«Ermənistan Cakartada səfirlik
açmağa səy göstərir»
Elmar İskəndərov:
«Ermənistan hökumətinin
sorğu qrupu hazırda Cakartada Ermənistan səfirliyi açmaq üçün
ərazi axtarır»
İndoneziya Beynəlxalq Tələbələr
Assosiasiyasının vitse-prezidenti,
azərbaycanlı tələbə
Elmar İskəndərovun
BayMedia-ya eksklüziv müsahibəsini oxucularımıza
təqdim edirik
- Elmar bəy, İndoneziyada Azərbaycanı
necə tanıyırlar?
- İndoneziyada Azərbaycanı
son dövrlərə kimi
yaxşı tanımırdılar. Yalnız siyasi
dairələrdə Azərbaycan
haqqında tam məlumat
var idi. İlk dəfə İndoneziya Respublikasına səfərim
2008-ci ildə olub.
Bu səfər İndoneziya Xarici İşlər Hazirliyinin
xətti ilə həyata keçirilən
dövlət proqramı
nəticəsində baş
tutdu. 2008-ci ildə Azərbaycandan olduğunu deyəndə gərək Türkiyə,
Rusiya və Xəzər dənizi regionunda yerləşdiyini
də qeyd etmək zəruri idi. Çünki çox insanın,
xüsusilə də gənc nəslin Azərbaycan haqqında təsəvvürü belə
yox idi. 2012-ci ildə İndoneziya
Təhsil Nazirliyinin dövlət təqaüdünü
yenidən qazandım və hazırda Beynəlxalq Münasibətlər
və siyasi elmlər üzrə aparıcı universitetlərindən
birində magistr təhsilimi davam etdirirəm. O gündən
ölkəmizin burada tanınması istiqamətində
çox böyük dəyişikliklər baş
verib. Əlbəttə
ki, bu ilk növbədə ölkəmizin
regionda və dünyada qazandığı
uğurlar və ev sahibliyi
etdiyi bir sıra beynəlxalq miqyaslı tədbirlərin,
forumların və konfransların keçirilməsi
ilə əlaqəlidi.
Burda təhsil aldığım
müddətdə istər
İndoneziyada, istərsə
də regionun digər ölkələrində
keçirilən dövlət
və beynəlxalq səviyyəli bütün
konfranslarda Azərbaycanı
layiqincə təmsil etməyə çalışmışam.
2013-cü ildə İndoneziyanın
32 aparıcı universitetində
təhsil alan
150 beynəlxalq tələbə
arasında İndoneziya
dilində keçirilən
debat yarışlarında
mənim təmsil etdiyim universitet və rəhbərlik etdiyim komanda qalib gəldi və bütün qitələrdən mindən
çox tələbəni
özündə birləşdirən
İndoneziya Beynəlxalq
Tələbələr Assosiasiyasının
vitse-prezidenti seçildim.
Bu hadisə istər
İndoneziya mediasında,
istərsə də Azərbaycan mediasında geniş işıqlandırıldı,
çünki bu təşkilata Azərbaycanlı
ilk dəfə rəhbər
seçildi. Bununla da,
istər İndoneziya cəmiyyəti arasında,
istərsə də sosial və siyasi həyatının bütün sahələrində
daha da aktiv
iştirak etməyə
davam etdim. Çox sevindirici haldır ki, artıq İndoneziya xalqı arasında Azərbaycanlı
olduğunu deyəndə
böyük hörmət
və fərəhlə
qarşılayırlar.
- Bildiyiniz kimi, İndoneziya Azərbaycan həqiqətlərinə dəstək
verən müsəlman
dövlətlərindən biridir. Ölkə siyasilərinin Dağlıq
Qarabağ məsələsinin
həllinə baxışı
nədən ibarətdir?
- Azərbaycan-İndoneziya münasibətləri
haqqında çox yazmaq olar. Bu barədə
hazırda təhsil aldığım universitetdə
məqaləm də dərc edilib. İlk öncə, İndoneziya Respublikası Azərbaycan
Respublikasının müstəqilliyini
28 dekabr 1991-ci ildə
tanıyıb və iki ölkə arasında diplomatik münasibətlər 24 sentyabr
1992-ci ildə qurulub.
