Azərbaycan “Qran-pri” ilə mükafatlandırıldı

Yasin Həsənov: “Mən uğurumu vətənimizin adına yazıram”

Vokalist Yasin Həsənov İtaliyada keçirilən “Sanrema Junior” müsabiqəsində ölkəmizi təmsil edib. Bu münasibətlə keçirilən mətbuat konfransında bildirildi ki, ölkəmiz bu müsabiqədə ilk dəfədir iştirak edir. Lakin buna baxmayaraq 13 yaşlı təmsilçimiz vətənə “Qran-pri” ilə dönüb. Tədbirdə Yasinin valideynləri də çıxış edirdi. Müsabiqə barədə məlumat verən Yasinin anası Rəna Həsənova bildirdi ki, müsabiqə əslində 4 turdan ibarət idi: “Amma münsiflər Yasini birbaşa finala keçirdilər. Çünki onun ifasını çox bəyəndiklərini söylədilər. Festivalın prezidenti Paulo Albetro dedi ki, bu yaşda səsi və səhnə mədəniyyəti olan başqa uşaq tanımır. Müsabiqənin qaydarına görə, biz hələ ki, bu müsabiqədən olan videoları internetdə yerləşdirə bilmirik. Amma inşallah yaxın zamanlarda görüntüləri də tamaşaçılara təqdim edəcəyik”. Mətbuat konfransından sonra Yasin “Üç nöqtə”nin suallarını cavablandırdı.

- Yaşının az olmasına baxmayaraq 11 beynəlxaq müsabiqədə iştirak etmisən. Bəlkə ilk olaraq özünü təqdim edəsən?

- Mən Həsənov Yasin Etibar oğlu. Bu il 13 yaşım tamam olacaq. Bu günə qədər bir çox ölkədə Azərbaycanımızı təmsil etmişəm. Bunlar arasında 1,2,3-cü yerlər də olub. Amma 5-6 yarışdan “Qram-pri” ilə ölkəmizə qayıtmışam. Bu yaxınlarda İtaliyada iştirak etdiyim müsabiqəni qeyd etmək istəyirəm. Bu müsabiqədə uğurla iştirak etdiyimi deyə bilərəm. Estrada-vokal ifaçılığı üzrə həmin yarışda təmsil olunurdum.

- İştirak etdiyiniz müsabiqənin videosunu izlədik. Çox sərbəst görünürdün...

- Bu kameralarda elə görünür. Amma içimdə doğrudan da çox həyəcanlı idim. Çünki mən tək öz adımdan deyil, Azərbaycan adından orda çıxış edirdim. Və ölkəmiz həmin müsabiqədə ilk dəfə idi ki, təmsil olunurdu. Bunun üçün mənim üzərimə böyük məsuliyyət düşürdü.

- “Müslüm Maqomayevin davamçısı olacağam” - deyə fikir söyləmişdin. Hələ də bu fikrində qalırsan?

- Bəli. Bu yolda da irəliləyirəm. Müslüm Maqomayevin davamçısı olmaq mənim üçün böyük şərəf olardı. Müslüm Maqomayevin davamçısı olmağı özümə arzu edirəm.

- Sənə ifaçı olaraq nə lazımdır ki, dünyaşöhrətli sənətçimizin davamçısı olasan?

- İlk öncə səsimi qorumalıyam. Səsdəyişmə dövründə səsimin qeydinə qalmalıyam ki, gələcəkdə səsim daha uca səhnələrdən gələ bilsin. Çalışdığım qədər fikirləşə-fikirləşə oxumalıyam.

- Müsabiqədə bir çox peşəkar vokal ifaçılarının oxumağa risk etdikləri ispan musiqisi ifa etmisən. Mahnını kim seçmişdi?

- Bəli bu “Qranada” adlı ispan musiqisi idi. Bu seçimi mənə əvvəlki müəllimim Rauf Babayev etmişdi. Bu mahnı ilə çox uğurlar qazanmışam. Mən Azərbaycanın ən gənc Koroğlusu Ramil Qasımova təşəkkürümü bildirirəm. 9-10 yaşlarımdan o müəllimin yanında olmuşam. Rauf Babayevə və hazırki müəllimim Solmaz xanıma da təşəkkürümü bildirirəm.

- Rəqiblərin barədə nə deyə bilərsən? Güclü iştirakçılar var idi?

- Düzdü, yaxşı iştirakçılar var idi. Amma digər ölkərlərdə iştirak etdiyim müsabiqələrdəki kimi güclü iştirakçılar yox idi. Təbii ki bütün iştirakçılar mənə rəqib idi. Amma Maltanı özümə hardasa daha çox rəqib görürdüm. Malta müsabiqədə birinci yeri qazandı. Amma Azərbaycan daha öndə oldu. Mən uğurumu özümün deyil, vətənimizin adına yazıram.

- Oxucularımıza nə demək istəyərdin?

- İnşallah yeni işlərimlə onları sevindirərəm və məncə uğurlarımın ardı olacaq.

Aygün Asimqızı

Üç nöqtə.-2013.-1 may.-S.13.