Hadi Rəcəblinin məmurlara tövsiyəsi

"TOY, YAS MƏRASİMLƏRİ KEÇİRDİKDƏ DƏBDƏBƏYƏ ÜSTÜNLÜK VERMƏYİN"

AZƏRBAYCAN istər toy, istərsə də yas mərasimlərinin xüsusi təmtəraqla keçirildiyi yeganə ölkədir, desək heç də yanılmarıq. Söhbət əsasən özünəməxsus özəlliyi ilə seçilən zəngin süfrə açılmasından gedir. Əslində bu, dində zənginlik yox, israfçılığın göstəricisidir. Uzağa getməyək, təcrübəsinə tez-tez istinad etdiyimiz Türkiyədə toy və yas mərasimlərinin keçirilməsi tamam fərqlidir. Türkiyədə yas evinə qonşular, qohumlar ehsan bişirib gətirir. Orada nə küçənin ortasında təmtəraqlı çadırlar qurulur, nə də şadlıq evlərində ehsan verilir.

Azad İstehlakçılar Birliyinin rəhbəri Eyyub Hüseynov Azərbaycandakı toylar qalsın bir yana, son illərin yas mərasimlərini "çalğısız toy" adlandırdı: "Övladlarına toy etmək istəyən valideynlər ilk növbədə şadlıq evlərinə müraciət edirlər. Burada onların ilk qarşılaşdıqları təbii ki, restoran menyusudur. Menyuda isə maşallah hər nə desən var. Yemək əlindən stolda tərpənmək olmur, 3-4 saat ərzində stol ətrafında oturanların bu təamları yeməsi qeyri-mümkündür".

Müsahibimiz hesab edir ki, valideynlər bu cür dəbdəbəli süfrənin açılmasının tərəfdarı olmasa da, şadlıq evləri varlını da, imkanı yüksək olmayanı da eyni xərci çəkməyə məcbur edir. "Toy sahibi öz maddi durumuna baxıb 30 növ yeməkdən və salatdan bir neçəsini ixtisara salmaq fikrinə düşsə də, restoran sahibləri bununla qətiyyən razılaşmırlar".

E.Hüseynov qeyd etdi ki, məcburi şəkildə növbənöv yeməklər təklif edən şadlıq evlərində menyunun qiyməti fantastik rəqəmlərlə ölçülür: "Bir milyondan artıq qaçqını və köçkünü olan bir ölkədə belə dəbdəbəli süfrələrin açılması, israfçılığa yol verilməsi sadəcə, biabırçılıqdır".

Toy mərasimlərimiz üçün bu qədər xərc çəkmək kimə lazımdır? Təbii ki, bir qrup insanlar var ki, onlar bunlardan qazanc götürürlər. Bəs gənclərimiz "palaza bürünərək elnən sürünməklə" nə qazanırlar? Bir çoxları düşünür ki, nə qədər dəbdəbəli və qonaqlı toy etsələr, o qədər "hörmətli" olarlar. Millət vəkili Hadi Rəcəbli bunun tamamilə yanlış fikir olduğunu dedi: "Gənclər və onların valideynləri anlamalıdırlar ki, dəm-dəstgahlı toy etməklə, lazımsız borca düşməklə maddi və mənəvi problemlə üzləşəcəklər. Amma etiraf edək ki, belə adət-ənənələri qanunla tənzimləmək çətindir. Çünki mərasimlər haqqında qanun elə hazırlanmalıdır ki, sonradan onun icrasında neqativ hallar meydana çıxmasın. Qanunda əksini tapa biləcək məqamlar reallıqda özünü doğrultmalıdır. Əgər bu qanun işləməyəcəksə, onun qəbuluna nə lüzum var? Ona görə sözügedən qanun layihəsinin hazırlanması ilə bağlı ortada heç bir nəticə yoxdur". Millət vəkili hesab edir ki, cəmiyyətdə ictimai rəyə təsir imkanı artırılmalıdır: "İnsanlar özləri bu ifratçılığı yoluna qoymağa çalışmalı, xüsusən məmurlar hansısa bir mərasim keçirdikdə dəbdəbəyə deyil, milli dəyərlərə önəm verməklə digərlərinə nümunə göstərməlidirlər. Düzdür, sağlam mərasim təşkil edənlər tapılsa, buna da əvvəl-əvvəl rişxənd edənlər, bəyənməyənlər, ağız büzənlər olacaq". H.Rəcəbli bunun üçün müəyyən vaxt, zamana ehtiyac olduğunu dedi.

Əfsun

Üç nöqtə.- 2009.- 14 mart.- S. 12.