Hərbi komissarlıqlar tibbi komissiya kimi fəaliyyət göstərəcək

ELDAR SABİROĞLU: "HƏQİQİ HƏRBİ ÇAĞIRIŞLA BAĞLI TƏKMİLLƏŞDİRMƏ İŞİ ARTIQ ÖZ SƏMƏRƏSİNİ VERİR"

HƏQİQİ hərbi xidmətə çağırışın həyata keçirilməsində bir sıra yeniliklər tətbiq olunub. Çağırışçıların hərbi hissələrə bölüşdürülməsi hərbi komissarlıqlardan alınaraq Silahlı Qüvvələrin Baş Qərargahının Təşkilat Səfərbərlik İdarəsinə (TSİ) verilib. Həqiqi hərbi xidmətə çağırışı həyata keçirəcək Respublika Çağırış Komissiyasının tərkibi dəyişdirilib. Komissiyaya respublika hərbi komissarının müavini Ramiz Məmmədov sədrlik edəcək. Komissiya sədrinin müavini postunu Dövlət Sərhəd Xidməti İnspektorluğunun rəisi Ehram Hacıyev tutacaq.

Komissiyanın tərkibinə daxili işlər nazirinin müavini Oruc Zalov, səhiyyə nazirinin müavini Abbas Vəlibəyov, ədliyyə nazirinin müavini Toğrul Musayev, Azərbaycan Həmkarlar İttifaqları Konfederasiyasının sədrinin müavini Aqil Dadaşov və Milli Məclisin deputatı Səyavuş Novruzov daxildir. Yeni dəyişiklikdən sonra həqiqi hərbi xidmətə çağırışın həyata keçirilməsi ilə bağlı vəziyyətə Müdafiə Nazirliyi mətbuat xidmətinin rəhbəri polkovnik-leytenant Eldar Sabiroğlu ilə söhbətimizdə aydınlıq gətirməyə çalışdıq.

- Eldar müəllim, həqiqi hərbi xidmətə çağırış qaydalarında dəyişikliklər edilməsi hansı zərurətdən meydana çıxıb?

- Həqiqi hərbi xidmətə çağırışda dəyişiklik edilməsində əsas məqsədin Prezidentin hərbi çağırışla bağlı fərmanlarının lazımi tərzdə icrasına nail olmaqdır. Müdafiə Nazirliyi çalışır ki, fərmandan irəli gələn tələblər yüksək səviyyədə həyata keçsin, komplektləşdirmədə qüsurlara yol verilməsin.

Hərbi çağırış qaydalarının təkmilləşdirilməsi, komplektləşdirilmədə qüsurlara yol verilməməsi üçün nazirliyin Təşkilat-Səfərbərlik İdarəsinin nəzdində "Qaynar xətt" yaradılıb. Vətəndaşlar 349-61-10, 439-55-14, 439-23-55, 439-90-28 telefon nömrələrinə zəng edib şikayət və təkliflərini edə bilərlər. Eyni zamanda, müdafiə nazirinin tapşırığı ilə çağırışçıların valideynlərinin və ya yaxınlarının şikayət və narazılıqlarını araşdırmaq məqsədi ilə nazirliyin Tərbiyə İşləri İdarəsinin nəzdində işçi qrup fəaliyyətə başlayıb. İşçi qrupunun yaradılmasında məqsəd hərbi çağırış qaydalarında həyata keçirilən təkmilləşdirmə işinin daha səmərəli aparılması, komplektləşdirilmədə qüsurlara yol verilməsinin qarşısını almaq, valideynlərin və ya çağırışçıların yaxınlarının şikayət və narazılıqlarını araşdırmaqdır. Vətəndaşlar 438-61-31, 438-61-74 nömrəli telefonlara zəng edərək öz təklif və şikayətlərini çatdıra bilərlər.

- Həqiqi hərbi xidmətə çağırışın yeni qaydalarla aparıldığı ötən müddət ərzində hansı çətinlik meydana çıxıb?

