«Hüquq
məsləhətxanalarının fəaliyyətini qənaətbəxş
saymıram»
Əlövsət Allahverdiyev:
«Hüquq məsləhətxanalarının fəaliyyəti vətəndaşların
maraq və mənafelərinə zidd olmamalıdır»
Demokratiyanın
əsas göstəricilərindən biri də ölkədə
vətəndaş cəmiyyətinin formalaşmasıdır.
Müstəqillik yolunu seçən Azərbaycanın da əsas
hədəfi belə bir topluma nail olmaqdır. Bütün
demokratik prinsiplərin ödənildiyi vətəndaş cəmiyyətinin
formalaşması isə yalnız bu sahənin
inkişafında maraqlı olan və çalışan vətəndaşlardan
deyil, başqa bir neçə amildən də
asılıdır. O cümlədən də hüquq və
qanunvericilik sivil toplumu şərtləndirən mühüm
sahələrdən biri sayılır. Ölkədə
qanunverilik və hüquq sisteminin səviyyəsi vətəndaş
cəmiyyətinin formalaşmasında əhəmiyyətli rol
oynayır. Qanunlar belə bir toplumu qurmaq istəyən vətəndaşlara
imkanlar və fürsətlər verir. Çünki vətəndaşın
istənilən fəaliyyəti və hədəfi dövlət
qanunvericiliyindən kənara çıxmamalıdır. Bu səbəbdən
də qanunlar vətəndaş cəmiyyətinin
inkişafına nə qədər imkan verirsə, vətəndaş
da o qədər hədəfə nail ola bilər.
Maraqlıdır, bəs görəsən Azərbaycan
qanunvericiliyi ölkədə vətəndaş cəmiyyətinin
inkişafı üçün kifayət qədər
müasir və təkmildirmi? Qanunlar toplumda demokratik prinsiplərin
təmin olunması üçün yetərlidirmi? Bu yolda irəliyə
can atan ölkəmizdə demokratik və quruculuq mənzərəsi
necədir? Əhəmiyyətini nəzərə alıb vətəndaş
cəmiyyəti və hüquq mövzusunu araşdırmaq istədik.
Suallarımızı hüquqşünas Əlövsət
Allahverdiyevə ünvanladıq.
- Azərbaycanda
vətəndaş cəmiyyətinin inkişafını necə
dəyərləndirərdiniz?
- Vətəndaş
cəmiyyəti qeyri-dövlət münasibətlərinin məcmusu
olduğundan onun formalaşması prosesi bir qədər
mürəkkəbdir. Odur ki, bu proses zamanla tənzimlənir.
Azərbaycanda vətəndaş cəmiyyəti
quruculuğunun başlama tarixi o qədər də
böyük deyil. Bu səbəbdən ölkəmizdə vətəndaş
cəmiyyətinin arzuedilən səviyyədə olması
üçün məyyən zaman lazımdır. Vətəndaş
cəmiyyəti nədir? Vətəndaş cəmiyyəti
qeyri-dövlət iqtisadi, siyasi, sosial, mədəni-mənəvi,
dini-əxlaqi, ailəvi, milli və b. münasibətlərin məcmusu
olub azad vətəndaşların və könüllü
formalaşmış təşkilat və assosiasiyaların
dövlət-hakimiyyət orqanları tərəfindən
onların fəaliyyətlərinə birbaşa müdaxilələri
və özbaşına reqlamentləşdirmələri
qanunla məhdudlaşdıran özünümüdafiə
sferasıdır. Təbii ki, bu prosesi ilk növbədə
dövlət qəbul etməli və şərait
yaratmalıdır, ikinci növbədə vətəndaşlar
bu prosesi düzgün dərk edib onu tətbiq etməlidirlər.
Bu halda onun cəmiyyət üçün əhəmiyyəti
olacaq. Ölkəmizdə də vətəndaş cəmiyyəti
formalaşıb, sadəcə onu inkişaf etdirmək hər
bir vətəndaşın məsuliyyəti və vəzifəsidir.
- Vətəndaş
cəmiyyətinin inkişafında qanunvericiliyin hansı rolu
var?
