«Babək azadlığımızın simvoludur»

Əzizağa Ələkbərov: «Babək xalqımızın azadlığı uğrunda canından keçən qəhrəmanımızdır»

Xalqımızın azadlığı uğrunda canını fəda etmiş yenilməz sərkərdə Babəkə heykəl qoyulması məsələsi gündəmdədir. Ziyalılar Babəkə Bakının ən gözəgəlimli yerində heykəl qoyulmasının tərəfdarıdır. Tanınmış tarixçi alim Əkrəm Rəhimli Babəkin tarixi taleyimizdə, xalqımızın azadlığı yolunda gördüyü möhtəşəm işlərdən danışır: «Babəkə heykəl qoyulması məsələsi olduqca gərəklidir. Babək xalqımızın qəhrəmanıdır. Babəki birmənalı şəkildə belə dəyərləndirmək olar. Yəni xalqımızın istiqlaliyyət tarixi böyük mənada Babək hərəkatından başlayıb. Babəkin adı Azərbaycanın istiqlaliyyəti ilə qoşa çəkilən bir addır. O, yadellilərin Azərbaycandakı özbaşınalığına, talançılığına, zorakılığına qarşı xalq hərəkatının başında duran böyük sərkərdədir. Babək azadlığımızın sönməz bir simvoludur. Burada bir məqamı vurğulamaq istərdim: Babəkin Bakıda heykəlinin ucaldılacağı ilə bağlı məsələ olduqca qürur doğuran hadisədir. Bu, təkcə Quzey Azərbaycandakı soydaşlarımız üçün yox, həm də Güney Azərbaycanda yaşayan çoxmilyonlu soydaşlarımız üçün böyük bir təntənə olacaq. Məlumdur ki, Güneydə yaşayan soydaşlarımız illərdir ki, Babək qalasına yürüş edirlər. Əslində bu yürüş Güney Azərbaycanın azadlıq, istiqlaliyyət yürüşüdür. Onun öz milli varlığına qayıtmasıdır. Bu yürüş öz çərçivəsini o dərəcədə genişləndirdi ki, axırda İran rejiminin başçılarını vahiməyə saldı. Artıq neçə ildir ki, qalaya gedən yolu bir neçə həftə əvvəldən bağlayırlar. İran inqilabının ilk illərindən belə insanlar qalanı ziyarət edir, istiqlal ruhlu mahnılar oxuyurdular. Yəni xalq öz istəyini orada ifadə edirdi. Rejim başa düşdü ki, xalqın bu istəkləri tədricən milli istiqamətə doğru gedir, ona görə də Babək qalasını ziyarəti qadağan etdilər. İranda ermənilərin hansısa keşişinin ölümü gününün qeyd edilməsinə qarşı isə problem yaratmırlar. Hər il bu məqsədlə İrana minlərlə erməni gəlir, günlərlə orada qalırlar. Dövlət məmurları onların qayğılarını çəkirlər. Ancaq Babək qalasını ziyarət etməyə imkan vermirlər. Çünki Babəkdən qorxurlar. Babəki müxtəlif adlarla xalqın gözündən salmaq istədilər. Ancaq istəklərinə nail ola bilmədilər. Babək qalasını ziyarətlə bağlı çəkilən videolar göstərir ki, xalqımız öz qəhrəmanını çox sevir. Ona görə də Babəkə bu səviyyədə münasibət bizim milli kimliyimizə qayıtmağımızın təsdiqidir. Azərbaycan istiqlaliyyətinin təsdiqində möhtəşəm iş görmüş Babəkin xüsusən yeni nəslə təqdim olunması gərəkdir».

Ə.Rəhimlinin fikrincə, Güney Azərbaycanda elə bir soydaşımız tapılmaz ki, Babəkin Bakıda heykəlinin qoyulmasına soyuqqanlıqla yanaşsın: «Babəkin Bakıda heykəlinin qoyulması xalqımızın böyük sevinci olacaq, xalqımızın milli kimliyinə qayıtmasında böyük rol oynayacaq. Bu hadisəni ürəkdən alqışlayıram. Həmişə düşmənlərimiz müxtəlif bəhanələrlə qəhrəmanlarımızı gözdən salmağa çalışıblar. Babək habelə bütün Türk Dünyası üçün də Azadlıq simvoludur. Babək mövzusunun, onun başçılıq etdiyi hərəkatın haqqında dərsliklərimizdə daha aydın təsəvvür yaradılmalıdır. Babəki yeni nəslə yenilməz milli qəhrəman kimi tanıtdırmaq gərəkdir. Təkcə orta məktəblərdə yox, dram əsərlərində, musiqidə və b. bu mövzuya dönə-dönə qayıtmaq gərəkdir. Geniş tədqiqat və təbliğat işləri aparılmalıdır. Ermənilər olmayan qəhrəmanlarını şişirdib onu «milli qəhrəman» kimi özlərinə və dünyaya sırıyıblar, cəfəngiyyatlarına inandırmaq istəyiblər. Ancaq biz Azərbaycanın azadlığı uğrunda illərlə mübarizə aparmış bir qəhrəmanımızı istənilən səviyyədə təqdim edə bilməmişik. Əgər keçmişimizi qiymətləndirə bilməsək, gələcəyimiz də qaranlıq ola bilər».

Tarixçi-alim Əzizağa Ələkbərov deyir: «Babək – xalqımızın azadlığı uğrunda 20 ildən çox mübarizə aparan, bu yolda canından keçən qəhrəmanımızdır. Babək böyük şəxsiyyətdir. Nə qədər ki, torpaqlarımızın 20 faizi işğal altındadır, xüsusən belə bir zamanda Babək mövzusuna dönə-dönə qayıtmalıyıq. Babək Azərbaycan torpağının ərəb əsarətinə düşməməsi uğrunda mübarizə aparıb. Azadlıq meydanında Babəkə heykəl qoyulması istəyi yaxşıdır, ancaq hesab edirəm ki, Babəkin keçmiş Kirovun heykəlinin yerində möhtəşəm heykəlinin qoyulması gərəkdir. Babək Azadlıq uğrunda mübarizə apararaq şəhid olmuş qəhrəmanımızdır. Babəkin ruhu Şəhidlər Xiyabanında azadlıq uğrunda mübarizə apararaq canından keçmiş insanlarımızla birdir. Hər bir xalqın var olmasında qəhrəmanları xüsusi rol oynayır. Babək gerçəkdən möhtəşəm hünərlər göstərmiş qəhrəmandır. Mənə elə gəlir ki, qəhrəmanlarımızı hələ istənilən səviyyədə özümüzə və dünyaya tanıtmamışıq. Qəhrəmanlarımız həmişə bizə örnək olub, bundan sonra da elə olmalıdır. Babəkin Azadlıq mübarizəsinin ruhunu həmişə ürəyimizdə yaşatmalıyıq. Bu gün Babək mövzusundan güc almağımız çox gərəklidir. Qoy gəncliyimiz Babəki yaxından tanısın, onunla fəxr etsin».

Uğur

Xalq Cəbhəsi.- 2012.- 28 mart.- S.11.