Uşaq hüquqlarının
qorunması prinsipləri
Hər bir uşaq doğulduğu andan etibarən cəmiyyətin bərabərhüquqlu üzvü sayılır
Hüquqi dövlət quruculuğunda sağlam ruhlu vətəndaşın yetişdirilməsi xüsusi əhəmiyyət daşıyır. İnsana, xalqa, dövlətçiliyə münasibətində ciddi, təəssübkeş, insanlığın
qaydalarına əməl edən şəxslərin varlığı cəmiyyətin özülü sayılır. Yaxşı insanlar yaxşı cəmiyyət yaradırlar. Təbiidir ki, insanların tərbiyəsi ilə uşaqlıqdan məşğul olduqda istənilən bəhrəni verə bilər. Uşaq tərbiyəsi ilə məşğul olmaq isə olduqca çətindir.
Hər il iyunun 1-i Uşaqların Beynəlxalq Müdafiəsi günü kimi qeyd olunur. Ancaq hələ ki, dünyada uşaqların müdafiəsi problemi həll olunmayıb. Əgər dünyada qan-qada, müharibə gerçəkliyi qalırsa, uşaqların hansı beynəlxalq müdafiəsindən danışıla bilər? Dünyada insan alveri tüğyan edir. İnsan alverinin əsas hədəfi isə uşaqlar və qadınlardır.
Dövrümüzün gərginlikləri artdıqca uşaqların təlim və tərbiyəsi sarıdan problemlər də getdikcə düyünə düşür. Bütün tərbiyə haqqında deyilənlər əksər hallarda sözdən o yana getmir.
Heç bir insan anadan bilikli, kamil doğulmur. Ona görə
də hər bir insan məktəb keçir, müəllimlərdən
təhsil alır, onda həyat, insani münasibətlər, təbiət,
dünya haqqında təsəvvürlər yaranır,
möhkəmlənir. Zaman-zaman dünya
filosofları elm, təhsilin əhəmiyyəti, öyrənilməsi
qaydaları haqqında fikirlər söyləyiblər. O
deməkdir ki, təhsilin mayasında ilk növbədə inam
durur. Ümumiyyətlə, inam olmasa, insan
addım ata bilməz. İnanırsan ki,
yeriyirsən, inanırsan ki, oxuyursan, oxuduğuna inanırsan.
Bilik insana məhz insanilik üçün,
özünü əvəzsiz, müstəqil varlıq olaraq təsdiq
etmək üçün gərəkdir. İnsanilik
tələbi insanı Vətənə sevgi üstə
kökləyir.
Təhsilin
xüsusən uşaqların, gənclərin həyatında
rolu təkcə
sistemli
bilgi verməkdənmi ibarətdir? Hədən
bu gün məktəbə münasibət əvvəlki kimi
ehtiraslı deyil? Bu gün hətta ən
imkansız ailə belə balasına məktəbli
forması, dəftər-kitab alır, qarnını birtəhər
doydurur. Ancaq hamı məhz əvvəlki
onillərin təhsilini nostalji ilə xatırlayır. Səbəbi hər şeydən əvvəl insan
xarakterinin biryolluq köklənməməsi ilə
bağlıdır. Əvvəla, adam
xarakteri elədir ki, o, daim təzəlik axtarır, habelə
yaşanmışları idealizə etmək təzə
söhbət deyil. Adamların ömrü bu
gün sanki dairədə ilişib qalıb, cəmiyyətdə
imkanlılarla yanaşı imkansızların da
çabaları sonda böyük fərəhə aparıb
çıxarmır. Təhsil adamlara tam
çıxış yolu göstərə bilmir, mənimsənilmiş
biliklər insanın yenilməz
dünyabaxışının formalaşmasına gərək
olmur.
Bilik çoxluğu səhrada qumun çoxluğundan fərqlənmir. Yəni beləliklə
çox şeyi bilən əslində özünü bilmir.
Təhsilimiz insanı anatomik cəhətdən
öyrənir, ancaq onun insani-milli-mənəvi
dünyasını böyük mənada öyrənməyə
cəhd etmir.
Balalarımıza ciddi söhbətlər etməliyik. Hamı
özgələşməyin dəhşətini
gördüyü dərəcədə ona qarşı
müqavimət göstərmir. Bu gün
Azərbaycanda təbəqələşmənin nəticəsi
olaraq bir neçə təbəqəli ailələr
yaranıb. Şübhəsiz ki, ailələr
arasındakı fərqlər maddi imkanların təsiri ilə
formalaşıb. Azərbaycanda hər
şeylə təmin olunmuş ailələrlə müqayisədə
şübhəsiz ki, sırf kasıb ailələr mütləq
əksəriyyət təşkil edir. Kasıb
ailələrin uşaqları xoşbəxtliyi yalnız
varlı balaları kimi yaşamaqda görürlər. Belə ailələrdə uşaqlar əsasən
oxuyub pula, mənsəbə çatmağı, bu yolla
varlığını sübut etməyi hər şeydən
üstun tutur. Millətin sabahı
haqqında ciddi düşünənlərin sayı
azalır. Əksinə, atüstü
düşünənlərin sayı artır. Uşaqların əxlaqına, tərbiyəsinə
çoxsaylı telekanallar fəlakətli təsir göstərir.
