«Qiyamətə qədərmi kor gəlib,
kor gedəcəyiz?»
Ömər Faiq
Nemanzadə zəmanəsinin bütün insanlarını
«geri qalan camaatın dərdinə qalmağa»
çağırırdı
XX əsr Azərbaycan publisistikasının
inkişafında böyük xidmətləri olan şəxslərdən
biri də görkəmli jurnalist, molla nəsrəddinçilərin
ideya rəhbərlərindən biri, C.Məmmədquluzadənin
yaxın dostu və məsləkdaşı Ömər Faiq
Nemanzadədir.
O, fəal bir ziyalı kimi ölkədə baş verən
ictimai-siyasi və mədəni hadisələrin fəal
iştirakçısı olmuş, xalqın maariflənməsi
və azadlığı uğrunda yorulmadan mübarizə
aparmışdır. Cəmiyyətdə
gördüyü nadanlığı,
savadsızlığı və ədalətsizlikləri qələmə
alaraq müxtəlif ədəbi məcmuələrdə dərc
etdirirdi. 1905-ci ildə isə Ö.F.Nemanzadə Tiflisdə
«Qeyrət» mətbəəsi açmağa nail olur. Adından göründüyü kimi, müəllif əqidəli,
Vətən, millət təəssübü çəkən
yurddaşlarını milli dirçəliş və milli
birlik uğrunda qeyrət göstərməyə
çağırırdı.
Ömər Faiq Nemanzadə cəsarətli bir publisist
kimi 1906-cı ildən 1917-ci ilə qədər «Molla Nəsrəddin»
jurnalının məsul katibi olmuşdur. Professor Əziz Mirəhmədov
Ömər Faiqin bu ədəbi məcmuələrdəki fəaliyyətini
qiymətləndirərək yazırdı:
«…Gördüyü işin böyük əhəmiyyətini
dərindən dərk etdiyi üçün Faiq bütün
varlığını, bacarıq və qüvvəsini bu
işə verirdi. İstər «Qeyrət»in, istərsə
«Molla Nəsrəddin»in fəaliyyəti dövründə o,
dostu (C.Məmmədquluzadə) ilə əl-ələ verib
irticanın hücumlarını dəf etmiş, lazım gəldikdə
hətta qaragüruhçularla açıq mübahisə və
mübarizəyə də qoşulmuşdu. Faiq
dostundan çevikliyi, yorulmazlığı tez ünsiyyət
bağlamaq xüsusiyyəti ilə də seçilirdi». Başqa mollanəsrəddinçilər kimi Ömər
Faiq də təhqirlərə, təqiblərə, təhdidlərə
və həbs olunmasına baxmayaraq, öz kəsərli qələmi
ilə ictimai həyatda və xalqın maariflənməsində
inamla mübarizə aparmışdır. Ö.F.Nemanzadənin
ədəbi yaradıcılığı geniş və
çoxşaxəlidir: burada mətbəəçilik və
redaktorluqdan tutmuş, müxtəlif ədəbi dərgilərdə
şeir, hekayə, məqalə, felyeton və s. janrlarda
yazıb yaratması və maarifçilik sahəsində
apardığı işlər daxildir. Onun yazıları
«Şərqi-Rus», «Tərcüman», «Molla Nəsrəddin»,
«İrşad», «Həyat», «Açıq söz», «Sərvəti-fünun»
və s. ədəbi məcmuələrdə çap olunurdu.
Bu məqalə və felyetonları o, 40-dan çox, o cümlədən
«Heyrani», «Məşrutəçi», «Lağlağı»,
«Ümidvar», Ümid» imzaları ilə çap etdirmişdir. Həyatda rastlaşdığı bütün
çətinliklərə baxmayaraq bu vətənpərvər
jurnalist xalqın xoşbəxt gələcəyinə
ümidlə baxırdı. Xalq yazıçısı
Elçin bu münasibətlə yazmışdır: «…Lakin
ümidvar ümidini itirmirdi və ən əsası isə
onun özünün qələminin fəaliyyəti bir
ümid yaradırdı, çünki bu qələm,
yuxarıda yazdığımız kimi, yatmışları
oyadırdı, xalqı xalqın özünə
tanıdırdı — Ümidvarın qələmi ümid
saçırdı».
