Beytlər arasında məzmun
bitkinliyi, məna ardıcıllığı yoxdur
“Qəzəldir
güli-bustani-hünər”
Dünya ədəbiyyatında qəzəlin ustadı kimi məşhur olan ölməz “qəlb şairimiz” Məhəmməd Füzuli qəzəli, hər şeydən əvvəl, “hünər bağçasının gülü” hesab edirdi. Şairə görə qəzəl meydanı – hünərlərin meydanıdır. Çünki, əvvəla, qəzəlin əsas mövzusu, başda Füzuli olmaqla bütün qəzəlxanların öz yaradıcılıqları ilə təsdiq etdikləri kimi, məhəbbətdir. Məhəbbət isə son dərəcə mürəkkəb psixoloji halət, yüksək və zəngin hisslərin, duyğuların məcmusudur.
Kamil qəzəl nümunəsi yaratmaq üçün gərək, ilk növbədə, kamil məhəbbətin geniş mənası ilə sevən əsil aşiq olasan. Əsil aşiq olmaq da hələ kifayət deyildir. Bu əsil aşiqliyi – əsil məhəbbəti bütün dolğunluğu, zənginliyi və incəliyi ilə tərənnüm etmək üçün, həm də əruz vəznində yazmağı bacarmaq, lakonizm, zərif ruh, yüksək bədii dil tələb edən bir janırda tərənnüm etmək üçün böyük istedad sahibi olmaq lazımdır. Kamil sənətkar kamil aşiqlə vəhdət təşkil edəndə kamil qəzəl nümunəsi yaratmaq mümkündür. Bu keyfiyyətlər isə hər qəzəlnəvisə müyəssər olan sifətlər deyildir. Kamil aşiq – sənətkar Füzulidən sonra qəzəl meydanına – hünər bağçasına qədəm qoyan onlarla qələm sahibinin uğurlu və ya uğursuz aqibəti, cəhdi fikrimizi təsdiq edir.
Məhəbbət klassik lirikamızada ən əsas, ən yüksək mənəvi keyfiyyət kimi tərənnüm olunur:
Xaqani, hər kəsin payı deyil eşq,
Olmaz nakəslərə ondan nişana –
deyən qədim və görkəmli şairimiz Xaqani eşqi məhz ən əsas insani duyğulardan biri hesab etmişdir. Məhəbbətə olan bu yüksək münasibət bir ənənə kimi Nizaminin, Həsənoğlunun, Nəsiminin və başqalarının yaradıcılığında öz hökmranlığını saxlamışdır. Belə zəmin üzərində təşəkkül tapıb inkişaf edən Füzuli öz qüdrətli qələmi ilə məhəbbəti bütün məzmunu, dolğunluğu, yüksəkliyi ilə birlikdə tərənnüm etmişdir. Füzuli ənənəsini davam etdirən onlarca şairimiz məhz Füzuli eşqinin məzmununu, norma və keyfiyyətlərini saxlamağa çalışmışlar.
“Eşqdir, hicridir, aləmdə vüsaldır məna” deyən Süleyman Rüstəm məhəbbəti sadəcə qız-oğlan münasibəti kimi deyil, mənalar və hikmətlər aləmi kimi qiymətləndirir və bu məhəbbəti öz oxucularına bu məzmunda da təqdim etməyə çalışır.
Füzuli lirikasındakı məhəbbət iradə və şüura tabe olmayan, əksinə, insanın iradəsinə hakim olan mənəvi bir qüvvədir:
Ey Füzuli eşq məni qılma nasehdən qəbul,
Əql tədbiridir
ol, sanma ki, bünyadı var.
Deməli, məhəbbətin insan varlığına
daxil olması və ya oradan çıxması “əql tədbiri”
ilə baş verə biləz. Bu, məhəbbətin
əsas keyfiyyətlərindən biri – onun qüdrət və
qadirliyidir. Bu keyfiyyət S.Rüstəmin qəzəllərində
özünü aydın göstərir:
Doğurur hər
baxışın sevgi, məhəbbət məndə,
Bil ki, səndəndir,
əzizim, bu mətanət məndə.
