Turizm şirkətlərinin sayı
azalır
Gürcüstana
və Türkiyəyə gedən azərbaycanlı turistlərin
sayı isə artıb
Dünən Bakıda «Sərhədyanı turizmin inkişafı və perspektivləri» mövzusunda beynəlxalq konfrans işə başlayıb. APA-nın xəbərinə görə, iki gün davam edəcək konfransda Azərbaycan, Türkiyə, Gürcüstan, Qazaxıstan, Rusiya və Türkmənistanın turizm sektoru orqanlarının, turizm şirkətlərinin və Azərbaycan Turizm Universitetinin nümayəndələri, turizm üzrə ekspertlər və digər şəxslər iştirak edir. Konfransın keçirilməsində məqsəd region ölkələri arasında turizmin daha da inkişaf etdirilməsi ilə bağlı yeni layihələrin inkişaf etdirilməsi, uzaq xarici ölkələrdən turistlərin cəlb edilməsi üçün birgə turizm marşrutlarının yaradılması, alternativ turizm məhsullarının yaradılması və digər üsulların müzakirəsidir.
Mədəniyyət və Turizm Nazirliyinin şöbə rəisi Aydın İsmiyevin sözlərinə görə, bütün dünyada turizm mübadiləsinin böyük hissəsi qonşu ölkələrin payına düşür. Belə ki, Azərbaycana gələn turistlərin 50-55%-i ətraf xarici ölkələrdən – Rusiya, Türkiyə, İran Gürcüstan və s.-dən gəlir. Bu baxımdan regional turizmin inkişaf etdirilməsi Azərbaycan üçün çox vacibdir. Bundan başqa, statistika göstərir ki, uzaq ölkələrdən gələn turistlər gəldikləri regionda bir yox, bir neçə ölkəni gəzməkdə maraqlı olurlar: «Məsələn, əvvəl Azərbaycana gəlirlər, sonra Gürcüstana, sonra isə Türkiyəyə gedib, oradan öz vətənlərinə yola düşürlər. Buna görə də region ölkələri xarici turistlərin daha da aktiv cəlb olunması üçün birgə layihələrin reallaşdırılmasında maraqlıdırlar. Bu baxımdan belə regional marşrutlar çox aktualdır». Bu mövzuda tədbirin ilk dəfə keçirildiyini bildirən A.İsmiyevin sözlərinə görə, konfransda birgə əməkdaşlıq, o cümlədən orta turizm marşrutlarının tətbiqi, dünya turizm bazarına regional turizm məhsullarını təqdim etmək, qarşılıqlı turist mübadiləsi həyata keçirmək və s. müzakirə olunacaq.
Qeyd edək ki, konfransın nəticəsi olaraq Bakı bəyannaməsinin qəbulu nəzərdə tutulub. Sənəddə region ölkələri arasında turizm sahəsində əməkdaşlığın daha da gücləndirilməsi, birgə layihələrin reallaşdırılması, eləcə də İpək Yolu, Aleksandr Düma, Qafqaz turu və s. kimi beynəlxalq mədəni turizm marşrutlarının yaradılmasının vacibliyi qeyd olunub, region ölkələrinin bu tədbirləri dəstəkləyəcəyi bildirilib.
Cari ildə Azərbaycandan Gürcüstana gedən turistlərin
sayında 30% artım qeydə alınıb. Bu barədə
Gürcüstanın Milli
Turizm Agentliyinin departament rəhbəri Rusudan Mamatsaşvili bildirib. Onun sözlərinə görə, təkcə bu ilin 11 ayında
Azərbaycandan Gürcüstana
643 min turist səfər
edib. O bildirib ki, Azərbaycanlı turistlərin Gürcüstana
marağının əsas
səbəbi xidmət
və hotel qiymətlərinin
aşağı olması,
burda çoxlu tədbirlərin və konsertlərin keçirilməsidir:
«Qiymətlər çox
məqbuldur, üstəlik,
bizim şirkətlər
müxtəlif endirim kampaniyaları da keçirirlər. Nəticədə Gürcüstanın elitar
yay və qış kurortları Azərbaycanda çox populyardır».
Paralel olaraq Gürcüstandan Azərbaycana
gələn turistlərin
də sayı artır, amma onların sayı əks istiqamətdə gedənlərin sayından
xeyli azdır. R.Mamatsaşvilinin sözlərinə görə,
gürcü turistləri
Azərbaycana biznes məqsədilə və həftə sonlarında istirahət etmək üçün gəlirlər.
