Borçalıda “Elat Mədəniyyəti Günü”

İyulun 26-da Gürcüstanda — Azərbaycan Türklərinin tarixi dədə-baba yurdlarından biri olan Borçalının Armudlu yaylasında (Dmanisi rayonu ərazisindədir) Borçalı Türklərinin IV Elat Günü keçirilib. Artıq ənənəvi olaraq ildə bir dəfə — hər il iyul ayının 26-da keçirilən tədbirdə əslən Borçalıdan olan Azərbaycanın tanınmış ziyalıları, Bakıdan getmiş müxtəlif sənət sahələrində çalışan, təşkilatları təmsil edən tanınmış ziyalılar, jurnalistlər, habelə İrandan-Güney Azərbaycandan, Türkiyədən gələn qonaqlar iştirak ediblər.

Rəsmi tədbirdən sonra milli yöndə musiqilər səslənib. Azərbaycandan, habelə Borçalıdan, Türkiyədən gəlmiş musiqiçilərin çıxışları maraqla qarşılanıb. Yenə də Armudlu yaylasında əsasən Borçalının müxtəlif kəndlərindən gəlmiş soydaşlarımızın biri-biriylə süfrə arxasında doğmalaşma söhbətləri hamıya gözəl təsir bağışlayıb. Borçalıya — Vətənin ruhumuzda ayrılmaz, bütöv ünvanına gediş insanların yaddaşında gözəl iz qoyub. Borçalının zəngin, türk ruhlu təbiəti, orada yaşayan soydaşlarımızın bizlərə doğma sevgisi müşahidə olunub. Deməli, xalq ola bilmək, xalq kimi yaranmaq, yəni insani, milli halımızı artırmaq imkanımız həmişə var. Yurdun əbədi var olması üçün orada yaşayanların ruhən var olması gərəkdir. Türkün köçəri, elat ruhu bizi sevməyənlərin pis anlamda car çəkdikləri köçərilik deyil. Türk öz ucsuz-bucaqsız yurdunda köç edib həmişə.

Yağılarımızın dediyi köçəri xalq belə bir oturuşmuş mədəniyyət, xəlqi möhtəşəmlik yarada bilməzdi: xalqı yetkin fərdlər yaradır. «Borçalı» İctimai Cəmiyyətinin sədri Zəlimxan Məmmədlinin belə bir istəyi gerçəkləşdirməsi hünər sayılmalıdır. Yurdu yaşatmaq, olanları qorumaqla bağlı indi daha çox danışılır, ancaq gerçək əməlçilər barmaqla sayılası qədər azdır. Söz ki işdə gerçəkləşmir, o, yaşamır.

Yurd niyə müqəddəsdir? Ona görə ki, yurd sevgisində torpaq müqəddəslik səviyyəsində dərk olunur. İnsan dünyaya sığmadığı dərəcədə Vətənə sığır. Tədbir boyunca tanınmış aşıqlar, söz adamları çıxış ediblər. Armudlu yaylasında — Borçalının axar-baxarlı yerində düzənlənən tədbirdə minlərlə soydaşımız cıdır və güləş yarışlarına, saz-söz məclisinə baxıblar. Tədbir iştirakçılarda böyük ruh yüksəkliyi yaradıb. Vətəni yaradan və yaşadan onun fərdləridir. Bu səbəbdən də Vətəni yaratmaq və yaşatmaq ilk olaraq özümüzü ruhən qurmağımızla sıx bağlıdır.

Uğur

Xalq Cəbhəsi.- 2012.- 28 iyul.- S.3.