MSK-nın referendumu təxirə salmaq səlahiyyəti yoxdur

ZAHİD ORUC: "REFERENDUMU HAZIRKİ DÖNƏMDƏ HÜQUQİ BAXIMDAN TƏXİRƏ SALMAQ OLMAZ"

Bunu Mərkəzi Seçki Komissiyasının katibi Natiq Məmmədov Avropa Şurası Yerli Hakimiyyətlər Konqresi Bürosunun 18 mart referendumunu təxirə salmaq barədə çağırışına cavab olaraq bildirib.

18 mart referendumu qabağı təşviqat qruplarının fəal iş apardığı bir zamanda Avropa Şurası Yerli Hakimiyyətlər Konqresi Bürosunun referendumu təxirə salmaq barədə təklifinin reallaşdırılması hakimiyyət ekspertləri tərəfindən hüququ baxımdan qeyri-mümkün hal kimi dəyərləndirilir. Yeni Azərbaycan təşviqat qrupunun üzvü və referendumun keçirilməsinə səs vermiş millət vəkili Zahid Orucun fikrincə, referendumu hazırki dönəmdə hüquqi baxımdan təxirə salmaq olmaz. Zahid Oruc konkret halda qanunvericilik təşəbbüsü hüququnun subyekti dedikdə Yeni Azərbaycan partiyasını nəzərdə tutuduğunu və bu qurumun belə bir təkliflə Konstitusya Məhkəməsinə müraciət etmək niyyətində olmadığını dedi. İREX mediaya yardım təşkilatının hüquqşünası Ələsgər Məmmədli də Azərbaycan qanunvericiliyində referendum kimi tədbirlərin təxirə salınması ilə bağlı maddənin olmadığını bildirdi və söylədi ki, Avropa Şurası ekspertləri belə təkliflə çıxış edəndə ən azı bunu nəzərə almalı və tez tərpənməli idilər.

Bununla yanaşı, hüquqşünas söylədi ki, hər bir şeyin çarəsi olduğu kimi, yaranmış vəziyyətdən də çıxış yolu var. Belə ki, əgər referenduma çıxarılan hər hansı müddəanın beynəlxalq konvensiyalara uyğunsuzluğu müəyyən edilibsə, bu uyğunsuzluq həmin sahənin fəaliyyəti ilə bağlı qəbul edilən qanunlara dəyişiklik edilməklə nizamlana bilər. Məsələn, konkret söhbət bələdiyyələrin statusu ilə bağlı Konstitusiyaya ediləcək dəyişikliklərin beynəlxalq xartiyaya uyğunsuzluğundan gedirsə, bələdiyyələr haqqında qanunda referendumdan sonra dəyişiklik edərkən bu, nəzərə alınmalıdır.

Emin

Üç nöqtə.- 2009.- 5 mart.- S. 4.