayfer kimi bəstəkarlarla yanaşı, Azərbaycan Bəstəkarlar İttifaqının sədri, xalq artisti, professor Firəngiz Əlizadənin «Metomorfozalar» əsəri də daxil edilib.

Aygün Asimqızı

Üç nöqtə.-2013.-26 aprel.-S.13.