Qafqaz Konserv Zavodu istehsal gücünü artıracaq

TƏLƏT QARASU: "MÜƏSSİSƏDƏ GÜNDƏ 80-100 TON TOMAT, 3 ÇEŞİD ÜZRƏ 50 TON ƏT MƏHSULLARI EMAL EDİLİR"

YAXIN VAXTLARDA ZAVODUN MƏHSULLARININ MDB ÖLKƏLƏRİNƏ İXRACI HƏYATA KEÇİRİLƏCƏK

"AZƏRSUN HOLDİNQ" Şirkətlər Qrupu "Regionların sosial-iqtisadi inkişafı haqqında Dövlət Proqramı" çərçivəsində fəaliyyətini genişləndirməkdədir. Şirkət rəhbərliyi respublikamızın müxtəlif bölgələrinin yerli iqlim şəraitini nəzərə almaqla qeyri-neft sektoru üzrə ixtisaslaşmış bir neçə aqrar-sənaye istehsal və emal sahələri yaradıb. Belə istehsal müəssisələrindən biri də Xaçmazda yerləşən Qafqaz Konserv Zavodudur. Müəssisənin iş şəraiti ilə yerində tanış olmaq üçün ölkənin bir qrup aparıcı kütləvi informasiya vasitələrinin nümayəndələri Qafqaz Konserv Zavodunda oldular.

Zavodun istehsal müdiri Tələt Qarasu jurnalistlərin diqqətinə çatdırdı ki, müəssisədə gündəlik olaraq 80-100 ton tomat, 3 çeşid üzrə 50 ton da ət məhsulları emal edilir: "Əsas yeri pomidor emalı təşkil edir. Bundan başqa sutka ərzində 30 ton turşu, 5 tona yaxın isə müxtəlif meyvələrdən mürəbbə istehsal olünür. Ötən ildən isə kompot istehsalına başlanılıb. Zavodun gündəlik gücü 20 tondan ibarətdir".

Müsahibimiz dedi ki, hazırda Qafqaz Konserv Zavodu ölkə əhalisinin konserv məhsullarına tələbatının 70 faizini qarşılayır. İstehsal müdiri zavodda hazırda daimi olaraq 100-120 işçi çalışdığını, amma mövsüm zamanı bu göstəricinin 450 nəfərə çatdığını dedi.

Jurnalistləri zavodun istehsal fəaliyyəti ilə yerində tanış edən növbə rəisi Ceyhun Hacımuradov qeyd etdi ki, müəssisədə quraşdırılan avadanlıqlar Avropa ölkələrinin qabaqcıl texnologiyasına əsaslanır: "Bu gördüyünüz İtaliyadan alınmış "Sympak" aparatı bir mərhələdə 12 olmaqla, 1 dəqiqə ərzində 180-200 banka tomat buraxır. Bütün istehsal prosesi avtomatlaşdırılıb. Ən əsası məhsul istehsalında insan sağlamlığı üçün tam təhlükəsizliyə riayət olunur, məhsullar qablaşdırılmadan öncə və sonra sterilizasiya və pasterizasiya proseslərindən keçirilir".

İSTEHSAL MƏHSULLARININ TƏRKİBİ MÜASİR ANALİZ ÜSULLARI İLƏ YOXLANILIR

Zavodun laboratoriya müdiri Azər Pirməmmədov qeyd etdi ki, müəssisədə istehsal olunan hər bir məhsulun tərkibi fiziki, kimyəvi və mikrobioloji analiz üsulları ilə yoxlanılır: "Analiz zamanı istifadə olunan laboratoriya avdanlıqları və kimyəvi reaktivlərin hamısı xarici ölkələrdən sifariş əsasında gətirilir. Yoxlama zamanı elə hallar olur ki, məhsulun tərkibi standartlara uyğun gəlmir. O zaman məhsul istehsaldan kənarlaşdırılaraq, məhv edilir".

Qafqaz Konserv Zavodunun bütün göstəricilərinin MDB Dövlətlərarası Standartlaşdırma Komitəsinə təqdim olunduğunu deyən "Azərsun Holdinq"in mətbuat xidmətinin rəhbəri Afiq Səfərov qeyd etdi ki, ilk mərhələ uğurla başa vurulub: "Zavod bu şuranın verəcəyi sertifikat əsasında məhsullarını MDB bazarına çıxara biləcək və tam sərbəst dövriyyəsini həyata keçirəcək. Bununla əlaqədar istehsal gücünün artırılması gözlənilir. İlk mərhələdə kompot istehsalı genişləndiriləcək. Kürdəmirdə süd zavodu istifadəyə verildikdən sonra bu zavodda kokteyl məhsullarının da hazırlanması planlaşdırılır".

Qafqaz Konserv Zavodu istehsal üçün lazım olan əksər məhsullarını isə Quba-Xaçmaz bölgəsinin yerli istehsalçılarından alır.

A.Səfərov qeyd etdi ki, bununla yanaşı müəssisənin xammal təminatının yaxşılaşdırılması üçün "Azərsun Holdinq" Kənd Təsərrüfatı İdarəsi tərəfindən İmişli-Biləsuvar bölgəsində 3400 ha ərazi icarəyə götürülüb: "Əkinə demək olar ki, tam yararsız torpaqlar idi. Holdinq tərəfindən həmin ərazilərdə aparılan rekultivasiya işlərindən sonra drenaj kanallar çəkildi. Torpağın sağlamlaşdırılması işləri aparıldıqdan sonra həmin torpaq sahəsində Qafqaz Konserv Zavodu və digər istehsal müəssisələri üçün bir çox məhsullar yetişdirilməyə başlanıb. Biz yaşıl noxud, soya kimi Azərbaycan iqlim şəraiti üçün çətin becərilən bitki növlərinin yetişdirilməsinə nail ola bildik. Həmin ərazidə istehsal olunan məhsullar zavodun konservləşdirilmiş xammal mənbəyi kimi böyük rol oynayır".