- Vətəndaş
cəmiyyəti sırf bazar münasibətlərinin və rəsmi
hakimiyyətlə eyniləşdirilməyən digər fəaliyyət
formalarının sinonimi kimi dərk olunur. Vətəndaş
cəmiyyəti o insanların demokratik cəmiyyətidir ki,
orada insanlar nəyəsə malik olsunlar. Vətəndaş cəmiyyətinin
inkişaf etməsində təbii ki, qanunvericiliyin
mühüm rolu var. Qanunvericilik nə qədər təkmil,
ümumbəşəri dəyərlərə əsaslanarsa,
ölkədə bir o qədər vətəndaş cəmiyyətinin
inkişafı sürətlənər. Daha dəqiq desək,
hər bir ölkədə qanunvericilik vətəndaş cəmiyyətinin
formalaşmasını əngəlləməyə deyil,
inkişafına şərait yaratmalıdır.
-
Ölkəmizdə vətəndaş cəmiyyətinin inkişafı
üçün qanunvericiliyin kifayət qədər təkmil
və müasir qəbul etmək olar?
-
İstənilən bir ölkənin qanunvericiliyini tənqid
edib orada çatışmayan cəhətləri göstərmək
olar. Bununla belə, ölkəmizin qanunvericiliyini kifayət qədər
təkmil və müasir sayıram. Azərbaycan qanunvericiliyi
hazırlanan zaman milli adət-ənənələrlə
yanaşı, beynəlxalq hüquq normaları gözlənilib
və onun müddəaları əsas götürülüb.
-
Qanunlarımız vətəndaşların bütün
hüquqlarını təmin edə bilir?
-
İnsan və vətəndaş hüquq və
azadlıqları Azərbaycan Respublikasının
Konstitusiyasında əks olunub. Konstitusiyanın III fəsli
bütövlüklə əsas insan hüquq və
azadlıqlarına həsr edilib. Demək olar ki, İnsan
Hüquqları haqda Bəyannamə və insan
hüquqlarına dair digər beynəlxalq aktlarla müəyyən
edilən əksər hüquq və azadlıqlar bu
Konstitusiyada təsbit olunub.
-
Qanunlarımızda vaxtaşırı dəyişikliklər
və əlavələr olur. Bunu necə dəyərləndirərdiniz?
-
Qanunlarda dəyişikliklərin olması normal haldır. Bu
qanunların təkmilləşməsi, qanunlarda olan
boşluqların aradan qaldırılması məqsədilə
aparılır.
-
Qanunlarımızda parlament və referendum yolu ilə əlavə
və dəyişikliklər edilir. Hansı hallarda qanun
ümümxalq səsverməsi ilə dəyişdirilməlidir?
- Azərbaycan
Respublikasında yalnız iki məsələ referendumla qəbul
olunur. Birinci Konstitusiyanın qəbulu və ona dəyişikliklərin
edilməsi, ikinci isə sərhədlərin dəyişdirilməsi.
Bundan başqa, hər hansı bir məsələ referenduma
çıxarılmır. Azərbaycan Respublikasının
Konstitusiyasına görə qanunlar yalnız Milli Məclis tərəfindən
qəbul olunur.
- Vətəndaş
bütün qanunlardan xəbərdar olmalıdır?
-
İlk növbədə vətəndaşlar öz
hüquqlarını bilməlidir. Əgər sivil cəmiyyətdə
yaşayırıqsa, o zaman hər kəs
hüquqlarını bilməldir. Hüququnun pozulduğunu
iddia edən vətəndaş, ilk növbədə, bu
hüququn nədən ibarət olduğunu bilməlidir. Vətəndaşlar
öz hüquqları bilməli, eyni zamanda onun həyata
keçirilməsini qanun çərçivəsində tələb
etməlidirlər. Bununla yanaşı, təbii ki, vətəndaşlar
qanunları da bilsə yaxşıdır. Qanunları bilən
vətəndaşlar süründürməçilik və problemlərlə
üzləşmirlər, hətta belə bilgili insanlardan vəzifəli
şəxslər də ehtiyat edir, onun hüquqlarını
pozmaqğa cəhd etmir. Bir halda var ki, qanunu bilməmək
insanı məsuliyyətdən azad etmir. Vətəndaş
qanunu bilmədiyi halda onun qadağan etdiyi əməlləri çox
sərbəst formada həyata keçirirlər ki, bu da cəmiyyəti
müəyyən problemlərlə üzləşdirir.
- Məsələn,
Mülki və ya Cinayət məcəllələri ilə
tanış olmaq istəyən vətəndaş hara
müraciət edə bilər?
