"Müqəddəs zirvə"

Sentyabrın 22-də Azərbaycan Dövlət Film Fondunun kinozalında Milli Qəhrəman Mübariz İbrahimovun xatirəsinə ithaf olunmuş "Müqəddəs zirvə" adlı sənədli filmin təqdimat mərasimi keçirilib.

Avrasiya Beynəlxalq Araşdırma İnstitutu İctimai Birliyinin dəstəyilə çəkilən filmin rejissoru Etibar Məmmədov, redaktoru Günel Paşayeva, baş məsləhətçisi deputat Qənirə Paşayevadır.

Sənədli filmdə Milli Qəhrəman Mübariz İbrahimovun həyat və döyüş yolundan bəhs olunduğunu diqqətə çatdıran Avrasiya Beynəlxalq Araşdırma İnstitutu İctimai Birliyinin sədri Günel Paşayevanın bildirdiyinə görə, filmdə qəhrəmanın valideynləri, yaxınları, Daxili Qoşunlarda və milli orduda onunla xidmət etmiş hərbçi yoldaşları, komandirlərinin fikirləri əksini tapıb. Filmdə Mübarizin vətən, Qarabağ haqqında düşüncələrinə xüsusi yer ayrılıb.

"Azərbaycanın Mübariz kimi qəhrəmanları dünən də olub, bu gün də var, sabah da olacaq" deyən deputat Qənirə Paşayevanın sözlərinə görə, həmin qəhrəman oğullar vətən yolunda canlarını verərək şəhidlik zirvəsinə ucalıblar: "Mübariz İbrahimovun yaşadığı 22 il qısa ömür olsa da, mənalı həyat yolu olub. Çünki o, 22 ildə şəhidlik zirvəsinə yüksələ bilib. Nə qədər müqəddəs olmalısan ki, bütün ideyaların fövqündə dayanan şəhidlik zirvəsini seçəsən. Mübarizin atası Ağakərim kişi deyib ki, "oğlum nə etməli idisə, onu da edib, bu mənim üçün kifayətdir". Anası Şamama xanım deyir ki, "Mübariz həmişə vətən sağ olsun deyirdi. Fəxr edirəm ki, vətənə layiq övlad böyütmüşəm". Mübarizin arzularının həyata keçməsinə isə çox qalmayıb. Biz iş?al olunmuş torpaqlarımızı tezliklə azad edərək, Qarabağda bayrağımızı ucaldacağıq. Bu gün o qədər də uzaqda deyil". Sonra "Müqəddəs zirvə" sənədli filminin və sözləri Qənirə Paşayevaya, musiqisi əməkdar artist Tünzalə Ağayevə məxsus "Şəhidim" musiqi kompozisiyası göstərilib.

Ağa

Xalq Cəbhəsi.- 2010.- 23 sentyabr.- S.9.