Ombudsman kim olsun?
FƏZAİL İBRAHİMLİ: "RƏBİYYƏT
XANIM ELMİRA SÜLEYMANOVANI ƏVƏZ EDƏRSƏ, HEÇ
KƏS BUNDAN UDUZMAZ"
SORĞUMUZDA İŞTİRAK EDƏNLƏRİN BÖYÜK
ƏKSƏRİYYƏTİ RƏBİYYƏT ASLANOVANI ƏN
LAYİQLİ NAMİZƏD HESAB EDİR
İNSAN haqları üzrə
müvəkkil Elmira Süleymanovanın səlahiyyət
müddətinin başa çatması yeni müvəkkilin
kim olacağı sualını doğurub. Artıq bu vəzifəyə
layiq görülə bilən müxtəlif şəxslərin
adı çəkilir. Maraqlıdır, Azərbaycanın
ictimai-siyasi həyatında müəyyən rolu olan, ictimaiyyət
arasında tanınanlar bu barədə nə
düşünür? Onlar yeni ombudsman olaraq kimi görmək
istəyirlər? "Üç nöqtə" sualla
ictimai-siyasi mühitdə rolu olan nüfuzlu media mənsublarına,
siyasətçilərə, ictimai təşkilatlar və
ziyalılarımıza müraciət etdi. Həmin şəxslərin
bəzilərinin fikirlərini diqqətinizə
çatdırırıq.
Tarixçi alim, millət vəkili
Fəzail İbrahimli: "Mən ombudsmanın kim
olacağı barədə konkret fikir bildirə bilmərəm.
Amma adı bu vəzifəyə gətirilə biləcək
insanların sırasında hallanan Rəbiyyət Aslanova
öz işini bilən, vicdanlı, savadlı, dəyərli
bir ziyalı xanım kimi ombudsman vəzifəsinə layiqdir. Rəbiyyət
xanım Elmira Süleymanovanı əvəz edərsə,
heç kəs bundan uduzmaz. Digər namizədləri
tanımıram".
Millət vəkili Asim Mollazadə
yeni ombudsman kimi görmək istədiyi şəxsin adnı
çəkmək istəmədi. Millət vəkili Jalə Əliyeva
da Rəbiyyət xanımı ən layiqli namizəd hesab edir.
Hüquq müdafəçisi Novella Cəfərova ombudsman vəzifəsini
icra edəcək kifayət qədər namizədin olduğunu
bildirdi: "Mən QHT rəhbərlərinin bu vəzifədə
olmasını istərdim. Təbii ki, orada Çingiz Qənizadəni,
Səidə Qocamanlını, Arzu Abdullayevanı, Səadət
Bəmənyarlını görmək istərdim. Hesab edirəm
ki, bunlar insanlara çox yaxındırlar və onlara kömək
etməyə qadirdilər". N.Cəfəroğlu millət
vəkilləri arasından Rəbiyyət Aslanovanı və Qənirə
Paşayevanı həmin vəzifəyə daha layiqli
saydı.
Əlil Qadınlar Biriyinin sədri
Məhluqə Rəhimova hesab edir ki, Rəbiyyət Aslanova ilə
Qənirə Paşayeva bu vəzifəni icra edə bilərlər.
"ELS" müstəqil
araşdırmalar mərkəzinin sədri İradə Yaqubova
hələlik Elmira xanımın ombudsman kimi öz səlahiyyətlərini
davam etdirməsini arzu edir: "Hələlik onun yerində
heç kəsi görmürəm. İstərdim ki, yenidən
o, seçilsin. Dəyişiklik tələb olunarsa, millət
vəkili Qənirə Paşayevanın seçilməsini istərdim.
Azərbaycan
Ziyalılar Birliyinin sədri Eldəniz Quliyev ombudsman kimi, hər
şeyi tərəzinin gözünə qoyanda ədalətli
görən, Allahını unutmayan, dövlətçiliyi
uca tutan təmiz şəxsi gördüyünü dedi:
"Ad çəkməkdə çətinlik çəkirəm".
Media eksperti Zeynal Məmmədli
görmək istədiyi yeni ombudsmanın adını çəkməkdə
çətinlik çəkdi. "Bu adam insan hüquq və
azadlıqları ilə bağlı heç kimə, heç
bir siyasi qüvvəyə güzəştə getməyən
bir şəxs olmalıdır: "Yeri gəlmişkən,
Ombudsman mütləq qadın olmalıdır".
"Şərq" qəzetinin baş
redaktoru Akif Aşırlı ombudsman vəzifəsinə daha
çox Rəbiyyət Aslanovanın yaxın olduğunu dedi:
"Rəbiyyət Aslanova insan haqları ilə bağlı
kifayət qədər bilgisi olan insandır. Qanunların
aliliyi prinsipini həmişə öndə tutan bir
xanımdır". Buna baxmayaraq, o, Qənirə
Paşayevanın da bu vəzifəni icra etmək qabiliyyətinə
malik olduğuna inanır.
Fikrini soruşduğumuz əlli nəfərə
yaxın şəxsin böyük əksəriyyəti Rəbiyyət
Aslanovanın ombudsman kimi ən layiqli addımlar
atacağına, işinin öhdəsindən vicdanla gələcəyinə
inanirlar. Təbii, əgər bu vəzifəyə layiq bilinərsə.
Tahirə Qafarlı
Üç nöqtə.-2009.-6 fevral.-S.5.