Bu beytdəki “səndəndir” sözünə diqqət
edək. Şair “səndəndir” yazmaqla məhəbbətin
məhz aşiqin özündən deyil, obyektdən – tam
gözəlliyə malik məşuqənin təsirindən
yarandığını ifadə etmişdir. Şair öz “əqlinin tədbir” ilə, ürəyinin
istəyi ilə deyil, hər hansı bir kamil gözəlliyin
təsiri ilə aşiqə çevrilir. Bu,
Füzulli eşqinin – əsil eşqin əsas keyfiyyətinin
S.Rüstəm qəzəllərində də
yaşadığına nümunədir. Lakin
təəssüf ki, bu keyfiyyət şairin bəzi qəzəllərində
təhrif olunur. Məsələn, “Neyləsin” qəzəlinin
axırıncı beyti belədir:
Özgə bir
gülüzlüyə versəm könül, ey bivəfa,
Sən
özündən küs, günahkarsan, Süleyman neyləsin?
Bu beytdən belə çıxır ki, aşiq öz
könlünü müəyyən səbəbə görə
(heç bir səbəb üzürlü sayılmır) bir
gülüzlüdən alıb başqa bir gülüzlüyə
verə bilər. Əlbəttə, əsl aşiqdə belə
hərəkət baş verə bilməz. Baş verə bilərsə, o, əsl aşiq
adlanmaz, hissi zəiflikdə təqsirləndirilə bilər.
“Mən
Süleyman Rüstəməm, öz sevgilimdən dönmərəm”
misrasında fikir təqdirəlayiqdir, lakin bu fikir öz dəqiq
ifadəsini tapa bilmədiyindən aşiqin məhəbbəti
yenə də iradənin qüvvəsi ilə baş verən
mənəvi keyfiyyət kimi nəzərə
çarpır. Bizə elə gəlir ki, burada
“dönmərəm” yox, “dönə bilmərəm” işlənməlidir.
Çünki “dönə bilmərəm” demək
– məhəbbəti candan, könüldən çıxara
bilməmək deməkdir. Bəlkə də,
bu dediyimiz xırdaçılıq təsiri
bağışlayar. Lakin Füzulinin
“hünər bağçası” adlandırdığı qəzəl
janrında kamil əsər yaratmaq üçün nəinki
fikir və ideyaya, söz birləşməsinə və
sözlərə, hətta şəkilçilərə və
hissəciklərə də son dərəcə diqqətli və
dəqiq münasibət bəsləmək lazımdır.
Ümumiyyətlə, S.Rüstəm məhəbbət qəzəllərində
Füzuli eşqinin – əsl eşqin məzmununu saxlamağa
çalışmışdır. Məhəbbət onun
qəzəllərinin əsas mövzusudur, lakin yeganə
mövzu deyildir. Ədəbiyyatımızda
siyasi lirik kimi məşhur olan şair ictimai-siyasi məzmuna
malik qəzəllər də yazmışdır. Vahid kimi o da Füzuli lirikasındakı həyati
ünsürləri inkişaf etdirmiş, bunu bir üslub şəklinə
sala bilmişdir. Şairin qəzəllərində
ictimai həyatın nəfəsi, çox qüvvətlidir.
Onun Azərbaycana, Qubaya, Təbrizə, Xəzərə,
dostluğa – konkret mövzulara qəzəllər həsr etməsi məhz onun
bu ictimai həyata baxışları ilə
bağlıdır.
S.Rüstəmin
Cənub mövzulu qəzəllərindən “Təbrizli
gözəllər” şeirində oxuyuruq:
İlham ala bilməz o
qaranlıq gecələrdən,
Vicdanı təmiz,
taleyi gündüzlü gözəllər.