Son dövrlərdə İndoneziya və Azərbaycan arasında münasibətlər daha da intensivləşib.
Bircə onu qeyd etmək kifayətdir ki, 2012-ci il statistikasına əsasən iki ölkə arasında ticarət dövriyyəsi
2 milyard ABŞ dolları
təşkil edib və bununla İndoneziya Azərbaycanın
4-cü ən böyük
ticarət tərəfdaşına
çevrilib və bu gün bu
göstərici durmadan
artır. Siyasi müstəvidə də istər BMT, istərsə də İslam Əməkdaşlıq
Təşkilatının fəal
üzvü kimi İndoneziya bütün beynəlxalq təşkilatlarda
Azərbaycanı dəstəkləyir.
Ermənistan-Azərbaycan Dağlıq Qarabağ
münaqişəsində də
İndoneziya birmənalı
olaraq hər zaman Azərbaycanın haqq işini dəstəklədiyini vurğulayıb.
Bu ölkədə hər
il Xocalı
soyqırımının anım
günü qeyd edilir. Xocalı soyqırımı İndoneziyada dövlət
səviyyəsində, bu
ölkənin qanunverici
orqanı olan İndoneziya Respublikasının
Parlamenti tərəfindən
rəsmən tanınır
və bu məsələyə İndoneziya
hər zaman bütün beynəxlaq konfranslarda öz qətiyyətli mövqeyini
və dəstəyini
bildirib. İndoneziyanın bu qətiyyətli mövqeyi, İndoneziya Respublikası Parlamentinin Xalq Nümayəndələr
Palatasının sədri
cənab Marzuki Alie ilə bu
yaxınlarda görüşümüz
zamanı da bir daha səsləndi
və çox dəyərli bəyanatlarla
yadda qaldı. İndoneziya Respublikası Parlamentinin Xalq Nümayəndələr
Palatasının Sədri
cənab Marzuki Alie dünya ictimaiyyəti tərəfindən
beynəlxalq səviyyədə
tanınmış Azərbaycan
Respublikasının ərazi
bütövlüyünü və səhhədlərinin
toxunulmazlığı prinsipini
dəstəklədiyini bildirib.
O bildirdi ki, onun mövqeyi və İndoneziya xalqının mövqeyi
BMT Təhlükəsizlik Şurasının
822, 853, 874 və 884 saylı
qətnamələrinə əsaslanaraq,
Ermənistanın Azərbaycanın
Dağlıq Qarabağ
regionunun təcavüzünə
və işğalına
son qoyulmasını və
Ermənistan Silahlı
Qüvvələrinin Azərbaycanın
işğal altında
olan Dağlıq Qarabağ regionu və digər ərazilərindən çıxarılmasını
tələb edir. Cənab Marzuki Alie sonda
qeyd etdi ki, İndoneziya xalqı Dağlıq Qarabağ münaqişəsində
və Xocalı Soyqırımı məsələsində
Azərbaycan xalqının
mübarizəsini və
haqlı mövqeyini bütünlüklə dəstəkləyir.
Bu, İndoneziya Respublikasının dövlət
və beynəlxalq konfranslarda səsləndirdiyi
rəsmi mövqeyidir.
- İndoneziyada nə
qədər azərbaycanlı
tələbə təhsil
alır və onların fəallığı
hansı səviyyədədir?
- İndoneziyada Beynəlxalq
Tələbələr Assosiasiyasının
vitse-prezidenti olmaqla yanaşı, həm də Azərbaycanlı Tələbələr Assosiasiyasının
sədriyəm. Bu etimadı
mənə İndoneziya
Respublikasının Təhsil
Nazirliyi göstərib.
