Akademiyada törədilən
terrorda erməni izi üzə çıxdı
FƏRDA QƏDİROV CİNAYƏTDƏ İSTİFADƏ
ETDİYİ SİLAHI ERMƏNİ SERGEY QRİQORYAN ADLI ŞƏXSLƏ
BİRLİKDƏ ALIBMIŞ
"BAKIYA GƏLİRƏM, QARŞIMA KİM ÇIXSA
YAŞINA BAXMADAN VURACAĞAM"
DÜNƏN Baş Prokurorluq və Daxili İşlər Nazirliyi Azərbaycan Dövlət Neft Akademiyasında törədilmiş cinayətlə
bağlı daha bir məlumat yayıb. Məlumatda bildirilir
ki, hadisənin şahidi olmuş ADNA-nın müəllim və tələbələri,
o cümlədən Fərda Qədirovun Gürcüstandan Bakıya
gəldiyi avtobusun sürücüsü və
sərnişinləri, paytaxtda
olduğu müddətdə
ünsiyyət saxladığı
şəxslər, hərəkət
marşrutu, yaşadığı
binanın sakinləri
və ətraf ərazilərdəki obyektlərdə
işləyənlər dindirilib.
Həmçinin, cinayətdə
iştirakı ehtimal edilənlərin telefon danışıqları təhlil
edilib, eləcə də onların mənzillərində, müxtəlif
saxlanc yerlərində
axtarışlar aparılıb,
digər zəruri tədbirlər həyata keçirilib. Fərda Qədirovun cinayəti törətdiyi gün yaşadığı ünvandan
Akademiya istiqamətində
keçdiyi yolu qeydə almış videokameraların görüntüləri,
habelə onun hərəkət trayektoriyası
öyrənilməkdədir. Bununla yanaşı, Fərda Qədirovun əvvəllər
Rusiya Federasiyası və Gürcüstanda yaşaması baxımından
əlaqələrinin müəyyənləşdirilməsi
və iş üçün əhəmiyyət
kəsb edən istintaq hərəkətlərinin
aparılması məqsədilə
həmin ölkələrə
istintaq qrupunun üzvləri ezam olunub. Gürcüstanın hüquq-mühafizə
orqanları ilə birgə həyata keçirilmiş tədbirlər
nəticəsində Fərda
Qədirovun Daştəpə
kəndində yaşadığı
evdə axtarış
zamanı ona məxsus müxtəlif sənədlər, o cümlədən cinayətdə
istifadə etdiyi tapançanı 24 oktyabr
2008-ci il tarixdə "Kula ARMS Corciya" Məhdud
Məsuliyyətli Cəmiyyətə
məxsus Tbilisi şəhərindəki silah
mağazasından alması
barədə qəbz,
14 ədəd patron, güllə və giliz, hər biri 50 patron tutumu olan iki
qutu, düyməli bıçaq, silah təmizləmək üçün
ləvazimat, birdəfəlik
istifadə üçün əlcəklər,
habelə əlində
silah tutduğu vəziyyətdə çəkilmiş
üç fotoşəkli
aşkar edilib. Fotoşəkillərdən ikisinin
arxasında "24 fevral,
2009 q. Qadirov Farda Odinokiy Volk (Tənha canavar-red)", digərində
isə (Mənim hər addımın ölümdür-red). 10 noyabr,
2008 q. Qadirov Farda" sözləri
yazılıb. Əşyaların
içində, həmçinin,
müxtəlif telefon nömrələri olan qeydlər, 15 ədəd videokasset, üzərində
rus dilində "Telefonun kamerasına bax, görərsən mən kiməm" yazısı olan kağız parçası,
telefonunda isə "Mənim üçün məhəbbət yoxdur, yalnız
nifrət var, Bakıya gəlirəm, qarşıma kim çıxsa yaşına
baxmadan bax belə vuracağam, polisə təslim olmayacağam, öldürməkdən
həzz alacağam"
deməsini, canavar maskası taxmasını və tapançadan atəş açmasını
nümayiş etdirən
videogörüntülər aşkar edilərək götürülüb.
Gürcüstanın
hüquq-mühafizə orqanlarının yaxından köməkliyi
ilə davam etdirilən istintaq-əməliyyat tədbirləri
nəticəsində Fərda Qədirovun 2008-ci ilin
oktyabrında Rusiyadan Daştəpə kəndinə
qayıtdıqdan sonra oktyabr-noyabr aylarında 1961-ci il təvəllüdlü
milliyyətcə erməni olan, lakin özünü
gürcü kimi təqdim etmiş Gürcüstan vətəndaşı
Qriqoryan Sergey Yeqoroviçlə telefon əlaqəsi yaradaraq
mütəmadi görüşməsi, birlikdə silah
mağazasından 500 lariyə "Makarov"
tapançası və 200 lariyə 100 ədəd patron
alması müəyyən edilib.
Törədilmiş bu
ağır cinayətdə Sergey Qriqoryanın əlaqəsinin
olub-olmaması və tapançanın əldə
olunmasının qanunauyğunluğunun müəyyənləşdirilməsi
istiqamətində istintaq-əməliyyat tədbirləri
aparılır. Eyni zamanda, Dövlət Sərhəd Xidməti
ilə birlikdə həmin silahın dövlət sərhədindən
Azərbaycana hansı yolla keçirilməsi faktı
araşdırılır.
O da qeyd
olunmalıdır ki, valideynlərinin və
yaxınlarının Fərda Qədirovun meyitinin qəbulundan
imtina etmələri səbəbindən cəsədi sahibsiz
kimi torpağa verilib.
Hazırda işin
bütün hallarının araşdırılması istiqamətində
zəruri istintaq hərəkətləri və əməliyyat-axtarış
tədbirləri davam etdirilir.
Elməddin
Üç nöqtə.- 2009.- 16 may.- S. 3.