Bu beytdə tərənnüm olunan təbrizli gözəllər
Quba gözəlləri kimi xoşbəxt və fərəhli
deyillər. Çünki “vicdanı təmiz, gələcəyi
gündüzlü” olan bu gözəllər “qaranlıq gecələrdən”,
həbsxananı andıran bir mühitdən, ölkədən
ilham alıb sevinə bilməzlər. Sevinc və bəxtiyarlıq
qaranlıq gecələrdən deyil, günəşli
gündüzlərdən doğar!
S.Rüstəm qəzəllərinin klassik və
müasir qəzəllərdən fərqli, özünəməxsus
ruhu vardır.
Əgər Füzuli qəzəllərinə
ictimai kədər, ağır, möhtəşəm ruh,
Vahid qəzəllərinə incəlik, kövrəklik və
şuxluq hakimsə, S.Rüstəm qəzəlləri, əsasən,
mübariz ruha malikdir. S.Rüstəmin
siyasi lirikasına xas olan döyüşkənlik və kəskinlik
qəzəllərində də özünü göstərir.
Cənub mövzulu qəzəlləri ilə o,
çox qədim tarixə malik olan qəzəl janrına, bir
sıra XX əsr şairlərimiz kimi, yeni “ab-hava”, siyasi məzmun
gətirmişdir. O, azadlıq arzularını, inqilabi
ideyalarını, coşğun duyğularını təsəvvürümüzdə
məhəbbət şeiri kimi daşlaşmış qəzəl
janrında məharətlə ifadə etmişdir:
Xəzan vursa
bağçanı, çiçəyimi verərəm,
Süfrəndə şey
tapmasan, çörəyimi verərəm!
Amansız olsun deyə zərbən
cəllad başında,
Biləyinə köməkçi
biləyimi verərəm!
Azadlıq vuruşunda ürəyin parçalansa,
Qoparıb bu sinəmdən
ürəyimi verərəm!
Təşbeh Füzuli lirikasında zəruri bir bədii
vasitə kimi işləndiyi kimi, onun davamçıları tərəfindən
də geniş şəkildə istifadə olunmuşdur. Lirik şeir
üçün zəruri olan bu vasitəyə – təşbehə
S.Rüstəmin qəzəllərində də əsas bədii
vasitə kimi rast gəlirik:
Gülər üzünlə
əgər gülməsən mənim üzümə,
Kədər
buludları oynar üzümdə axşamlar.
Bu beytdə gözəl təşbeh nümunəsi
yaradılmışdır. Təşbehdə bənzədilənin
adı (Günəş) çəkilmir. Lakin
beytin ümumi mənasından aydın olur ki, gözəlin
gülüşü Günəşin şəfəqinə
bənzədilmişdir. Günəşin olması ilə
axşamlar göy üzündə qara buludların oynaması
hadisəsi gözəlin gülüşünün
olmaması ilə aşiqin üzündə “qəm buludunun”
oynaması hadisəsi qüvvətli bədii məntiq əsasında
bir-birinə “qaynaq” edilmişdir.
S.Rüstəmin
bəzi qəzəllərində lirik aşiqin zəngin
könül dünyası məhz zəngin bədii dillə,
obrazlı, təsirli lövhələrlə, səhnələrlə
deyil, təmtəraqlı sözlərlə, quru pafosla,
hay-küylə əks olunur ki, bu zaman oxucu aşiqin əhvalından
təsirlənmir, qəzəl isə bədii zövq vermək
keyfiyyətini itirir. “Neyləsin”, “Bəsdir, gözəlim!”,
“Məni” kimi qəzəllərində bu nöqsanları
görmək mümkündür. Məsələn; “Məni”
qəzəlini oxuyuruq:
Görməyib bir kəs həyatda
məhəbbətsiz məni,
Hər
sözümdə, hər işimdə bu həqiqətsiz məni.
Sevmişəm
cananımı candan əziz, aləm bilir,
Kimdə var
cürət, hesab etsin sədaqətsiz məni.
