"Aprelin 13-dək doğulan uşaqlar da siyahıya alınmalıdır"
ZİYAD ABBASƏLİYEV: "BAKI VƏ SUMQAYITDA BƏZİ
VƏTƏNDAŞLAR QAPILARINI SAYICILARA AÇMAQ İSTƏMİRLƏR"
ƏHALİNİN 19,8
FAİZİ SİYAHIYA ALINIB
ARTIQ dörd gündür Azərbaycanda əhalinin siyahıya alınmasına
başlanılıb. Siyahıyaalma
ilə bağlı müəyyən problemlərin
yaşandığı bildirilir.
Bəzi vətəndaşlar
sayıcılara qapıları
açmaq istəmirlər.
Bəzən isə sayıcılar sorğu vərəqələrindəki sualların hamısını
əhalidən soruşmur.
Xüsusilə, məktəb
yaşı çatmayan
uşaqların adlarının
poliknikalardan götürüləcəyini
bildirirlər.
Əhalinin siyahıya
alınmasının gedişi
ilə bağlı
"Üç nöqtə"yə
məlumat verən Dövlət Statistika Komitəsinin Aparat rəhbəri Ziyad Abbasəliyev hələlik
ciddi problemlə üzləşmədiklərini bildirdi: "İndiyədək
əhalinin 19,8 faizi siyahıya alınıb. Dövlət
Statistika Komitəsi siyahıyaalma ilə bağlı kifayət qədər maarifləndirmə
tədbirləri aparıb.
Buna görə də əhalinin böyük bir hissəsi siyahıyaalmada fəal iştirak edir. Lakin Bakı
və Sumqayıtda bəzi vətəndaşlar
qapılarını sayıcılara
açmaq istəmirlər.
Amma regionlarda hələlik belə problemlə qarşılaşmırıq".
Ziyad Abbasəliyev
xarici ölkələrdə
yaşayan soydaşlarımızın
siyahıya alınmasında
problem olmadığını bildirdi: "Bu iş Xarici İşlər Nazirliyi tərəfindən
aparılır. Xaricdə
yaşayan Azərbaycan
vətəndaşları səfirliklər
vasitəsilə siyahıya
alınır".
Bəzi sayıcılar
tərəfindən məktəb
yaşı çatmayan
uşaqların adlarının
siyahıya daxil edilməməsi məsələsinə
münasibət bildirən
Z.Abbasəliyev bunu sayıcıların nöqsanı
hesab edir: "Sorğu vərəqələrini
necə doldurmaq barədə bütün sayıcılar təlimatlandırılıb.
Onlar tərəfindən
Azərbaycanda yaşayan
bütün vətəndaşlar
hətta aprelin 13-dək dünyaya gələn bütün uşaqlar da siyahıya alınmalıdır.
Həmin sorğu vərəqələri ancaq
əhalinin cavabları
əsasında doldurulmalıdır.
Əlavə hansısa
qurumlardan məlumat alınması ilə bağlı deyilənlər
həqiqətəuyğun deyil.
Demək, belə hallara yol verən
sayıcılar qaydalara
düzgün əməl
etməyib. Belə hallar aşkarlansa, sayıcılar yenidən həmin ünvana göndəriləcək. Əhalidən də xahiş olunur ki, belə hallar
olarsa, bizə məlumat versin".
Qeyd edək ki, əhalinin siyahıya alınmasını həyata keçirmək üçün 8 milyon manat vəsait ayrılıb. Bütün şəhər, qəsəbə və 500 nəfərdən çox əhalisi olan kəndlərin statistik xəritəsi hazırlanıb və 19 min sayıcı məntəqə qurulub. Ölkə əhalisinin siyahıya alınmasını həyata keçirmək üçün 24 min nəfər cəlb olunub. Əhaliyə 35 sual ünvanlanır ki, onlardan da 29-u vətəndaşın özü, 6-sı isə onun mənzil şəraiti ilə bağlıdır.
Xalid
Üç nöqtə.- 2009.- 16 aprel.- S. 6.