«Bir mən
vardır məndə məndən içəri»…
İlahi türkü deyənlərimiz – Yunis İmrə və Qaracaoğlan
Aşıq sənəti, saz türk
ruhundan doğub, Türk qüdrətini, mənəviyyatını
təsdiq edir. Azərbaycan
aşıq sənətinin qədim kökləri mövcuddur. Bu sarıdan həm
də qardaş Türkiyənin zəngin
aşıq ədəbiyyatı, ənənəsi var. Bu gün
Azərbaycanda Yunis Əmrə, Qaracaoğlan və başqalarının
imzalarını soydaşlarımız gözəl
tanıyırlar. Professor Maarifə
Hacıyevanın araşdırmalarında türk-ozan
aşıq sənətinin inkişafı, türk-aşıq
ədəbiyyatının yüzillər boyunca
yaşayıb-yaradan sənətkarlarının taleyi və yaradıcılığı ilə
bağlı soraqlar var.
Türk-aşıq ədəbiyyatının məşhur
nümayəndələrindən biri olan Yunis Əmrə
1240-cı ildə Əskişəhərə bağlı
Sivrihisarın Sarıkök adlanan kəndində
anadan olub. Bu kənd Porsuq
çayının Sakaryaya töküldüyü bir
yerdədir. Hazırda həmin kənd Yunis
Əmrənin adını daşıyır.
M.Hacıyeva bildirir ki, Yunis
Əmrənin bir neçə şeirindən
onun mədrəsə təhsili
aldığı məlum olur: «Onun ailə həyatı, anası, atası
haqqında ətraflı bir məlumat zamanımıza
qədər gəlib çatmayıb. Şeirlərində də
bu barədə bir
işarə yoxdur. Bir
rəvayətə gör, iki
dəfə evlənib, başqa bir rəvayətə görə isə mürşidi Tapdıq Əmrənin
qızına aşiq olub.
Şairin adı, həyatı, məzarı
rəvayətlərə dönüb. Anadolunu gəzən
şairin daha sonralar Azərbaycana, Şama
gəlməsi, Konyada Mevlana
Rumi ilə görüşdüyü,
son günlərini Sarıköydə
keçirərək 1320-ci ildə həmin kənddə öldüyü arpaşdırmaçılar
tərəfindən yazılmaqdadır. Anadolunun
bir çox yerlərində
şairin məzarları olduğu
söylənsə də məzarının Sarıköydə
(indiki Yunis Əmrə
bələdiyyəsində) olduğu
artıq qəbul olunub.
Mürşidi Tapdıq Əmrənin, Yunus Əmrənin Qax rayonunun Oncalı kəndindəki Oğuz məzarlığında qəbirləri
olduğu yazılmaqdadır. Professor Məşədixanım Nemət qeyd edir ki,
Qax rayonunun Oncalı kəndində
yerləşən qəbristanlıqdakı Şeyx
Yunus və Hacı Tapdıq baba pirləri yerli əhali
tərəfindən müqəddəs sayılan ziyarətgahlardan
biridir. Yunus Əmrənin
ilahiləri yüzilləri aşaraq
xalqın könlündə, dərgahlarda, təkkələrdə
yaşayıb və yaşamaqdadır. Onun
bir çox əsərləri
ölümündən sonra yazıya
alınıb. Şairin ölümündən
118 il sonra onun divanı Mahmud Mustafa Bin Xan
tərəfindən yazdırılıb. Bu
divanda onun xeyli şeiri var. Sonradan professor
Fuad Köprülü
və professor Abdulbakı
Gölpınarlı bu divanı nəşr
etdirmişlər».
Yunis Əmrənin əfsanəyə dönmüş həyatı haqqında
danışan M.Hacıyeva daha sonra deyir ki,
onun şeirlərinin sayı haqqında bir neçə rəvayət var.
Bir rəvayətə görə, onun 3 min şeiri
varmış: «Bir divan
halında toplanmış bu şeirlər
Molla Qasım adlı bir
xocanın əlinə keçir. Molla Qasım şeirləri oxuyur,
şəriətə uyğun görmədiklərini
yandırırmış. Min dənə şeir yandırdıqdan sonra
usandığı üçün minini də suya atmağa başlayır. Üçüncü
minə başlayınca aşağıdakı beytlə
qarşılaşır:
Dərviş Yunus, bu sözü
əyri-buyru söyləmə,
Səni
sığaya çəkən Molla
Qasım gəlir.