Bu gün cəmiyyətdə tez-tez hamının
adını çəkdiyi, müraciət etdiyi Uşaq
Hüquqları Konvensiyası 20 noyabr 1989-cu ildə BMT-nin
Baş Assambleyası tərəfindən qəbul edilib. Uşaq
Hüquqları Konvensiyası BMT tərəfindən qəbul
edilmiş bir saziş olaraq dünyanın hər bir yerində
yaşayan uşaqlara konvensiya ilə müəyyən
edilmiş hüquqları təmin edir. Konvensiya
uşaqların yaşaması və inkişafı
üçün zəruri olan minimum standartları müəyyənləşdirir.
Konvensiyanın ratifikasiya etmiş bütün
dövlətlər bu öhdəlikləri yerinə yetirməlidirlər.
Onlar daimi xüsusi təşkil edilmiş
Uşaq Hüquqları Komitəsinə hesabat və həyata
keçirdikləri bütün işlər haqda məlumat
verirlər. Bu Konvensiya uşaqların
hüquqlarını təmin edən birinci universal kodeksdir.
O, uşaq hüquqlarına dair bütün məsələləri
bir sənəddə cəmləşdirib.
Konvensiya uşaqların iqtisadi, sosial, mədəni, hətta
siyasi hüquqlara malik olmasını vurğulayır. Əsasən
uşaq hüquqlarının qeyri-formal tədris prosesi vasitəsi
ilə öyrədilməsi üçün yazılmasına
baxmayaraq, bu vəsait çox asanlıqla və müvəffəqiyyətlə
məktəblərdə də istfiadə edilə bilər.
Konvensiya 54 maddədən ibarətdir. Onların hər biri ayrı-ayrı hüquqlar haqda
məlumat verir. Bütün hüquqlar 4 geniş
kateqoriyaya bölünə bilər:
İnkişaf hüquqları — bu hüquqlar
uşaqların öz potensiallarının tam inkişafına
olan ehtiyaclarını təmin edir. Bura məsələn,
təhsil almaq, oynamaq və istirahət etmək, mədəni
tədbirlərə cəlb edilmə və iştirak etmə,
məlumat əldə etmək, azad fikir və din
hüquqları aiddir.
Müdafiə hüquqları — bu hüquqlar
uşaqları müxtəlif növ zorakılıq və
istismardan qorumalıdır. Bu hüquqlar məsələn,
qaçqın uşaqlara qayğının göstərilməsi,
zorakılıq, cəzalandırma, hərbi münaqişələrə
cəlb edilmə, uşaq əməyinin istismarı, narkotik
maddələrin istifadəsi və seksual istismar kimi məsələləri
əhatə edir.
İştirak hüquqları — bu hüquqlar uşaqlara
yaşadıqları cəmiyyətdə fəal iştirak etməyə
imkan yaradır. Bunlar azad fikir söyləmək,
onların həyatlarına təsir göstərən hallarda
öz sözlərini demək, birləşmək və
assosiasiyalar əmələ gətirməkdir. Uşaqların bacarıqları inkişaf edərkən
onların cəmiyyətdə fəal iştirakı və
bunun üçün imkanları daha da artır. Bu da məsuliyyətli vətəndaş kimi
yetişməkdə onlara yardım edəcək.
Yaşamaq hüquqları — bunlara uşaqların
yaşamaq və bunun üçün lazımi tələbatları
təmin etmək hüquqları aiddir; həmçinin adekvat
yaşayış standartları, qida və tibbi xidmətə
malik olmaq kimi hüquqlar da bura aiddir.
Heç
bir uşağa din, dil, irq, rəng, cinsiyyət, milliyyət,
mülkiyyət, siyasi, sosial və s. kimi
ayrıseçkilik göstərilməməlidir.
Uşaqlar
qorunmalı, qanun və lazımi qurumların köməyi ilə
fiziki, zehni, əxlaqi, ruhi və s. olaraq sağlam və normal
şərtlər əsasında yetişdiriləməsi təmin
edilməlidir. Qürur və heysiyyatının
tapdalanmasına yol verilməməlidir. Bunları
nəzərə alaraq qanunlar uşaq haqlarını ən
yüksək səviyyədə qorumalıdır. Hər bir uşağın doğulduğu andan etibarən
dövlətin vətəndaşı olma haqqı var.
Uşaqlar sosial sığortadan yararlanmalı və
sağlam şəkildə böyüdülməlidir. Anası
uşaq dünyaya gələcəyi müddət ərzində
xüsusi diqqət və qoruma ilə təmin edilməlidir.