Dövrün qabaqcıl ziyalısı kimi o, öz
xalqını dünyanın ən mədəni xalqları səviyyəsində
görmək arzusu ilə yaşayır və nicat yolunu isə
elmdə, təhsildə, xalqın maariflənməsində
görürdü. Başqa millətlərin irəli getdiyi halda, o, «müsəlmanlarda
bir tərpəniş» görmür, daxili bir təəssüf
və narahatlıq hissi keçirərək yazırdı:
«…Qiyamətə qədərmi kor gəlib, kor gedəcəyiz?
Qafil doğub, qafil öləcəyiz?
Boynumuzdakı bu ağır cəhalət zəncirlərini, qəflət
yüklərini məhşərə qədərmi
sürükləyib götürəcəyiz?»
Ömər Faiq zəmanəsinin bütün
insanlarını — şeyxülislamları, müftiləri,
qazıları, mollaları, axundları, müəllimləri,
qulluqçuları «geri qalan camaatın dərdinə
qalmağa» çağırırdı. Özgə millətlər,
dünya gündən-günə dəyişib inkişaf
etdiyi halda mübariz publisist özünəməxsus daxili bir
yanğı ilə yazırdı: «Əsil islamiyyətdən
bixəbər yatırıq, halbuki, zaman dəyişir,
dünya dəyişir, hər zərrə dəyişir… İnsaf və mürvətmidir ki, bizlər hər
şeydən də dişarı olaq? Dəyişməli,
biz də mütləq dünyəvi əməllərimizi,
göz görə təhlükələrə, səfalətlərə
sürükləyən köhnə adətlərimizi, cahilanə
fikirlərimizi, əməllərimizi dəyişməliyik.
Və illa özgələr bizləri
bütün özgə yolda dəyişdirib yox edərlər».
Maarif və mədəniyyəti inkişaf etdirməyin ən
birinci şərtini o, kitab və qəzetlərdə — mətbuatda
görürdü. Onun fikrincə «hər millətin mədəniyyət və
qüvvəti mətbəələrin sayı ilə mütənasibdir.» Xalq şairi Bəxtiyar Vahabzadə Ömər
Faiqin yaradıcılığına həsr etdiyi məqaləsində
yazırdı: «Onun (Ömər Faiqin -O.H.) qələmi zəmanəsinin
ən ciddi, ən zəruri ictimai problemlərinə
toxunmuş, xalqının səadəti, tərəqqisi
üçün elm, təhsil, məktəb, maarif, dil
saflığı, əlifba, fəhlələr
üçün həmkarlar təşkilatının zəruriliyi,
tətil azadlığı, milli gəlir və sairə kimi ən
vacib məsələlərdən yazmışdır».
«Ay mənim
sevgili məzlum millətim, vaxtdır oyanaq, vaxtdır iş
görək»- deyən müəllif öz həmvətənlərini
mənfəətxorlara, dinini, millətini «iki qəpiklik xeyrə
satanlara boyun əyməməyə», «dəhşətli vaqiələrdən»
ayıltmağa səsləyirdi. Ömər Faiq
Nemanzadə bütün publisistik yazılarında xalqla
xalqın öz dilində danışırdı. Xalqa
olan inamın nəticəsidir ki, o, «Dəvət və təvəqqe»
məqaləsində yazırdı: «Xülasə, bizim hər
cür ümidimiz camaatın oyanmasında, camaatın öz
xeyir-şərini özləri tanımasındadır».