Bu beyti oxuyar-oxumaz Molla Qasım Yunus Əmrənin ərənlərdən olduğuna və kəramətinə
inanır, divanı öpüb
başına qoyur. Ancaq
artıq gec olur. Çünki onun əlində
cəmi min şeir
qalıbmış».
Tanınmış
Azərbaycan ədəbiyyatşünası Salman
Mümtaz hələ 1929-cu ildə
yazdığı bir məqalədə Yunus Əmrə və Həsənoğlunun
çağdaşı olan Molla Qasımın XIII yüzildə
yaşamış Azərbaycan şairi olduğunu qeyd edib: «Molla
Qasımdan ədəbiyyatımıza iki
təcnis və bir şeir
yadigar qaldığını yazan Mümtaz bu şeirlərin birinə Yunis
Əmrənin nəzirə yazdığını da qeyd edib,
Molla Qasımın və Yunus
Əmrənin şeirlərini məqalədə nümunə
olaraq göstərib. Hazırda Yunis Əmrənin elm aləminə
iki əsəri məlumdur. Bunlardan biri bütün şeirlərindən ibarət
divanı, digəri isə «Öyüdlər kitabı»
adlı əsəridir. Bu əsər 573 beytlik məsnəvi olmaqla
şairin görüşlərini əks
etdirən nəsihətlərdir».
1957-ci ilin mayından başlayaraq
Türkiyənin Əskişəhər adlı şəhərində
«Uluslararası Mədəniyyət və Sənət həftəsi»
adlı Yunus Əmrəni anma
proqramları keçirilir. YUNESKO-nun qərarı ilə 1991-ci il bütün dünyada Yunus Əmrə
ili elan olunmuşdu.
Araşdırmaçının
fikrincə, təsəvvüf yoluna qədəm
qoymuş Yunus Əmrə
türk xalq ədəbiyyatının,
türk düşüncə və təkkə
(təsəvvüf) ədəbiyyatının ilk
böyük şairidir:
«Təsəvvüfə görə, kainatın tamamı
Tanrının təcəllisidir. Bu inancla ikilik ortadan götürülür,
yaradan ilə yaradılan birləşmiş
olur. Kamil insan Tanrıya qovuşmaq,
onun varlığında olmaq
istəyir ki, buna «vəhdəti-vücud»
deyilir».
Yunus Əmrə şeiriyyəti
insanın özünə, ruhuna bələdliyi
baxımından yaxşı bir mənəvi
soraqdır. Onun məşhur – «Məni məndə demə, məndə
deyiləm, Bir mən vardır məndə
məndən içəri» – məşhur fikri
insanın özündəki mövcud vəziyyəti
ilə kifayətlənməməyə, onu
daxili dünyasının sirlərinə baş vurmağa
çağırır. Bu, əslində
insanın gerçəklikdən üstün
halıdır.
Türk-aşıq
ədəbiyyatının XVII yüzildə yaşamış
tanınmış aşıqlarından biri
Qaracaoğlandır. Uzun illər ərzində
onun həyatı haqqında elm aləmində az məlumat
olub. Bu məlumatların
da çoxunu rəvayətlər
təşkil edib. Onun
həyatı, şeirləri, yaşadığı dövr, anadan olduğu yer və il alimləri çox məşğul
edib. Qaracaoğlanın 1606-cı ildə anadan olduğu, 1676 və ya 1689-cu illərdə vəfat etdiyi
söylənilir. Harda doğulub,
harda ölməsi, adı, nəsli
haqqında həqiqətə bənzəyən bir çox rəvayətlər
mövcuddur. Bir çox tədqiqatçılar yaşlı
insanların söylədiklərinə əsaslanaraq
Qaracaoğlanın Kökçeeldə anadan
olduğunu, Xocaoğulları dərəbəyliyi
zamanı onu öldürmək istədiklərini
xəbər tutarkən Ban şəhərinə
getdiyini yazırlar. Haqqında yazılan başqa rəvayətə görə, Əskiyurdunda
Kılıclı bəylərindən birinin
arvadı ilə aralarında məhəbbət macərası
olduğu üçün
onu öldürmək istəyiblər. O, iki bacısı ilə obasından
qaçıb, bir çox
yerləri gəzərək Ərzuruma qədər gəlib, ömrü boyu evlənməyib,
orada da ölüb. Başqa bir rəvayətə görə isə Qaracaoğlan Bahçelli
ilçəsinin Varsaq kəndində anadan olub: «Bu, bir həqiqətdir ki, Qaracaoğlan
aşıq ənənənələrinə uyğun
olaraq sazı və sözü
ilə Osmanlı imperatorluğunun Konya, Mardin, Karaman, Adana, Diyarbəkir,
Hələb, Misir, Tokat,
Ankara, Bursa, Sivas kimi yerlərin kənd
və yaylalarına qədər gəzib-dolaşıb, hər
yerdə şairlik və aşıqlıq
gücünü göstərib. O, öz adının gah Hasan, gah
da Xəlil, Qaracaoğlanın isə təxəllüsü
olduğunu şeirlərində ifadə edib. Şeirlərində Dunay
boylarından, Avstriya müharibələrinə
qədər söz etdiyinə görə,
onun Osmanlı imperatorluğunun
qərb hüdudlarına, hətta xarici
ölkələrə də getdiyi ehtimal olunur. Onun doğulduğu yer kimi adı, soyadı, öldüyü yer və
dəfn edildiyi məkan dəqiq olaraq bilinmir və müxtəlif
rəvayətlərlə izah edilir. Məsələn, bu
rəvayətlərdən birində deyilir
ki, Qaracaoğlan
Maraşın Cezel yaylasında 96
yaşında ölüb, vəsiyyətinə
görə tənha bir bulaq
başında dəfn olunub. Sazı
çürüyənə qədər baş
tərəfində ağacdan asılı
durduğu söylənilir».