Qafqaz Konserv Zavodu məhsulların qablaşdırılmasında istifadə olunan bəzi materialları Rusiya və Türkiyədən alır. Ancaq şirkət bu sahədə də tələbatın yerli xammal hesabına qarşılanmasına çalışıb.

A.Səfərovun sözlərinə görə, "Azərsun Holdinq" Şirkətlər Qrupuna daxil olan tənəkə qablar istehsalını həyata keçirən Qafqaz Metal Qablaşdırma Zavodu var: "Bu zavod da ötən il potensialını bir dəfə də artırdı. Orada Avropa standartlarına uyğun, təhlükəsizlik gözlənilməklə ekoloji cəhətdən təmiz qabların istehsalına başlanıb. Zavodda quraşdırılan rəngləmə boya sistemi əvvəl metal qabın üzərinə 3, indi 5 rəng vurmağa imkan verir".

ZAVODUN XAMMALA OLAN TƏLƏBATI ƏSASƏN YERLİ İSTEHSAL HESABINA ÖDƏNİLİR

Xidmət rəhbəri qeyd etdi ki, "Azərsun Holdinq" Şirkətlər Qrupunun bütün müəssisələrinə lazım olan həm xammal, həm də qablaşdırma materiallarının Azərbaycanda istehsal olunmasına çalışılır: "Bunun səbəbi də rəhbərliyin şirkətin fəaliyyətinə kompleks yanaşmasından qaynaqlanır. "Azərsun Holdinq"in ilk quruluş illəri Azərbaycanın müharibə dövrünə təsadüf edir. Bir məhsul var idisə, digər məhsulu mütləq başqa yerdən almalıydıq. Bəzən əlimizdə hazır məhsul qalıb, qablaşdıra bilmədiyimizdən xarab olurdu. Yollar bağlandığından qablaşdırma materiallarını gətirə bilmirdik. Dövlət tərəfindən qarşımıza qoyulan tələblərdən biri də o idi ki, ölkə daxilində şirkətin nəzdində yaradılan hər bir müəssisənin məhsullarının kompleks istehsalına nail olaq. Bu istiqamətdə həyata keçirilən layihələr məqsədin reallaşmasına tam imkan yaratdı. Artıq məlum olduğu kimi xammal, onun qabı Azərbaycan daxilində yerli imkanlar hesabına və yerli potensialdan istifadə olunmaqla hazırlana bilir".

A.Səfərov dedi ki, müəssisə ixrac imkanlarını artırıb. Xüsusən böhranın daha çox zərbə vurduğu ölkələrə ixracın həcmi artırıldı. Şirkətin eksport xidməti çox peşəkar fəaliyyət göstərməklə, bazar araşdırmasını çox dəqiq, real və operativ apara bilib".

A.Səfərov böhran başlanandan indiyə qədər "Azərsun Holdinq"də heç bir kadr ixtisarının yox, əksinə işçilərin qəbul olunması prosesinin getdiyini söylədi: "Bu il ərzində yeni müəssisələrimizin açılması gözlənilir. Bunlar Kağızın Təkrar Emalı Kombinatı, Masazır Duz Zavodu, Kürdəmir Süd Zavodu olacaq. Bu müəssisələrə də peşəkar kadrların cəlb edilməsi üçün prosesə başlanılıb".

KONSERV MƏHSULLARI ABŞ-a DA İXRAC OLUNUR

A.Səfərov "Azərsun Holdinq" markası altında olan məhsulların Ermənistan istisna olmaqla bütün MDB ölkələrinə ixrac edildiyini vurğuladı: "Əsas prioritet seçdiyimiz ölkələr Rusiya, Türkmənistan, Qazaxıstan, Özbəktistan, Əfqanıstan, Gürcüstan və sair ölkələrdir. Bu yaxınlarda Qafqaz Konserv Zavodunun mürəbbə məhsullarının ABŞ-a ixracının ilk mərhələsini həyata keçirdik. Xatırladım ki, orada ötən il keçirilən sərgidə baş sponsor "Azərsun Holdinq" idi. Bu imkandan istifadə edərək, işgüzar müqavilələr imzalandı. Amerikada olan ticarət şirkətləri ilə bu məhsulların o ölkələrə ixrac olunması istiqamətində ardıcıl tədbirlər hazırlanır. Bolqarıstana geniş ixracımız olub.

Avropa bazarına da bizim məhsullar yol açıb. Avropa ölkələrində şirkətin nümayəndəliklərinin açılması üçün araşdırmalar gedir. Artıq "Azərsun" markası altında Azərbaycan çay məhsulları Almaniyada, böyük çay ənənəsi olan Özbəkistanda çox həvəslə qəbul edilir. Hətta bizim "Məryəm" çayına olan tələbatın artmasını görən başqa bir şirkət bu ad altında saxta məhsul istehsal edərək Rusiya bazarına çıxarıb".

Qeyd edək ki, "Azərsun Holdinq"in digər müəssisələrində olduğu kimi Qafqaz Konserv Zavodunda da sosial humanitar layihələr həyata keçirib, əməkdaşlar üçün sağlam iş şəraiti yaradılıb. Onlara mütəmadi müavinətlər verilir. İşçinin əməyinin fərdi dəyərləndirmə siyasəti də həyata keçirilir. Əlavə olaraq pul mükafatları, ərzaq yardımları da göstərilir.

Əfsun SUCAYEV

Bakı-Xaçmaz-Bakı

Üç nöqtə.- 2009.- 29 aprel.- S.10.