"Məni 25 il sərasər sındırmağa çalışdılar"

 

NİSƏ QASIMOVA: "İNDİ O İNSANLARIN GÜCLƏRİ TÜKƏNİB"

 

BU GÜN MÜĞƏNNİNİN AD GÜNÜDÜR

 

BU gün səhnəmizin korifey sənətkarı Nisə Qasımovanın doğum günüdür. Ömrünün çox hissəsini musiqi mədəniyyətinin inkişafına və onun təbliğinə həsr edən müğənni bizimlə söhbətində olduqca səmimi idi. Ümumiyyətlə, onu tanıyanlar bilir ki, Nisə xanım bir insan kimi çox mehribandır. Bu dəfə də ənənəsinə sadiq qalan müğənni çox mətləbləri açıqladı.

- Hər il qeyd edirdiniz ki, 25 yaşınız tamam olur. Bu simvolik rəqəm bu dəfə də öz qüvvəsini saxlayır?

- 25 yaxşı yaşdır, 55 isə ondan da yaxşıdır. 50 yaşım olanda mənə elə gəlmişdi ki, dünyam alt-üst olacaq. Çünki bir dostum demişdi ki, həmin yaşda insan artıq qocaldığını hiss edir. Buna görə kədərlənmişdim. Açığı, 50 yaşıma qədər unutmuşdum ki, neçə yaşım var. Yaşımın zaman-zaman artığını duymurdum. Düşünürdüm ki, 20-30 yaşlarımda hələ həyata keçirə bilmədiyim işlərim, oxuya bilmədiyim mahnılar var. Nəhayət, özümü toparlayıb qəbul etdim ki, bu il mənim 25 yox, artıq 55 yaşım olur. İnanın ki, 25 yaşla 55 yaş arasında heç bir fərq yoxdur.

- Nə qəribədir, 1 il müddətində 30 yaş qocalmaq.

- İnsanın yaşı bir günün içində də arta bilər. Mən ANS telekanalında "Xoş vaxt olun" verilişində aparıcılıq etməyə başlayandan öz mənəvi dəyərimi, çəkimi hiss etməyə başladım. Günbəgün məsuliyyətim artmağa başladı. Çətindir efirdə iki saat canlı proqram təqdim etmək. Bilirsiniz, biri var ki, mənim həqiqi 25 yaşım olardı, o yaşda veriliş aparardım. O yaşda veriliş apararkən şuxluq, gümrahlıq göstərmək daha asandır. Amma mən bəlli bir yaşımda bu məsuliyyətli yükün altına girdim. Buna baxmayaraq, mənimlə birgə çalışan kollektivin bütün nümayəndələri mənə çox dəstək olur. Çox sevdiyin, etimad göstərdiyin, yaşından asılı olmayaraq, bütün ixtiyarını verdiyin dostlar elə bir hərəkət edirlər ki, bir günün içində qocaldığını hiss edirsən. Çox pis haldır ki, dostlar adamın inamını itirir.

- Belə olanda kimi qınayırsınız, özünüzü, yoxsa həmin naxələfləri?

- Belə hal baş verəndə özümü qınayıram ki, bu yaşda olan adam da gözlərini yumub aldanmasına yol verərmi?

- Nisə xanım, bugünkü yerinizdən razısınız?

- Hər kəs bunun şahidi olub ki, Nisə xanım Qasımova heç vaxt birincilik iddiasında olmayıb, kiminsə yerini tutmaq istəməyib. Məclislərdə belə başda oturmağa can atmamışam. Mən öz yerimi beynimdə təkmilləşdirmişəm. Moskvadan qayıdanda jurnalistlər mənə dedilər ki, siz yenidən yerinizə qayıtdınız və qorxmadınız burada olmadığınız müddətdə yerinizi kimsə tutar? Mən bildirdim ki, Azərbaycan musiqi sənətində özümə elə bir taxt-tac qurmuşam, elə bir yer tutmuşam ki, bu yeri heç vaxt kimsə tuta bilməz. Mənim yerim öz əqidəmdə yuxarıdadır. O yeri heç kimə verməmişəm və verən də deyiləm.

- Sizdən həmişə səmimilik görürük.

- Bu, mənim devizimdir. Heç vaxt çalışmamışam ki, efirdə, yaxud qəzet üçün dəyərli jurnalistlərimizə müsahibə verərkən maskalanım. İnsanları aldatmaq olmaz. Hərdən olur ki, kədərli oluruq. Belə əhvalda elə məqam olur ki, insanlara bunu duydurmamaq üçün özünü heç nə olmamış kimi aparırsan. Deyib-gülürsən, özünü gümrah göstərirsən. Lakin bu, maskalanmaq deyil. O ki, daxilində xəbis insan olursan, amma efirdən, müsahibələrindən insanlara xoş görsənmək üçün dəridən-qabıqdan çıxırsan, bax, bu, maska yox, əsl maskarad olur.

- Maraqlıdır, vaxtilə yardım diləmək üçün əl uzatdığınız insanlar bu gün sizinlə münasibət qurmağa çalışırlarmı?

- Mən o insanların bu gün varlıqlarını nə duyuram, nə də görürəm. Doğrudan da vaxtilə mənə çox əzablar veriblər. Amma indi belə şeylər yoxdur. Çünki o insanların gücləri tükənib. Çünki sadə, səmimi, yaxşı insan olmaq çox gözəldir. İnanın ki, məni 25 il sərasər sındırmağa çalışdılar. Hətta nail də oldular. Lakin sındığımı xalqa göstərməmişəm. Hətta canım da əldən gedirdi. Bu gün isə hər şey çox gözəldir. Çünki bütün əzabları geridə qoya bildim. 

 

 

Qasımova, Nisə

 

Üç nöqtə.-2009.-13 fevral.-S.13.