- Yeni başlanılan hər bir işdə müəyyən çətinliklər ola bilər. Amma görülən tədbirlər nəticəsində hazırkı çağırışda ciddi narahatlıq doğuran elə bir problem yaranmayıb. Bu günədək yaradılan "Qaynar xətt"ə müraciət edən valideynlər ancaq övladlarının hansı hərbi hissədə qulluq edəcəyini soruşur. Hətta ucqar rayonlardan belə bununla maraqlananlar olur. İşçi qrupda da vətəndaşlardan daxil olan şikayətlər araşdırılır.

- İşçi qrupa daxil olan şikayətlər əsasən nə ilə bağlıdır?

- Müraciətlər əsasən çağırışçıların hərbi hissələrə hansı nəqliyyatla aparılması ilə bağlı olub. İndiyədək narahatçılıq doğuracaq ciddi bir şikayət olmayıb. Mətbuat səhifələrində də həqiqi hərbi xidmətin həyata keçirilməsində problemlərin olması ilə bağlı hələlik yazıya rast gəlməmişik.

- Çağırışçıların hərbi hissələrə bölgüsünün hərbi komissarlıqlarda deyil, Silahlı Qüvvələrin Baş Qərargahının Təşkilat Səfərbərlik İdarəsi tərəfindən aparılması hansı müsbət nəticələr verəcək?

- Bu məsələdə qarışıqlığa yol vermək lazım deyil. Hazırda elə bir qanunvericilik aktı yoxdur ki, orada çağırışla yalnız hərbi komissarlıqların məşğul ola biləcəyi yazılsın. Hərbi komissarlıq Müdafiə Nazirliyinin strukturlarından biridir. "Müdafiə haqqında" qanunun 7-ci maddəsində göstərilir ki, Azərbaycan Respublikası Müdafiə Nazirliyi ölkə silahlı qüvvələrinə və yerli hərbi idarəetmə orqanlarına rəhbərlik edən dövlət orqanıdır. Bu dövlət orqanı həmin strukturların inkişafına, işinin tənzimlənməsinə, müdafiə vəzifələrinin yerinə yetirilməsinə və hazırlığına görə məsuliyyət daşıyır. Yerli hərbi idarəetmə orqanları dedikdə isə hərbi komissarlıqlar nəzərdə tutulur.

Bu dəyişikliyin aparılmasının müsbət nəticəsi isə odur ki, Müdafiə Nazirliyi komplektləşdirmədə nöqsanlara yol verməsin. Həqiqi hərbi çağırışla bağlı təkmilləşdirmə işi artıq öz səmərəsini verir. Yəqin ki, hər hansı bir neqativ hal olsa, ən azı mətbuatda bu barədə yazılardı.

- Çağırışçıların tibbi müayinədən keçməsi bundan sonra necə aparılacaq?

- Çağırışçıların tibbi komissiyadan keçməsi yenə də hərbi komissarlıqlar tərəfindən aparılacaq. Bundan sonra siyahılar Müdafiə Nazirliyinə göndəriləcək. Müdafiə Nazirliyi isə komplektləşdirməni və paylaşdırmanı aparacaq.

- Əvvəllər çağırışçıların hansı hərbi hissədə qulluq edəcəyini çağırış başlamazdan öncə də bilmək olurdu. Valideynlər övladlarının istədikləri hərbi hissədə qulluq etməsinə müxtəlif yollarla nail ola bilirdilər. Bundan sonra belə olmayacağına zəmanət vermək mümkündür?

- Əgər belə hallarla bağlı konkret fakt olsa, araşdırarıq. Ümumi məsələyə isə münasibət bildirmək istəməzdim. Əgər kiminsə bununla bağlı şikayəti varsa, müraciət etsin.

Xalid

Üç nöqtə.- 2009.- 7aprel.- S. 6.