“Ceyhun Mirzəyev insanları heyrətə gətirəcək gözəl rollar oynayıb”

Əbdül Mahmudbəyov: “Çox emosional, hər şeyi ürəyinə salan insan idi”

Rasim Balayev: “Bəlkə də məndə aktyorluğun ilk qığılcımları onun rolunu görəndən sonra yarandı”

Bu gün aprelin 9-da “Ögey ana” filminin baş qəhrəmanı-balaca İsmayıl rolunun ifaçısı Ceyhun Mirzəyevin doğum günüdür. 11 yaşında “Görüş” filmində Şıxəlinin oğlunun obrazını yaradan, 12 yaşında “Ögey ana”ya dəvət alan Ceyhun Mirzəyev kinostudiyada müxtəlif peşələrdə çalışıb. Assistent, rejissor köməkçisi, aktyor olub. Rejissor kimi bir çox filmlər çəkib. “Mozalan” satirik jurnalının bədii rəhbəri olub. Xalq artisti Rasim Balayev “Üç nöqtə”yə Ceyhun Mirzəyevlə bağlı xatirələrini bölüşüb: “Mən balaca olanda “Ögey ana” filmi ekranlara çıxmışdı. Ceyhun Mirzəyev filmdə balaca İsmayıl rolunu oynayırdı. Filmə dəfələrlə baxmışdım. Onun obrazını çox sevmişdim. Hətta ona yaxşı mənada paxıllığım tutmuşdu. Onun yerində olsaydım onun kimi oynaya bilərdimmi deyə düşünürdüm. Bəlkə də məndə aktyorluğun ilk qığılcımları bu filmi görəndən sonra yarandı. Sonralar Ceyhun bir neçə filmilərdə də çəkildi. Mən İnstituta birinci kursa daxil olanda, o ikinci kursda oxuyurdu. Səməndər Rzayevlə bir kursda oxuyurdular. Ondan sonra şəxsi münasibətlərimiz başladı. Biz dost olduq. Ceyhunun çəkdiyi və oynadığı filmlər hələ də yaddaşlardadır. Filmləri uğurlu oldu. Sonuncu filmi “Fəryad” idi və filmdə baş rolu oynayırdı. Ceyhun çox istedadlı adam idi. Onda qəribə müşahidəçilik istedadı vardı. Ceyhun sakit adam deyildi. Bir yerdə dayana bilmirdi. Oynadığı rollar kimi idi. O “Mozalan” satirik jurnalında çoxlu sujetlər çəkib. Ceyhun Azərbaycan kinosunda öz dəst-xətti, öz yeri olan sənətkardır. Təəssüf ki, həyatdan çox cavan getdi. Hələ nə yaşı var idi. 48 yaşında dünyasını dəyişdi. Hələ çox şeylər edə bilərdi. Buna baxmayaraq, az müddət ərzində çox işlər gördü və Azərbaycan kinosu tarixində onun rolları yaşayır. Bundan sonra da yaşayacaq. “Fəryad” filmində balaca İsmayılın davamı olaraq çəkilən obrazı da çox gözəl və ağır obrazdır. Şəxsi münasibətimizə dayanaraq deyim ki, onun aktyorluğa çox istedadı və meyli var idi. Amma boyu bir az balaca olduğundan rejissorluğa meyl elədi. Ceyhun baş rollarla bərabər kiçik rollarda da oynayıb. Xırda rollarda oynadığı obrazlar da yadda qalıb. Ötəri rollar olmayıb. O rolunu çox gözəl oynayırdı. İstedadı ilə obrazını tamaşaçılara sevdirə bilibdir. Allah rəhmət eləsin”.

Əməkdar incəsənət xadimi Şeyx Əbdül Mahmudbəyov Ceyhun Mirzəyev ilə tələbə yoldaşı olduğunu bildirdi: “Ceyhun bizimlə 1962-ci ildə Mirzə ağa Əliyev adına Azərbaycan Dövlət teatrına qəbul olan zaman artıq məşhur bir aktyor idi. Ceyhun artıq oturuşmuş aktyor olub. Ceyhun Mirzəyev insanları heyrətə gətirəcək gözəl rollar oynayıb. Biz hamımız fəxr edirdik ki, Ceyhun küçədə bizimlə gedir. Hamı görsün ki, Ceyhunla yoldaşıq. Bundan əlavə o çox istedadlı insan idi. Onun axırıncı filmi “Fəryad” böyük mükafatlara layiq bir əsərdir. Ceyhun çox emosional, hər şeyi ürəyinə salan insan idi. “Ögey ana”da İsmayıl rolunu çox bəyənirəm. O film sırf ailə münasibətində Azərbaycanın mənfi və müsbətlərini açıb ortaya qoyan ən gözəl əsərdir. Filmdə çoxlu gözəl aktyorlar, musiqi, rejissor yaradıcılığı var. Orada sənət var. Mənim yadımdadır ki, Moskvada “Ekran”jurnalında Ceyhunun böyük bir şəklini vermişdilər. Ceyhun bir az gec evləndi. Çox yaxşı xanımı var idi. Ceyhun arada xəstələnmişdi. Onun hesabına 15 il yaşadı. Ceyhunun bir qızı var. Nataliya xanım Ceyhunun dəfnindən sonra uşağını da götürüb getdi. Bu gün Azərbaycanda heç kəsi qalmadı. Anası rəhmətə gedib. Bizə yalnız onun gözəl əsərləri qaldı. Allah balasını xoşbəxt eləsin”.

Həsənova, Rəqsanə.

Üç nöqtə.- 2014.- 9 aprel.- S.13.