“Səyavuş Aslandan ancaq yaxşılıq görmüşəm”

Nuriyyə Əhmədova: “O, həmişə mənə deyirdi ki, səninlə bir faciə oynayarıq”

Bu il Azərbaycan mədəniyyətinə bir neçə ağır itki üz verdi. Onlardan biri də Azərbaycan mədəniyyət sahəsində adı qızıl hərflərlə yazılan sənətkar Səyavuş Aslandı. Tamaşaçı sevgisinə nail olub, sənətkar adını qazananların itkisi tək ailəsini, yaxınlarını deyil, bütün sevənlərini kədərləndirir. Səyavuş Aslanın da itkisi hər kəs üçün ağrılı oldu. Yaşasaydı xalq artistimiz bu gün 78 yaşını qeyd edəcəkdi. Sənətkarı doğum günündə xalq artisti Nuriyyə Əhmədova “Üç nöqtə”ylə birlikdə xatırladı. Bildirdi ki, Səyavuş Aslanın onun həyatında rolu başqa olub: “Səyavuş Aslanla Musiqili Komediya Teatrına gələn gündən tanışıq. Daha sonra biz ailəvi dost olduq. Səyavuş Aslanın mənim həyatımda ayrıca rolu olub. Mən həmişə onlara gedirdim. Ofeliya xanımla maraqlı söhbətlərimiz olurdu. Yaradıcılıq cəhətdən mən Səyavuş Aslangilin evində böyümüşəm. Balaca bir əsər olanda gedib onlarda məşq edirdik. Çox səmimi ailə idi. Səyavuş ailəsinə, övladlarına qarşı çox diqqətli, mehriban, vəfalı, sədaqətli idi. Mən bunu öz gözlərimlə görmüşəm. Ona görə bu kəlmələri ürəkdən deyə bilirəm. Mən onunla birlikdə səfərlərə getmişəm. Ofeliya xanımla Səyavuşun itkisi mənə çox ağır gəlir. Mən gənc qız idim. Onların da mənə bacı münasibəti göstərməsi xoş idi. Həmişə deyirəm ki, Səyavuş Aslanın ailəsi nümunəvi ailələrdən idi. Hələ onlardan mən pis bir söz eşitməmişdim. Bir-birilə danışanda can, haycanla danışırdılar. Mən Musiqili Komediya Teatrından çıxdıqdan sonra o qədər də bir yerdə ola bilmirdik”. Nuriyyə Əhmədova deyir ki, Səyavuş Aslanın son arzularından biri birlikdə tragediya oynamaq olub: “Səyavuş Aslanın sənəti haqda heç nə deyə bilmərəm. Çünki onun sənəti göz qabağındadır. Bircə onu deyə bilərəm ki, sənət aləminə Səyavuş Aslan kimi ikinci bir adam gəlməyəcək. Çünki o həm komik aktyor idi, həm də tragediya oyanyırdı. Səyavuş həmişə mənə deyirdi ki, Nuriyyə səninlə bir faciə oynayarıq. Dedi elə bilirəm sən də belə bir rol oynamaq istəyirsən. Allah qoysa çəkilərik. Amma qismət olmadı”.

Nuriyyə xanım deyir ki, xəstəxanada olanda Səyavuş Aslana baş çəkə bilməyib: “Hamı bildi ki, həmin ərəfələrdə mənim də səhhətimdə problemlər var idi. Xəstəxanada olan vaxtı onu ziyarətə getmək mənə çox ağır gəlirdi. Həm də biz sənət aləminin bir çox sevilənlərini itirə-itirə gəlirik. Bütün bunlar bir sənət adamı kimi çəni çox üzür. Mən onlardan ancaq yaxşılıq görmüşdüm. Sənəti də ki göz qabağındadır”.

Aygün Asimqızı

Üç nöqtə.-2013.- 5 sentyabr.- S. 13.