«Qələmin yaşı olmur»
Fərqanə
Mehdiyeva: «İstedadlılar sakitcə yazılarını qoyub
gedirlər, zəif yazarlar isə iddia edirlər ki, şeirləri
tez çap olunsun»
Şairə
Fərqanə Mehdiyeva Salyan rayonunun Ərəbqardaşbəyli
kəndində anadan olub. Pedaqoji İnstitutun (indiki ADPU-nun)
filologiya fakültəsini bitirib. 4 kitab müəllifidir.
Hazırda «Ulduz» jurnalında poeziya şöbəsinin
redaktorudur.
-
İctimai-bədii mühitdə onillərdir tanınan «Ulduz»
jurnalında çalışmaq şübhəsiz,
yaradıcı mühiti dərindən
tanımağınıza kömək edir. Maraqlıdır,
çağdaş Azərbaycan ədəbiyyatının
durumu sizdə hansı qənaətlər yaradır?
-
Konkret fikrim odur ki yaxşı, oxucunu titrədən şeir
janrından asılı olmayaraq həmişə oxucular tərəfindən
maraqla qarşılanır. Düzdür, indi modern şeirlər
daha çox dəbdədir, ancaq şeirin dəbi olmur. Əsas
odur ki, şeir ürəklə yazılsın.
Şeirin
konkretliyi müəllifin onu istedadıyla, ürəyilə
yaratmasındadır. Əslində şeir konkret olaraq istedadla
ürəyin məhsuludur.
«Ulduz»
jurnalının redaksiyasına yaşından asılı
olmayaraq müəlliflər müraciət edir.
İstedadlılar sakitcə yazılarını qoyub gedirlər,
zəif yazarlar isə iddia edirlər ki, şeirləri tez
çap olunsun. Hətta 30-40 şeirinin birdəfəyə
çap olunmasını arzu edənlər də olur. Biz
çalışırıq ki, müəlliflər narazı
getməsin. Bilirsiniz, hər kəsin bir taleyi var. Birinin pulu,
var-dövləti başından aşır, elələri də
var ki, sadəcə, yazdıqları şeirlə nəfəs
alırlar. Onsuz da onlardan nə qədər yaxşı
şeir tələb etsən də, ondan
yaxşısını yazmayacaqlar. Ancaq yaxşı şeir həmişə
oxucular tərəfindən sevilib, seviləcək də.
- Azərbaycan
poeziyasında heca və əruz janrının hər birinin
özünəməxsusluğu ortadadır: hecada daha çox
zəriflik, əruzda isə daha çox sanbal, əzəmət
var. Gələcəkdə bu birlikdə yeni şeirlərin
yaranmasına ciddi gərək var.
-
Şəxsən mənim üçün bu janrların fərqi
yoxdur. Hansı janr olur-olsun, şeir gözəl yaransın,
hamısı aktualdır. Onu da deyim ki, indi gənclər sərbəst
vəznə daha çox üstünlük verirlər.
- Son
zamanlar «Ulduz» jurnalının sayları gənclərə
etibar edilir. Bu eksperiment nə dərəcədə
özünü doğruldur?
- Bu,
AYB rəhbərliyinin, həm də «Ulduz»un baş redaktoru
Elçin Hüseynbəlinin ürəyinin cavabıdır. Gənclər
orada necə deyərlər, «öz məharətlərini»
göstərirlər.
Adətim
üzrə şeir yazıram, mütaliə edirəm. Son
zamanlar nəsr əsərləri oxumağa daha çox
üstünlük verirəm. Elçin Huseynbəylinin,
Meyxoş Abdullahın, Mahirə Abdullanın, Aqil Abbasın
kitablarını oxumuşam. Düşüncələrim
çalxananda Kürün sahilində keçən
uşaqlıq illərimi xatırlayıram…
Bir
mahnıdan bir beyt yadıma düşdü: «Kür hər an
xəyaldadır ilin yaz-yay ayında». Düşünürəm
ki, onda uşaq idim, atalı- analı idim, torpaqlarımız
bütöv idi, ürəyimiz bu qədər
parçalanmamışdı.
Gündəlik
qayğılarımla, zamanla çarpışıram:
Nə
oyanlıq ollam, nə də bu yanlıq,
Nəyə yarayaram bu təbim
ilə?
Zəmanə havamı elə
çaldırır,
Qalxıb oynayıram əsəbim ilə.
Misra göyərdirəm ətim-qanımla
Payız buludu tək boşallam-dollam.
Şeirin
ucbatından ölən
canımla
Özüm öz evimdə kirayə qallam.
- Ədəbiyyatda orta
nəslin nümayəndəsi
sayılırsınız. «Aralıqda qalmaq» sizi narahat etmir
ki?
- Düşününürəm ki, hər dövrün
öz gözəlliyi
var. Ümumiyyətlə, qələm
adamları həmişə
çırpına-çırpına yaşayırlar. İstedadlı gənclərimiz çoxdur. Ancaq gərək gənclər
də böyüklərə
hörmətlə yanaşsınlar.
İstər bizim nəsil,
istərsə də bizdən əvvəlki nəsil həmişə çalışmışıq ki, böyüklərdən
nə isə öyrənək. Ümumiyyətlə,
insan həmişə
öyrənməyə can atmalıdır.
Hətta
yeri gəlsə, özündən kiçiklərdən
də. Mənə elə gəlir
ki, qələmin yaşı olmur.
- Ailə və yaradıcılıq: şübhəsiz,
qadın üçün
yaradıcılıqla məşğul
olmaq daha çətindir.
- Elədir, çox çətindir qadın üçün. Kişi yazar
hardasa sərbəstdir.
Gərək ailəni də,
sənəti də elə saxlayasan ki, tərəzinin gözü əyilməyə.
Bunun üçün
də ömrünü
sənətinə qurban
verməlisən: yemək
yana bilər,
paltar ütüsüz
qala bilər və s. Şükür, mən çox danlanmıram. Ailə qayğısını da şeir kimi
çəkirəm.
- Üzü qışa gedirik. Yaradıcı üçün hesab edirəm, bütün fəsillər
ilahi təb yaratmağa qadirdir. Təbin qaynağı isə insanın özüdür…
- Əslində mən
payızı çox
sevirəm. Payız düşüncələrimin,
duyğularımın, baxışlarımın
fəslidir. Qışın soyuğundan çox adamların soyuq baxışlarından qorxuram.
Bir şeirim var:
Bir az yağış,
bir az qaram,
Əriyirəm qram-qram.
Soyuqdan elə qorxmuram,
Adam adamı üşüdür.
- Mən inanıram ki, insan imkan
etibarilə zamandan üstündür. Yaradıcı insanlarda bu imkan
daha geniş olur.
- Şairlər heç vaxt zamana sığışmayıblar:
Yesin ürəyini, ölsün
acından,
Tək sözə
söykənsin ehtiyacından.
Edam kötüyündən, dar
ağacından,
Gərək ayrılmasın şairin
başı…
Yazlıq ruhu şairlik deyil. Şair yaza vurğun ola
bilər, ancaq yaz ruhunda ola
bilməz.
Bahara gendən baxır,
Payızı, qışı olur.
Dünyada şirin nə var,
Dadmağa naşı olur,
Şairin yaşı olmur.
Uğur
Xalq Cəbhəsi.- 2012.- 29 noyabr.- S.14.