Moskvada azərbaycanlı şairin yubileyi keçirilib

NƏSİB NƏBİOĞLU RUSİYA İLƏ AZƏRBAYCAN ARASINDA YARADICILIQ ƏLAQƏLƏRİNİ GENİŞLƏNDİRMƏYƏ SƏY GÖSTƏRİR

MOSKVADA Azərbaycan şairi, Azərbaycan Yazıçılar Birliyinin və Rusiya Yazıçılar İttifaqının üzvü, Azərbaycan Yazıçılar Birliyi Moskva bölməsinin katibi Nəsib Nəbioğlunun 55 illik yubileyinə həsr olunmuş gecə keçirilib. Həm Rusiyadan, həm də Azərbaycandan olan qələm dostları onu təbrik ediblər, yaradıcılığı ilə bağlı xoş sözlər söyləyiblər. "AzərTac"ın məlumatına görə, gecədə o, Rəsul Rza Fondunun təsis etdiyi "İlin mükafatı" ordeninə layiq görülüb. Mükafatı Azərbaycan Yazıçılar Birliyinin sədri Anar Moskvaya səfəri zamanı təqdim edəcək. Tədbirin bədii hissəsində müğənni Tərlan Şahbazov bəstəkar Asya Sultanovanın Nəsib Nəbioğlunun sözlərinə bəstələdiyi "Azərbaycan oğulları" mahnısını ifa edib. Ömrünün 40 ilini yazıb-yaratmağa həsr edən Nəsib Nəbioğlu saysız-hesabsız şeirlərin müəllifidir. Onun şeirləri tələbəlik illərində rus dilinə tərcümə olunub və "İstoki", "Poeziya" şeir almanaxlarında, Rusiya və Azərbaycan dövri mətbuatında dərc edilib, müasir Azərbaycan poeziyası antologiyalarına daxil olunub. O, rus və Azərbaycan dilində nəşr olunmuş "Vətən mənim ürəyimdir", "Yalvaran bulaq", "Söz istəyirəm", "Dağlar məni bağışlamaz" və "Nəğməkar əsgər" kitablarının müəllifidir. Nəsib Nəbioğlu hazırda da Rusiya ilə Azərbaycan arasında yaradıcılıq əlaqələrini genişləndirməyə səy göstərir, onun fəaliyyəti Azərbaycan mədəniyyətinin və ədəbiyyatının təbliğinə, Azərbaycan və Rusiya xalqları arasında dostluq əlaqələrinin möhkəmləndirilməsinə, mədəniyyətlərimizin zənginləşdirilməsinə yönəldilib. Eyni zamanda o, öz əsərləri ilə Azərbaycan həqiqətlərini Rusiya cəmiyyətinə çatdırır, ərazilərimizin bir hissəsini işğal etmiş Ermənistanın xalqımıza qarşı təcavüzünə etiraz səsini ucaldır. Nəsib Nəbioğlunun təşəbbüsü və rəhbərliyi ilə Moskvada həm Azərbaycanın, həm də Rusiyanın ədəbiyyat tarixinə düşmüş yazıçı və şairlərin ad günləri və yubileyləri keçirilir.

Üç nöqtə.- 2009.- 26 may.- S. 13.