İstərəm, eşqində cananım vəfasız olmasın,
Bir düşünsün, etməsin hər yerdə hörmətsiz məni.
Bu beytlər qeyri-təvazökar aşiqin (əslində, qeyri-təvazökar aşiq yoxdur) təmtəraqlı, gurultulu, sözlərindən ibarətdir. Bu sözlər emosiyadan, hiss və duyğudan məhrum olduğu üçün məhz söz olaraq qalır. Qəzəl bədii cəhətdən də kasıbdır. Bundan başqa, Vahidin bəzi qəzəllərində (habelə M.Seyidzadənin də qəzəllərində) müşahidə etdiyimiz nöqsanı – beytlər arasında məzmun bitkinliyi, mətləb, məna ardıcıllığı olmamasını S.Rüstəmin də bəzi qəzəllərində görürük. Hətta şairin bəzi qəzəllərində fikir dolaşıqlığı da vardır. Məsələn:
Dərin bir-bir, qalım razı, həyatda gül də tək qalmaz
Hamı güldəstə bağlarsa, bağımda gül-çiçək qalmaz.
Bir gözəl ki, bilməyə
can harda, canan hardadır,
Haqqı yoxdur
söyləsin ən yaxşı insan hardadır.
Birinci beytdə əvvəlcə deyilir ki,
bağımdakı gülləri dərin, razı qalım,
sonra isə narazılıqla deyir ki, hamı güldəstə
bağlasa, bağımda gül çiçək qalmaz. “Həyatda
gül də tək qalmaz” ifadəsi beytin ümumi mənası
ilə heç cür uyğunlaşa bilmir. İkinci
beytdə isə deyilir ki, bir gözəl can və canan yerini
bilməsə, onun ən yaxşı insanın yerini deməyə
haqqı yoxdur. Qəribə məntiqdir! Əvvəla,
bilinmir ki, bu gözəl kimdir və o, nə üçün
“canın” və “cananın” yerini bilməlidir. “Haqqı yoxdur” ifadəsi yerində işlədilməyib.
Axı, “canın” və “cananın” yerini bilmədən
– ən yaxşı insanın yerini bilmədən, haqlı ya
haqsız, onun yerini necə söyləmək olar? S.Rüstəm
qəzəllərində nəzərə çarpan bu
nöqsanlar məhz formaya məzmunun qurban getməsinin nəticəsidir.
Qəzəllərin qafiyə quruluşunda da bir
yeknəsəqlik vardır. “Süleyman” sözünü
qafiyə yerində işlətmək üçün qafiyələr
çox zaman “an” hissəcikli sözlərdən
təşkil olunur ki, bu da, dediyimiz kimi, qəzələ bəsitlik
və yeknəsəklik gətirir.
Biz, Süleyman Rüstəmin Füzuli irsindən, onun
klassik ənənələrindən necə
qidalanmasını, Azərbaycan şeirinin inkişafında
şairin qazandığı böyük nailiyyətləri
göstərərkən, əsasən, qəzəl janrına
müraciət etdik. Şübhə yoxdur ki, əgər
S.Rüstəm yaradıcılığında ənənə
və novatorluq problemi yalnız bu mövqedən tədqiq
olunarsa, biz həqiqətdən uzaq düşərik. S.Rüstəmin bütün janrlarda
yazdığı əsərlərində onun belə bir doğru
yolla getməsi, şairin Azərbaycan və dünya ədəbiyyatı
ənənələri ilə üzvi əlaqəsi aydın
hiss olunur. Bu problemin öyrənilməsi
geniş bir tədqiqtın mövzusu olduğundan, biz
yalnız S.Rüstəmin Füzuli qəzəllərindən
necə öyrənməsi və müasir şəraitin tələbləri
ilə ayaqlaşa bilən qəzəllər yazması
probleminə qısa olaraq nəzər saldıq.
Sərvər Şirinov
Üç
nöqtə.- 2016.- 2 sentyabr.- S.5