Seçiciləri Ülvi Quliyevi axtarır
DEPUTATLAR YOXA ÇIXIBLAR
ŞİKAYƏTÇİ MİNAYƏ QASIMOVA: "ƏDALARINDAN
ADAMA CAVAB DA VERMİRLƏR"
MİLLİ MƏCLİS
şikayətçilərin ən çox üz tutduğu
ünvanlardan biridir. Səs verərək millət vəkil
seçdikləri şəxsləri başqa yerdə tapa bilməyən
vətəndaşlar şikayətlərini çatdırmaq
üçün parlamentin qarşısına
toplaşırlar. Amma "vəkil"lərini tapmaq çox
vaxt burada da onlara müyəssər olmur. Parlamentin
qarşısında günlərlə gözləyən vətəndaşların
dərdlərinə şərik olmaq üçün üz
tutduq MM-ə.
Baxmayaraq ki, iclas
günü deyildi, ancaq şikayətçi əlindən tərpənmək
olmurdu. Elə ki, jurnalist olduğumuzu bildilər, sanki aləm
dəydi bir-birinə, deputat-filan yaddan çıxdı. Mənə
deyilənlərlə buyurun siz də tanış olun. Bir həftədən
artıqdır hər gün parlamentin qarşısına gələn
Minayə Qasımova dərdini hələ heç kimə deyə
bilməyib: "Ədalarından adama cavab da vermirlər. Deyirlər,
bu gün də iclas olmayacaq. Guya iclas olanda qəbul edirlər.
İclas günü deyirlər iclasdadırlar, iclas olmayan
günü də deyirlər parlamentdə yoxdurlar. Telefon zənglərimizə
də cavab vermirlər. Bilmirəm, sözümü kimə
deyim. İkinci gün səhərdən axşama qədər
gözlədim. Amma deputatımızı görə bilmədim.
Axşam gedəndə acından ayaqlarım da sözümə
baxmırdı". M.Qasımova yaşadığı ərazidən
millət vəkili seçilən şəxsi tanıyır:
"Bilirəm ki, Ülvi Quliyev adlı şəxsdir. Amma nə
rayonda, nə də parlamentdə onu tapa bilmirəm. Seçkilər
vaxtı səs toplamaq üçün qapı-qapı gəzirdilər.
Sonra isə harada gizlənirlərsə, tapmaq olmur. Bura da o
ümidlə gəlmişəm ki, bəlkə Fəttah Heydərovu
görüm. Hər halda o da naxçıvanlıdır, bəlkə
tanıyıb problemimin həllinə kömək edə".
Oğlunun günahsız yerə həbs edildiyini bildirən
şikayətçinin sözlərinə görə,
heç bir yerdə onun şikayətinə baxan olmayıb.
VƏTƏNDAŞLAR ƏRAZİLƏRİNDƏN SEÇİLƏN
MİLLƏT VƏKİLLƏRİNDƏN KÖMƏK GÖZLƏMİRLƏR
Lerik rayonundan gələn
Ələkbər Quliyev öz rayonundan millət vəkili
seçilən şəxsin ancaq adını bilir: "Deyilənə
görə, Miri Qəmbərov adlı şəxsdir. Amma seçkilərdən
sonra rayonda onu görən olmayıb. Televiziyaya hər gün baxırıq ki, bəlkə danışanda
görək. Amma heç danışdığını
da eşitmirik. Bura isə millət
vəkili Hüseynbala
Mirələmovu görmək
ümidi ilə gəlmişəm. Oğlumun
işə düzəlməsinə
kömək etməsini
xahiş edəcəm.
Hüseynbala müəllim
bizim rayondan seçilməsə də,
eşitmişəm ki,
qəbuluna gələnlərə
kömək edir".
Daşkəsən rayon sakini Şamil Əsədov millət vəkili Qənirə Paşayevanın
qəbuluna düşmək
üçün paytaxta
gəlib: "İndi
isə deyirlər ki, Qənirə xanım ancaq öz seçicilərini qəbul edir". Ş.Əsədov fırıldaqçıların
qurbanı olduğunu bildirdi: "Bankdan kredit götürmüşdüm.
Vaxtında da borclarımı ödəyirdim.
Sonradan necə düzüb-qoşdularsa, evimi
əlimdən almaq istəyirlər".
