“Milli Düşüncə İnstitutu“ İctimai Birliyi yaradıldı

Bu gün “Milli Düşüncə İnstitutu“ İctimai Birliyinin təqdimat mərasimi keçirilib. Mərasimi açıq elan edən birliyin rəhbəri Taryel Faziloğlu bildirdi ki, birliyin yaradılmasının əsas hədəfi gənclərlə işləməkdir: “Məqsədimiz Azərbaycan gənclərində vətənpərvərlik, vətəndaşlıq hisslərini gücləndirməkdən, milli-mənəvi, əxlaq dəyərləri aşılamaqdan ibarətdir. Dövlətçilik ideyasının düzgün təbliğ edilməsi, bundan başqa bu istiqamətlərdə tədqiqatlar aparılması üçün baza yaradaraq gəncləri bu yönə həvəsləndirmək də birliyin məqsədlərindəndir”.

Tədbirdə çıxış edən “Müasir İnkişaf” İctimai Birliyinin İdarə Heyətinin sədri Mübariz Aşırlı bildirdi ki, yeni təşkilat əvvəllər “Müasir İnkişaf” İB-nin tərkibində fəaliyyət göstərmiş “Türk-İslam Dünyası” Diskussiya Klubunun əsasında yaradılıb: “Fəaliyyət göstərdiyi uzun müddət ərzində klub gənclərlə iş sahəsində müvəffəqiyyət qazandı və bu klubun bazasında yaradılmış təşkilatın daha böyük uğurlar qazanacağı şübhəsizdir”.

Tədbir iştirakçılarından “Elmi Araşdırmalar” İctimai Birliyinin sədri Aygün Həsənoğlu, Müstəqil Mətbuat Mərkəzinin sədri ElçinXalidbəyli, Azərbaycan Milli Elmlər Akademiyasının əməkdaşı Bəhmən Faziloğlu, “Oğuz” Birliyinin İdarə Heyətinin üzvü Anar Turan və digərləri yeni təşkilatın əhəmiyyətli bir fəaliyyət göstərəcəyini qeyd edərək təşkilatın bu sahədə olan boşluğu dolduracağına ümid etdiklərini bildirdilər.

Xalq Cəbhəsi.-2011.- 8 aprel.- S.6.