Ötən il ölkədə 52 turizm obyekti inşa olunub

Nargin adası turizm mərkəzinə çevriləcək

"NARGİN adasının turizm mərkəzinə çevrilməsi ideyası gerçəkləşəcək". Bu sözləri jurnalistlərə açıqlamasında mədəniyyət və turizm naziri Əbülfəs Qarayev deyib. Nazirin açıqlamasına görə, Nargin adasının turizm mərkəzinə çevrilməsi üçün bir neçə layihə hazırlanıb: "Artıq Avstriya, Türkiyə, İsveçrə, ABŞ və Almaniyadan olan mütəxəssislər müxtəlif təkliflər hazırlayaraq təqdim ediblər". Nazir Azərbaycanın bu layihəyə dəstək verməsini istisna etməyib.

Azərbaycana turist axınının ildən-ilə artdığını da deyən nazir bildirdi ki, dövlətiimiz turizm sahəsində inkişaf edən ölkələrin siyahısında qabaqcıl yerlərdən birini tutur: "Dünyadakı maliyyə böhranı ilə əlaqədar olaraq turistlərin sayı 15-18 faiz azalıb, lakin buna baxmayaraq, Azərbaycanda turistlərin sayında artım var". Hadisəni sevindirici hal kimi qiymətləndirən nazir bunu, Azərbaycanda və əsasən də paytaxtda gedən inkişafla əlaqələndirdi.

Əbülfəs Qarayev 2006-cı ildə Azərbaycana 1193 742 nəfər əcnəbi vətəndaş gəldiyini, həmin əcnəbi vətəndaşların 903 889 nəfərinin turist olduğunu xatırladıb: "2007-ci ildə Azərbaycana gələn 1332701 nəfərdən 110792 nəfəri turistdir. 2008-ci ildə isə 1 milyon 898 min 939 nəfər Azərbaycana gəlib və onlardan 1408908 nəfər turist hesab olunur. Ötən il ərzində isə turistlərin sayında 39,4 faiz artım olub. 5-6 il ərzində turistlərin sayı 5-6 milyona çatacaq". Nazirin sözlərinə görə, ötən il ölkədə 52 turizm obyekti inşa olunub. 2007-ci illə müqayisədə 2008-ci ildə turistlərin sayında artımın olması, əsasən Amerika, Afrika, Ukrayna, Qazaxıstan, Qırğızıstan, Belarus, İran, Bəhreyn, Birləşmiş Ərəb Əmirlikləri, İordaniya, Almaniya, Avstriya, Bosniya və Herseqovina, Finlandiya, Hindistan və digər ölkələrin hesabına olub.

Simnarə

Üç nöqtə.- 2009.- 18 fevral.- S.9.