Turizm sektorundakı
rəqabət Azərbaycandakı
turist şirkətlərinin
sayının azalması
ilə nəticələnəcək. Bu barədə Mədəniyyət
və Turizm Nazirliyinin şöbə rəisi Aydın İsmiyev bildirib. Onun sözlərinə görə, bir neçə il
əvvəl Azərbaycanda
turizm şirkətlərinin
sayı 250-300-ə çatmışdı,
indi isə bu rəqəm 200 ətrafındadır. A.İsmiyev
turizm şirkətlərinin
normal fəaliyyət göstərməsi
üçün onların
maddi imkanlarının
böyük olmasını
da vacib sayır: «Şirkətlərin
öz turizm xidmətlərini reklam etməsi üçün
vəsaitləri, avtobusları,
təyyarələr icarə
etmək və s. imkanları olmalıdır».
Maraqlıdır ki, ölkəmizdən Türkiyəyə də turist axını artır. Bu ilin yanvar-oktyabr
aylarında Türkiyəyə
500 minə yaxın turist gedib ki,
bu da 2010-cu ilin müvafiq dövrü ilə müqayisədə 24% artım
deməkdir. Keçən ilin 10 ayında Türkiyəyə gedən
azərbaycanlı turistlərin
sayı 401 min nəfər
olub. Bu ilin
sonuna qədər bu rəqəmin 550 mindən çox olacağı gözlənilir.
2011-ci ilin 10 ayında
(yanvar-oktyabr) Türkiyəyə
gələn turist sayında keçən ilin eyni dönəminə
görə 10,36% artım qeydə alınıb. Bu ilin 10 ayında Türkiyəyə
gələn 28,665 milyon
turistin 32,06%-i (10 milyon nəfər) Antalya,
24,11%-i (6,9 milyon) İstanbul, 10,65%-i (3 milyon nəfər) Muğla, 8,18%-i (2,3 milyon) Ədirnə, 4,44%-i (1,3 milyon) İzmir giriş qapılarından ölkəyə
daxil olublar.
Bir sözlə,
Azərbaycanda turizm xidmətləri hədsiz dərəcədə baha
olduğundan azərbaycanlılar
ölkə daxilində
istirahətdən daha
çox qonşu ölkələrə – Türkiyə,
Rusiya və Gürcüstana getməyə
üstünlük verirlər. Türkiyədə turizm sənayesi son 30 ildə çox böyük sürətlə
inkişaf edib. Azərbaycan hökuməti arzulayır
ki, 15-20 ilə Türkiyənin səviyyəsinə
çatsın. Ancaq çətin
ki, biz bu gedişlə Türkiyəyə
çata bilək.
Əslində bizi heç
onlarla müqayisə etmək mümkün deyil. Çünki Türkiyədə dövlət büdcəsinin
gəlirlərinin üçdə
biri turizmin hesabına formalaşır.
Doğrudan da son illər
Azərbaycanda infrastrukturun
yenidən qurulması,
müasirləşdirilməsi turizmin inkişafına təkan verir. Lakin başlıca problem – turizm
xidmətlərinin rəngarəngliyinin,
səviyyəsinin yüksək
olmaması və qiymətlərin çox bahalığı həll
olunmamış qalır.
Ölkədaxili qiymətlər fantastikdir. Azərbaycanın səfalı güşələrində
– Qəbələ, Quba,
Qusar, Şamaxı, Qax və s. bir günlük orta səviyyəli istirahət 100 manata başa gəlir. Bu hesabla ölkəmizdə
bir həftəlik istirahət 800-1000 dollardır.
Elə Rusiyadan Azərbaycana gələn turistlər də burada qiymətlərin və xərclərin yüksək
olmasından gileylənirlər.
Hətta
Azərbaycan vətəndaşları
üçün ölkə
daxilində istirahətdən
xarici turlar daha əlverişlidir.
Təsadüfü deyil ki, Azərbaycan özü müalicəvi turizm məkanları (mineral sularla
bol) ilə zəngin olsa da, insanlar Rusiya
kurortlarına üz tuturlar. 500 dollara
yol pulu da daxil Rusiyada
iki-üç həftə
həm istirahət etmək, həm də müalicə almaq mümkündür.
Bütün bunları nəzərə
alsaq, hətta hökumət yerli turistləri əlverişli
qiymətlər və
yüksək xidmət
hesabına ölkə
daxilində saxlaya bilsə, birinci mərhələdə bu,
çox böyük uğur olardı.
Tərlan
Xalq Cəbhəsi.- 2011.- 10 dekabr.-
S.12.