Ö.F.Nemanzadənin publisistik
yaradıcılığında dil məsələlərinə
həsr etdiyi məqalələri xüsusi yer tutur. O, mübariz bir mətbuat
işçisi, vətənpərvər ziyalı kimi daim Azərbaycan
dilinin təmizliyi keşiyində dayanmış və bu sahəyə
aid bir sıra məqalələr yazıb çap
etdirmişdir. Ömər Faiqə görə
milləti sevməyin birinci əlaməti onun dilini sevməkdir.
Professor Şamil Qurbanov yazırdı ki, «…Milli
dil problemi onun yaradıcılığında başlıca
yer tuturdu. Bu da təsadüfi deyildi. Çünki XX əsrin Azərbaycan
ziyalılarının əsas mübarizə hədəflərindən
biri də milli dilə xor baxan, ona biganə olanlar idi. Ana
dilinə olan məhəbbətin ifadəsidir ki, Ömər
Faiq yazırdı: «Dil yoxluğu millət yoxluğudur», «Mən
inanmıram ki, dilini sevməyən xalqını sevsin», «Məhəbbətlərimizin
ən üst qatına dil məhəbbətini
çıxarmalıyıq» və s.. «Yazımız, dilimiz»,
«İkinci il»imiz adlı məqaləsində
müəllif dilimizin ahəng qanununu inkar edib, onu ərəb-fars
qəlibinə salmaq istəyənlərə tutarlı cavab
verirdi. Dilimizdə əsl öz sözlərimiz olduğu halda
alınma sözlərin işlədilməsinə öz
etirazını bildirirdi: «…Biz deyirik: çox heyflər olsun
ki, dilimizin yarısını ərəb və fars
sözləri ilə doldurub bizi dilsiz və bədbəxt
etmişlər. Elm və mərifətin camaat
arasında yayılmağına böyük əngəl
olmuşlar. Dilimizi genişləndirərkən,
qaşımızı qayırarkən gözümüzü
çıxarmışlar».
«Eşq və məhəbbət» məqaləsində
Ömər Faiq qeyd edir ki, dilimiz dünyadakı asan və
gözəl dillərdən biridir. O, ana dilimizə həqarətlə
baxanları və bu dildə danışmağı şəninə
kəsir bilənləri kəskin tənqid edərək
yazırdı: «Bizim bəzi ağalar dilimizin çətinliyini
bəhanə edib evdə arvad-uşaq ilə də özgə
dil ilə danışmaq xəyalında bulunurlar. Tiflisdə beş ziyalı bir araya gələndə
görməzsiniz ki, öz dili ilə danışsın. Buranın qonaqlarında, yığıncaqlarında
milli dil, milli adət, milli süfrə, milli sadəlik
bulmazsız. Hələ xanımlar deyəsən
ki, milli dilə düşməndirlər. Bunların
adları özgə, dilləri özgə, adətləri
özgə, diləkləri özgə, tərbiyələri
özgə, gələcəkləri özgə, məhəbbətləri
özgə! Bilmirəm bunların millilikdən
payları nədir? Bilmirəm bu gedişlə hara gedirik?»
Xalq yazıçısı Elçinin qənaətinə
görə «Faiqin yaradıcılığında xalqa məhəbbət
anlayışı ilə dilə məhəbbət
anlayışı bir-birindən ayrılmazdır, küll
halındadır, bütövdür». Ana dilinə olan məhəbbətini
onun milli təəssübkeşliyi ilə əlaqələndirən
yazıçı fikrini aşağıdakı cümlələrlə
yekunlaşdırır: «…Faiq üçün Azərbaycan
dilinin təmizliyi və inkişafı uğrundakı
mübarizə bilavasitə milli azadlıq və inkişaf
uğrundakı mübarizənin əsas mərhələlərindən
biri idi və bu son dərəcə aktual problem onun
yaradıcılığında bir ana xətt təşkil
edirdi. O, bir tərəfdən dilşünas — alim kimi elmi
mülahizələrini söyləyir, digər tərəfdən
isə publisistikası ilə Azərbaycan dilinin
qarşısına çəkilən sədləri dəf
etməyə, dili alçaldanların, ona yuxarıdan
aşağı baxanların əsl simasını
açıb xalqa göstərməyə
çalışırdı və onun publisistikasının həyatiliyi,
istedadı, hərarəti bu istəyə nail olurdu». Ömər Faiq Nemanzadə qabaqcıl bir ziyalı
kimi millətin tərəqqisi yolunda görülən hər
işi təqdir edirdi. Vaxtilə
tanınmış xeyriyyəçi Hacı Zeynalabdin
Tağıyevin Bakıda açdığı qızlar məktəbinin
fəaliyyətindən sevinərək Türkiyədə nəşr
olunan «Sərvəti — fünun» qəzetinə bu barədə
geniş məqalə yazmışdır.