-
Bunun üçün harasa müraciət etməyə ehtiyac
yoxdur. Hər iki məcəllə həm kitab şəklində
satılır, həm də internetdə istifadə
üçün yerləşdirilib. Məncə, bu iki vasitədən
istifadə etməklə adıçəkilən məcəllələrlə
tanış olmaq olar. Düşünürəm ki, bununla
bağlı hər hansı bir problem olmamalıdır.
- Vətəndaş
cəmiyyətinin inkişafında hüquq məsləhətxanalarının
fəaliyyətini necə dəyərləndirərdiniz?
-İnsanların
maariflənməsində, onların hüquqlarının
qorunmasında hüquqşünasların üzərinə
böyük iş düşür. Ölkəmizdə
insanların hüquqlarını müdafiə etmək
üçün kifayət qədər hüquqşünas
var və bunların da bir çoxu hüquq məsləhətxanalarında
fəaliyyət göstərir. Hüquq məsləhətxanaları
da təbii ki, qanun çərçivəsində fəaliyyət
göstərməlidir, eyni zamanda onların fəaliyyəti vətəndaşların
maraq və mənafelərinə zidd olmamalıdır.
Müasir dövrdə hüquq məsləhətxanalarının
fəaliyyətini qənaətbəxş saymıram. Bizdə
vəkillik institutunun formalaşması üçün müəyyən
zaman lazımdır. Öncə hər kəs vəkil nədir
və vəkillik fəaliyyəti nədən ibarət
olmalıdır. Vəkillər də başa düşməlidir
ki, hüquqi yardıma ehtiyacı olan insan taleyini, həyati məsələlərini
ona etibar edir, ona inanır. Bu da çox ciddi və
vicdanlılıq tələb edən məsələdir.
-
Hüquq məsləhətxanalarında xidmət ödənişlidir?
- Mən
onun üçün deyirəm ki, bizdə hələ vəkillik
institutu formalaşmayıb. Bilirsiniz, müdafiəyə
ehtiyacı olan şəxs hüquqi yardım göstərilməsi
üçün hüquq məsləhətxanasına
müraciət edir və müxtəlif qiymətlərlə
üzləşirlər. Düşünürəm ki, burada
bir qayda olmalıdır. Yəni vətəndaş vahid qayda
üzrə ödəmələr etməlidir.
-
Hüquq məsləhətxanalarına istənilən şəxs
müraciət edə bilər?
- Əlbəttə
ki, hər kəs hüquq məsləhətxanasına
müraciət edə bilər. Burada hər hansı məhdudiyyət
yoxdur.
- Nə
üçün bəzən vətəndaşlar qanunlara
etimad göstərmirlər?
- Bu
çox ciddi məsələdir. Bunun bir səbəbi var. Vətəndaşlar
qanunun tələblərindən daha çox asan yollara üz
tutmağı üstün hesab edirlər. Məsələn, hər
hansı bir proses qanunla bir aya həyata keçirilirsə, vətəndaş
onu bir günə başqa yollarla həll etməyə
çalışır. Təbii ki, bu doğru yol deyil. Hər
kəs qanunun tələblərinə riayət etməli, ən
əsası qanunlara hörmət etməlidir.
-
Qanunvericiliyimizə yeni qanunlar qəbul edəndə, xüsusən
də Avropa Birliyinin (AB) tələbidirsə, milli-mənəvi
dəyərlərimiz nəzərə alınır?
-
Yeni qanunlar qəbul edilən zaman bütün hallarda milli-mənəvi
dəyərlər nəzərə alınmalıdır.
İstər Avopa Birliyinin, istərsə də digər beynəlxalq
qurumların tələbi olsun bu dəyərlər birmənalı
olaraq gözlənilməlidir. Gördüyünüz kimi,
bizim qanunlar da qəbul ediləndə bizə məxsus dəyərlər
gözlənilib və beynəlxalq hüquq normaları ilə
uyğunlaşan qanunlarımız qəbul olunub.
- Bir
neçə dəfə cinsi azlıqların nikahı ilə
bağlı da müzakirələr oldu. Necə hesab edirsiniz,
belə bir hal Azərbaycanda nə vaxtsa qanun şəklinə
salına bilərmi?
- Bu
barədə nəsə demək tezdir. Bunu zaman göstərər.
Hər şey mümkündür. Sadəcə bu barədə
nəsə demək istəməzdim.
Real Cəfərli
Xalq Cəbhəsi.- 2012.- 15 may.- S.10.