Onun həyatı və
yaradıcılığı haqqında ilk
dəfə türk ədəbiyyatının
qurucularından olan Fuad
Köprülü 1915-ci ildə «Türk-saz şairləri» adlı kitabında
bəhs edib. Qaracaoğlan
sağlığında belə məşhur olub,
onun şeirlərinə türkülər
oxunub. Bu türkülər
bütün Anadoluya, İstanbula, Azərbaycana, Krıma və
Rumelindən Dunaya qədər
yayılıb. Sorağı hər tərəfə yayılan
şeirlərinə türkülər söylənən
Qaracaoğlanın şeirlərindən ikisinin
hələ sağlığında nota
alındığını tədqiqatçılar
yazmaqdadırlar. Onun şeirlərində
məhəbbət, təbiət və qürbət
lirikası güclüdür. Onun eşq şeirlərində
bəşəri eşq ən yüksəkdə
durur: «Qaracaoğlanın məhəbbət
şeirlərində ayrılıq mövzusu
da var. Həmçinin
onun şeirlərində idealizə edilmiş eşq
anlayışı ilə yanaşı ilahi
eşq, yəni Allah eşqi, gerçək eşq
anlayışı da var.
Şairin yaradıcılığında
zəmanədən, özündən və könlündən
şikayət motivləri güclüdür.
Zəmanədən şikayət bəzən dünyadan,
fələkdən şikayət şəklində,
özündən, könlündən şikayət isə
çəkdiyi peşimançılıq, etiraf
şəklində ifadə olunur.
Yaradıcılığında təbiətin təsvir və
tərənnümü də əsas yer tutur. Təbiət onun
şeirlərində təkcə seyr edilən
bir mənzərə olmayıb, yaşanan bir məkandır.
Təbiətin hər bir çiçəyi,
bitkisi, ağacı, daşı, quşu onun
duyğularını anladan bir vasitədir. Qaracaoğlanın şeirlərindən
gördüyü və
yaşadığı həyat canlı şəkildə təsvir
edilir. O, xalqın adət-ənənəsini,
etnoqrafiyasını şeirə gətirib, onu
dupduru xalq dili ilə ifadə edib».
Qaracaoğlan xalq dilinin incəliklərini, gözəlliklərini
bütün təravəti ilə şeirə
gətirdiyi kimi, heca vəznində
ən yayğın və klassik formada şeirlər yazıb:
«Türk-aşıq şeirində varsağı deyilən zaman Qaracaoğlan
xatırlanır. Türk-xalq ədəbiyyatında
məhəbbət mövzusunu ən çox işləyən Qaracaoğlan
olduğu kimi, XVII yüzil aşıq ədəbiyyatında daha çox gözəlləmələr
yazan da o olub. Onun
istifadə etdiyi nəzm şəkillərindən
biri də qoşmadır.
Aşığın tədqiqatçılarının
yazdığına görə, onun
yazdığı 500-dən çox şeirin 322-si qoşma
biçimində olmaqla yanaşı bu şeirlər klassik qoşma şəklinin ən mükəməl
nümunələrindəndir».
Uğur
Xalq Cəbhəsi.-
2012.- 23 iyun.- S.14.