Böyük maarifçi-publisistin fəaliyyəti çoxşaxəli olduğu qədər də zəngin olmuşdur. Ömər Faiq qeyd edirdi ki, hər bir kəs «öz millətini tanıyıb onun yolunda ağladığı, onun uğrunda gözünü kor etdiyi böylə bir həngamədə biz öz millətimizi sevmək deyil, onun hətta quru adını da bilməyib ortada çaşıb qalmışız. Məqalədə müəllifin insan və millət haqqında düşüncələrini ehtiva edən cümlələrlə rastlaşırıq. «Sünnilik, şiəlik, babılıq bir məzhəb və əqidədir» deyənlərə özünü tanımağı, özünü dərk etməyi xatırladır. Soydaşlarına müraciətlə deyir ki, «niyə sənə «kimsən?» dedikləri vaxt həqiqi cavabında aciz qalırsan? Niyə sadəcə deyə bilmirsən ki, mən türkəm. Niyə deyə bilmirsən ki, şiəlikdən, sünnilikdən, babılıqdan əvvəl sən türk idin. İndi də türksən və bundan sonra da türk olacaqsan».
Müəllif qeyd edir ki, dünyada şiə, sünni, babı, şeyxi adları yox ikən Türk adı var idi. Milli mədəniyyətimizin qədimliyindən söz açan məqalə müəllifi onun dünyada tanınmasını, xüsusilə yurddaşlarının öz varlığını, öz vücudunun qiymətini bilməyi, qəflət yuxusundan ayılmağı, özünə gəlməyi obrazlı bir dildə bəyan edir. Ömər Faiq dünya mədəniyyətinə qısa nəzər salır, bir sıra xarici ölkələrlə qədim türk mədəniyyətini müqayisə edir, müqayisə edərək də üstünlüyü xalqın əsrlər boyu yaratdığı və yaşatdığı zəngin sənət nümunələrinə verirdi.
Öncə qeyd etdiyimiz kimi, dil problemi Ömər Faiq yaradıcılığının əsas cövhəridir, mayasıdır, onun təməlini təşkil edir. Publisistik və mətbu fəaliyyətinin bütün mərhələlərində dil məsələsini diqqətdə saxlayan Ö.F.Nemanzadə bu problemə müxtəlif aspektlərdən yanaşmış, onu kompleks halda dəyərləndirmişdir. «Bədbəxt o millətdir ki, özgə millətin silahından ziyada dil və ədəbiyyatına əsir olaraq yaşamaqdadır» — söyləyən Ömər Faiq bu problemin nə qədər ciddi olduğunu vurğulayır və yazır: «Tarix bizə göstərir ki, bir millətin cahangirliyi, hökuməti, hətta yeri-yurdu da əlindən alınsın, madam ki, milli ədəbiyyatı var, o millət məhv edilməz. Dili kəsilməyən millətin vücudu kəsilməz, ədəbiyyatı yaşayan millət heç vaxt ölməz».
Oktay
Xalq Cəbhəsi.-
2013.- 14 may.- S.13.