Müğənnilər kimi bəzi bəstəkarlar da pul üçün çalışır

AYBƏNİZ HAŞIMOVA: "GƏNCLƏR BÖYÜK BƏSTƏKARLARIMIZIN ƏSƏRLƏRİNİ KORLAYIRLAR"

AKİF İSLAMZADƏ: "ZÖVQSÜZ İNSANLARIN SAYININ ARTMASINI İSTƏYƏNLƏR ÇOXDUR"

Kimdən yaxınlaşıb soruşsaq ki, son illər yazılan ən möhtəşəm musiqi əsəri hansıdır, müəyyən tərəddüddən sonra nəsə söyləyə biləcək. Son dövrlərdə bəstəkarların əsasən mahnı yaradıcılığı ilə tanındığını desək, yanılmarıq. Çünki geniş dinləyici kütləsi məhz bu janrda yazılan mahnılara daha çox maraq göstərir.

Böyük musiqi əsərlərindən söz düşəndə isə, yalnız peşəkar bəstəkarları qınayırlar. Biz də bu mövzuda musiqiçiləri sorğuya çəkdik. Onlardan son illərin ən yaxşı musiqi əsərinin adını öyrənmək istədik.

Müğənni Aybəniz Haşımova son illər Azərbaycanda dəyərli və yaddaqalan əsərlərin yazılmadığını söylədi: "Bu, Azərbaycan üçün, musiqinin vətəni sayılan ölkəmiz üçün olduqca acınacaqlı haldır. Bizim istedadlı bəstəkarlarımız var, amma nədənsə, son illər onlar yaddaqalan əsərlər yazmırlar. Qara Qarayevin, Cahangir Cahangirovun, Vasif Adıgözəlovun və digərlərinin yazdığı yüksək səviyyədə olan əsərlər də getdikcə korlanır. Mənim sözlərim gənclərin xətrinə dəyməsin, həmin əsərləri gənclər korlayır. Onsuz da səviyyəli əsərlər az yazılır, heç olmasa, keçmişin incilərinə toxunmasınlar".

Vətənpərvər ruhlu mahnıları ilə Azərbaycanın və yaxın ölkələrin səhnələrini bəzəyən "Savalan" qrupunun rəhbəri Novruz Novruzov qeyd etdi ki, Alim Qasımovun Yaşıl Teatrda bəstəkar-cazmen Şahin Növrəsli ilə birgə konserti yadındadır: "Yaxşı əsərləri orada eşitdim. Ümumilikdə isə heç bir əsəri yadıma sala bilmirəm. Son illər güclü əsərlər ifa olunmayıb. Bilirsiniz ki, pul hər şeydən öndədir. Bu səbəbdən də dəyərli, yaddaqalan əsərlər yoxdur. Maddiyyat irəli keçdikcə, keyfiyyət aşağı düşür. Əsas məsələ bundadır. Belə getsə, yaxın illərdə yaxşı əsər gözləmək mənasızdır".

Akif İslamzadə gənc müğənnilərin ifasını bəyəndiyini deyərək, onların oxuduğu mahnıların yaddaqalan olduğunu söylədi: "Amma onlar əsər deyil. Həm də son zamanlar elə bir əsər eşitdiyim də yadıma gəlmir. Nəinki Qara Qarayev, Fikrət Əmirov səviyyəsində, heç adi professional səviyyədə də musiqi əsəri yoxdur". Onun fikrincə, bütün bunlara səbəb zövqlərin korlanmasıdır: "Zövqsüz insanların sayının artmasını istəyənlər çoxdur. Millətin zövqünü korlayırlar. Buna görə də kim nə istəyir, onu da ifa edir. Biri digərini söyür, biri açıq-saçıq geyinir. Efiri ədəbsiz sözlərin məkanına çeviriblər".

Bəstəkar Nadir Əzimov da yaxşı əsər xatırlamır. O hesab edir ki, əsərlərin bədii dəyərinin azalması bu sahədə də özfəaliyyətin yayılması ilə bağlıdır: "Heç bir əsəri xatırlamıram və mənə elə gəlir ki, son illərdə belə əsər yazılmayıb. Çünki indi ağsaqqal məsləhətinə qulaq asan, keçmişdən bəhrələnən musiqiçilər çox azdır. Müğənnilər kimi bəzi bəstəkarlar da pul üçün çalışır".

Üç nöqtə.-2009.-6 fevral.-S.13.