Fiziki və ya ruhi baxımdan əlil olan
uşaqlar lazımi müalicə və təhsillə təmin
edilməlidir. Uşağın şəxsiyyətinin
formalaşması üçün anlayış və sevgi əsasında
böyüdülməlidir. Valideynlərinin
qayğısı və məsuliyyəti altında sevginin var
olduğu mühitdə yetişdirilməlidir. Ailəsi və maddi vəziyyəti olmayan uşaqlara
adiyyatı qurumlar tərəfindən xüsusi diqqət və
qayğı göstərilməlidir. Kiçik
yaşlarda uşağı anasından ayırmamaq
üçün ciddi tədbirlər görülməlidir.
Uşaq sayı çox olan ailələrə
dövlət tərəfindən maddi yardım edilməlidir.
Cəmiyyətə yararlı və layiqli bir şəxsiyyət
olaraq yetişməsi üçün təhsil alması şərtdir. Təhsilin
bütün məsuliyyəti ailənin üzərinə
düşməlidir. Təhsilin və elmin
ilk hissəsi pulsuz və məcburi olmalıdır. Hansısa qəza və fəlakətlər
zamanı uşaqlar ilk olaraq xilas edilməlidir.
Uşaqlar hər cür istismar və təzyiqə
qarşı qoruma altında olmalıdır. Uşaqlar
müəyyən yaş həddinə çatmayana qədər
hər hansı bir işdə (mənfi təsir göstərən)
çalışmamalı və buna icazə verilməməlidir.
Uşaq irqi, dini və.s kimi ayrıseçkilikdən
uzaq tutulmalıdır. Anlayış,
xoşniyyət, insanlar arasında dostluq, barış və
qardaşlıq mühitində böyüdülməlidir.
Azərbaycan
Respublikasının sözügedən mövzuda qanunu var. Orada
vurğulanır ki, Konstitusiyaya, Uşaq Hüquqları Bəyannaməsinə,
Uşaq Hüquqlarına dair Konvensiyaya və digər beynəlxalq
hüquq normalarına uyğun olaraq
Azərbaycan
Respublikasında uşaqların hüquqlarını və
azadlıqlarını, uşaqlar barəsində dövlət
siyasətinin əsas prinsiplərini, onların müdafiəsi sahəsində
dövlət orqanlarının, digər hüquqi və fiziki
şəxslərin vəzifələrini müəyyən
edir. Uşaqların bu qanunda nəzərdə
tutulmuş hüquqları və vəzifələri 18
yaşına (yetkinlik yaşına) çatmayan və tam fəaliyyət
qabiliyyəti əldə etməyən hər bir şəxsə
aid edilir.
Uşaq hüquqları barəsində qanunvericilik bu qanundan və Azərbaycan Respublikasının digər normativ hüquqi aktlarından ibarətdir. Digər normativ hüquqi aktların normaları uşaqların bu qanunla müəyyən edilmiş hüquq və azadlıqlarını məhdudlaşdıra bilməz. Uşaqlar barəsində dövlət siyəsəti hər bir uşağın zəruri maddi və məişət şəraitində böyüyüb tərbiyə olunmasının, mütərəqqi tələblər əsasında təhsil almasının, layiqli vətəndaş kimi formalaşmasının təmin edilməsinə yönəldilir. Dövlət siyasəti milli və yerli xüsusiyyətlər nəzərə alınmaqla yaradılmış məqsədli uşaq sosial proqramları əsasında həyata keçirilir. Bu proqramların yerinə yetirilməsinə dövlət orqanları ilə yanaşı digər hüquqi və fiziki şəxslər də iştirak edə bilərlər. Azərbaycan Respublikasının Konstitusiyasına uyğun olaraq uşaq hüquqlarının həyata keçirilməsinə dövlət nəzarət edir. Azərbaycan Respublikasında uşaq hüquqlarının müdafiəsini müvafiq icra hakimiyyəti, məhkəmə və prokurorluq orqanları, bələdiyyələr, habelə ictimai birliklər, həmkarlar ittifaqı təşkilatları təmin etməlidirlər. Bu orqanlar, birliklər və təşkilatlar fəaliyyətlərində uşaq hüquqlarının üstün mühafizəsi prinsipini əsas tutmalıdırlar. Dövlət orqanları, bütün fiziki və hüquqi şəxslər öz fəaliyyətində uşaqların mənafelərini üstün tutmalı, onların hüquqlarının təmin olunmasına şərait yaratmalıdırlar. Azərbaycan
Respublikasının normativ hüquqi aktları və müvafiq orqanların qərarları uşaq mənafelərinə
zidd olmamalı və onların icrası uşaqların həyatına, inkişafına və tərbiyəsinə zərər gətirməməlidir. Uşağın hüquq və mənafelərini məhdudlaşdıran hər hansı əqd etibarsızdır.
Bütün uşaqlar bərabər hüquqlara malikdirlər.
Uğur
Xalq Cəbhəsi.-
2013.- 1 iyun.- S. 12.