MİLLƏT VƏKİLİNİ QAZ VERİLMƏMƏSİNƏ,
SUYA GÖRƏ YARANAN BORCA GÖRƏ DƏ AXTARANLAR VAR
Nərimanov rayonunda
yaşayan Azər Həsənov da millət vəkilini
parlamentin qarşısında görəcəyinə ümid
edir: "Parlament seçkilərində elə gün olurdu
ki, iki nəfər namizədlə seçicilərin
görüşü olurdu. Seçkilərlə
bərabər həmin
görüşlərə də son verildi.
Bilirəm ki, bizim seçki dairəsindən Adil Əliyev millət vəkili seçilib. Amma onunla seçicilərin
görüşlərinin keçirilməsinin
şahidi olmamışam.
Mənə də
"Azərsu" tərəfindən
10 il əvvəl işlətdiyim suya görə, külli miqdarda borc yazılıb.
Amma həmişə kommunal xidmət haqlarını vaxtında
ödəmişəm. İndi
məndən 1998-ci ildə
ödəniş apardığım
qəbzləri istəyirlər.
Həmin qəbzləri
yığıb saxlamaq
üçün gərək
bir otaq ayıraydım. Mən nə biləydim ki, 10 ildən sonra belə problemlə qarşılaşacağam.
İndi bura gəlmişəm ki, bəlkə Adil müəllim kömək
edər".
Parlamentin
qarşısına toplaşan 15 nəfər Binəqədi
sakini isə "Azəriqaz"dan şikayətçi idi. Sakinlər parlamentə son ümid yeri kimi baxdıqları üçün bura gəliblər. Ələkbər
Kərimovun sözlərinə
görə, 10 gündür
yaşadıqları Biləcəri
qəsəbəsi, Yeni
Yaşayış Massivinə
qaz verilmir: "Ərazidə yaşayanların
çoxu məcburi köçkünlərdir. Bura toplaşanlar da Cəbrayıl, Ağdam, Laçın, Xocalı, Kəlbəcər
rayonundan olan köçkünlərdir. Dövlət
hər ay bizim işlətdiymiz qaza görə qaz idarəsinə pul ödəyir. Amma qışın günündə qazımızı
kəsiblər. Nə
üçün, nəyə
görə kəsilib/,
bilmirik. İki dəfə yolu bağlasaq da, nəticəsi olmayıb. Binəqədi qaz idarəsinin əməkdaşı
deyir ki, ərazidə yaşayanlardan
bəziləri qazı
rezin boru ilə çəkib. Guya ona görə
qazı kəsiblər.
Əgər 5-6 nəfər
rezin boru ilə qaz çəkibsə,
onun cəzasını
bütün qəsəbə
çəkməlidir? Həmin
adamların qazını
kəssinlər. Bunlar
isə camaatı bir-birinə düşmən etmək istəyirlər. Sakinlərə
məsləhət verirlər
ki, qazı biz kəsək". Şikayətçilərin parlamentin
qarşısına toplaşmaqda
məqsədləri problemlərini
millət vəkillərinin
nəzərinə çatdırmaqdır:
"Millət vəkillərindən
kim olsa, dərdimizi demək istəyirik ki, problemi həll etsinlər. Oqtay Əsədov, Qənirə
Paşayeva, Gültəkin
Hacıyeva, Cavid Qurbanov, yaxud başqası. Əsas odur ki, problemimiz
həllini tapsın".
Redaksiyaya döndükdən sonra biz də
millət vəkilləri
ilə əlaqə saxlayıb şikayətçi
olan seçicilərin
onları necə görə biləcəkləri
ilə maraqlanmaq istədik. Çünki hər bir millət
vəkilinin ərazidə
seçki qərargahları
fəaliyyət göstərməlidir.
Lakin telefon zənglərimizə nə
Ülvi Quliyev, nə Miri Qəmbərov,
nə Adil Əliyev, nə də Hüseynbala Mirələmov cavab verdi. Demək. seçicilərin şikayətləri
də elə bizim zənglərimiz kimi cavabsız qalır ki, onlar başqa şəxslərdən kömək
gözləyirlər///...
Bu da bizim fəal
deputatlarımız. Məncə, seçicilərə bu da azdır, axı niyə o deputatlara səs verirdiniz ki, bugünkü gündə
üzlərini görməyə
həsrət qalırsınız?
Heç olmasa, gələn il
ayıq olun ki, sizi aldatmasınlar.
Xalid
Üç nöqtə.-2009.-14 fevral.-S.9.