Əbülfəz Elçibəy anıldı

FAZİL MUSTAFA: "AZƏRBAYCAN XALQI ONUN DƏYƏRİNİ YÜKSƏK SƏVİYYƏDƏ VERİB"

ALMURAD ƏLİYEV BƏYİN HÖRMƏTLƏ YAD EDİLDİYİNİ DİLƏ GƏTİRDİ

DÜNƏN Azərbaycanın eks-prezidenti, Milli Azadlıq Hərəkatının lideri Əbülfəz Elçibəyin ad günü qeyd olundu. Bu münasibətlə bəyin partiya silahdaşları, yaxınları, ailə üzvləri onun Fəxri Xiyabandakı məzarını ziyarət etdilər. Əbülfəz Elçibəy haqqında öz ürək sözlərini deyən ziyarətçilər, onun xatirəsinin əbədiləşdirilməsini özlərinin ümdə borcları saydılar. Əbülfəz Elçibəyi ziyarət edənlər onun qəbirüstü abidəsini dövrəyə alaraq Azərbaycanın himnini oxuyaraq, ayrıldılar. Dünən Əbülfəz Elçibəy şəxsiyyətinə hörmət və ehtiram göstərənlər onun ad gününü belə qeyd etdilər. Ziyarətdən sonra Əbülfəz bəyin evində olan dostları onunla bağlı xatirələrini danışdılar. Əbülfəz Elçibəy yaşasaydı, 71 yaşı tamam olacaqdı... Əbülfəz Elçibəyin qardaşı Almurad Əliyev Bəyin həmişə olduğundan da artıq dərəcədə hörmətlə yad edildiyini dilə gətirdi. Ziyarətdə əksər siyasi partiyaların olduğunu deyən A.Əliyev tədbirin əvvəlki illərlə müqayisədə daha yaxşı təşkil olunduğunu bildirdi. O, bundan razı qaldığını dedi. Amma onu narahat edən məqamlar da var. Əbülfəz Elçibəysiz yaşanan narahatlığı "Üç nöqtə" ilə bölüşən bəyin qardaşı Əbülfəzsiz ona və ailəsinə çox çətin olduğunu dedi: "Əbülfəz Elçibəysiz çox çətindir, çox çətin... Elçibəyə prezidentlik statusunun verilməsi ilə bağlı məsələ yubadılır. Bundan narahatam. 9 ildir ki, onun ailəsinə heç bir təzminat verilmir. Ailəsində işsizlər var. Elçibəy sağ olsaydı, yəqin ki, belə olmazdı. O, rəhmətə gedib, mən də işləyə bilmirəm, uşaqlar da işsizdir. Yaxşı olardı ki, hökumətimiz buna bir çarə qılaydı". Əbülfəz Elçibəyin silahdaşları da onu böyük hörmətlə andıqlarını bildirdilər. Milli Məclisin deputatı Fazil Mustafa dedi ki, Əbülfəz Elçibəy elə bir tarixi şəxsiyyətdir ki, onun ideyaları və əməlləri həmişə Azərbaycan cəmiyyətinin yaddaşında heç bir məcburiyyət olmadan qalacaq: "Azərbaycan cəmiyyəti təmiz bir lider, dürüst bir şəxsiyyət kimi və xalqını sevən bir insan kimi onu hər zaman yaddaşında saxlayacaq. Onun yoxluğu təbiidir. Çünki daimi həyat heç kim üçün nəzərdə tutulmayıb. O, yaşadığı həyatda Azərbaycan xalqı üçün nələri etmək mümkündürsə, onu edib. Buna görə də Əbülfəz Elçibəy xoşbəxt insan sayıla bilər. Hesab edirəm ki, Azərbaycan xalqı onun dəyərəni yüksək səviyyədə verib. Söhbət hansısa heykəldən, addan, medaldan getmir. İstənilən inancda olan insan üçün Əbülfəz Elçibəy dürüst, səmimi bir insan idi. Bu titulu qazanmaq hər insana nəsib olmur. Ona görə də xoşbəxtəm ki, belə bir insan həyatımızdan gəlib keçib və biz onun dostu, ardıcılı olmuşuq. Bu gün də onun ideyalarının həyata keçməsi üçün əlimizdən gələni etməyə hazırıq".

Tahirə

Üç nöqtə.- 2009.- 25 iyun.- S. 4.