Tiflisdə Anarın yubileyinə həsr olunmuş gecə

Bu xəbəri paylaş Ermənistanın iki vətəndaşı Azərbaycan tərəfə keçib Öz dərmanlarımız azdır Elxan Süleymanov bəyanat yayıb TQDK neqativ hallar aşkarlayıb Tiflisdə Gürcüstan Yazıçılar İttifaqının (GYİ) təşəbbüsü və təşkilatçılığı ilə Azərbaycanın xalq yazıçısı, Azərbaycan Yazıçılar Birliyinin sədri Anarın 75 illik yubileyinə həsr olunan gecə keçirilib. APA-nın Gürcüstan bürosunun məlumatına görə, tədbiri GYİ-nın sədri Makvala Qonaşvili açaraq, bu gün gürcü və Azərbaycan xalqlarının bayramı olduğunu bildirib. «Azərbaycanın müdrik, ağsaqqal yazıçısı bizim ölkədə qonaqdır. Bundan gözəl gün ola bilməz. Bizim böyük II İlya deyib ki, yazıçı və şair insanlarla Allah arasında ən yaxşı vasitəçidir. Bizim hörmətli Anar da eyni ilə belədir. İki gün bundan əvvəl biz M.F. Axundzadənin həyatına həsr olunmuş filmə baxdıq və bu film məndə elə duyğu və hiss yaratdı ki, sanki burada Allahın yaratdığı insanla səmavi insan arasında dialoq yaranıb. Anar müəllimin ailəsi söz xəzinəsi simvoludur. Onun atası da, anası da şair olub». Sonra GYİ-nın sədri xalq yazıçısı Anara ad günü münasibəti ilə saat və qələm hədiyyə edib.

Tədbirdə çıxış edən Tiflis şəhər merinin müavini Sevdiya Uqrexelidze çıxış edərək, Anar yaradıcılığına Gürcüstanda böyük hörmət olduğunu bildirib. «Mənim üçün çox xoşdur ki, Anar yazıçı və həm də siyasətçi kimi öz xalqına və vətəninə xidmət edir, eyni zamanda gürcü və Azərbaycan yazıçılarını birləşdirir». Sonra mer müavini hər iki ölkə arasında yaratdığı ədəbi əlaqələrə görə, Anara Tiflis şəhər meri Qiqi Uqulavanın imzaladığı fəxri fərmanı və bir neçə hədiyyə və Gürcüstan haqqında albom təqdim edib.

Yubiley tədbirində Gürcüstan mədəniyyət və abidələrin mühafizəsi nazirinin müavini Teona Dolencaşvili nazir Quram Odişariyanın salamını və təbrikini çatdırıb. Sonra o, Anarın «Beşmərtəbəli binanın altıncı mərtəbəsi» adlı əsərini oxuduğunu bildirib və mədəniyyət nazirliyinin hədiyyəsini təqdim edib.

Yubiley gecəsində GYİ-nın sədr müavini, yazıçı Revaz Mşveladze tədbir iştirakçılarına xoş xəbər çatdırıb. O, tədbir başlananda Azərbaycan prezidenti İlham Əliyevin xalq yazıçısı Anara zəng etdiyini və onun yubileyini təbrik etdiyini və Azərbaycan mədəniyyətinin təbliğində xüsusi xidmətlərinə görə «Şərəf»ordeni ilə təltif edildiyini bildirib. Tədbirdə gürcü yazıçısının bu məlumatı alqışlarla qarşılanıb. R. Mşveladze hər iki xalqın XI əsrə ləyaqətlə gəlib çatdıqlarını və düşmənlərin acığına tarixi birgə yazdıqlarını bildirib.

Sonra bəstəkar Vaja Azaraşvili, GYİ-nın müavini Baratur Arabuli, AYB-nin müavini Nazim İbrahimov, «Sübhün səfiri» bədii filmin rejissoru Ramiz Həsənoğlu, rəssam və şair-bəstəkar Nuqzar Eqberidze, AYB-nin Gürcüstan bölməsinin rəhbəri Rafiq Hümmət, şair-tərcüməçi Zezva Medulaşvili və başqaları Azərbaycan xalq yazıçısı Anar barədə ürək sözlərini və xatirələrini, eyni zamnda onun gürcü-Azərbaycan ədəbi əlaqələrinin inkişaf etdirilməsində xidmətləri barədə, həm də gürcü və Azərbaycan ədəbiyyatı nümunələrinin tərcümə edilməsi haqqında fikirlərini söyləyiblər.

Tədbirin sonunda AYB-nin sədri Anar yubiley münasibəti ilə təşkil edilən gecəyə görə, GYİ-nın sədri Makvala Qonaşviliyə təşəkkürünü bildirib: «Bu mənim üçün sürpriz tədbir idi».

GYİ-nın sədri Makvala Qonaşvili APA-ya açıqlamasında Azərbaycan xalqını çox sevdiyini və Anarın yaradıcılığına xüsusi hörməti olduğunu bildirib: «Bizim əsrdə insanlar müdrikliyi unudublar. O, müdriklik simvoludur».

M.Qonaşvili bu ilin sentyabr ayında gürcü dilində Anarın əsərlərindən ibarət yeni kitab nəşr olunacağını deyib: «Biz kitabın təqdimatına Anarı və gənc yazarları da dəvət edəcəyik. Biz dostluğu bir-birimizə aşılamalıyıq. Əgər bir şəhərdə bir nəfər səni gözləyirsə, o şəhər sənin doğma şəhərin sayılır».

Xalq Cəbhəsi.- 2013.- 16 mart.- S.14.