Qeyd etməliyəm ki, hər il İndoneziyaya gələn Azərbaycanlı
tələbələrin sayı
artmaqdadır. Əvvəllər
bəzi şəhərlərdə
bir-iki tələbə
olardısa, hazırda
təkcə mənim təhsil aldığım
universitetin kampuslarında
beş Azərbaycanlı
tələbə bakalavr
təhsili alır. Ümumiyyətlə isə, İndoneziyada
Azərbaycanlı tələbələrin
sayı otuz nəfərdən çoxdur.
Kəmiyyət az görünə bilər, amma keyfiyyət kifayət qədər yüksəkdir.
Azərbaycanlı tələbələr İndoneziyada çox aktivdirlər. Bu yaxınlarda
İndoneziyanın 32 aparıcı
universitetində təhsil
alan 77 ölkədən
beynəlxalq tələbələrin
sammiti keçirildi. Həmin sammitdə Azərbaycanlı
tələbələr də
iştirak edirdi.
Daha öncə də qeyd etdiyim kimi,
bu sammitdə böyük uğur qazandıq.
Azərbaycanı İndoneziyada layiqincə təmsil etmək üçün orta məktəblərdə, universitetlərdə
tez-tez Azərbaycan haqqında təqdimatlar təşkil etdiririk, digər ölkələrin
də iştirak etdiyi mədəniyyət festivallarında Azərbaycan
stendi öz milli keyfiyyətləri ilə hər zaman fərqlənir. İstər İndoneziya
cəmiyyəti, istərsə
də xarici tələbələr tərəfindən
bayramlarımız və
milli geyimlərimiz, xüsusilə Novruz bayramı çox böyük maraqla qarşılanır. Azərbaycan və
Türk dilinə çox böyük marağın yarandığı
üçün təhsil
aldığım universitetdə
könüllü Azərbaycan
və Türk dilləri kursları keçirik. Azərbaycan
torpaqlarının Ermənistan
tərəfindən işğalı
və Xocalı Soyqırımı haqqında
həm İndoneziya cəmiyyətini, həm də beynəlxalq tələbələri məlumatlandırmaq
üçün tədbirlər
keçiririk və hər il
səfirliyin keçirdiyi
tədbirlərə xarici
tələbləri də
dəvət edirik. Bundan əlavə, tez-tez yerli televiziya və radio verlişlərinə
də dəvət olunuram və Azərbaycan haqqında məlumatlar verirəm.
- Ermənilərin fəallığı hiss olunurmu?
- Erməniləri Azərbaycanın bu ölkədə aktiv olması qısqandırmaya bilməzdi. Çünki, bir sıra beynəlxalq konfranslarda İndoneziyanın Azərbaycanı dəstəkləməsi və Ermənistanı Dağlıq Qarabağı işğal etdiyinə və Xocalı Soyqırımını törətdiyinə görə qınaması, Ermənistana qarşı qətnamələrin qəbulunda fəal iştirakı Ermənistanı ciddi narahat edir. Bir neçə ildir ki, Ermənistan Cakartada səfirlik açmağa böyük səylər göstərir. Lakin, Azərbaycan Respublikasının xarici siyasətinin uğuru və İndoneziyanın Azərbaycanla dostluq münasibətlərinə üstünlük verməsi bunun qarşısını alıb. Ancaq, son dövrlər ermənilərin burda səfirlik açma planları yenidən gündəmə gəlib və bu məsələdə böyük səylər göstərməyə başlayıblar. Ermənistan hökumətinin sorğu qrupu hazırda Cakartada Ermənistan səfirliyi açmaq üçün ərazi axtarır və bu il Ermənistan səfirliyinin Cakartada açılması təxmin edilir. Lakin, İndoneziya Respublikasının Parlamenti, həm İndoneziya Respublikası Parlamentinin Xalq Nümayəndələr Palatasının 1-ci Komissiyası, həm də İndoneziya Respublikası Parlamentinin Xalq Nümayəndələr Palatasının rəhbərliyi İndoneziyanın Dağlıq Qarabağ münaqişəsində və Xocalı Soyqırımında mövqeyini əsas gətirərək, artıq İndoneziya hökumətinə Ermənistanın Cakartada səfirlik açmasının təxirə salınması üçün müraciət edib.
İndoneziya Respublikası Parlamentinin Xalq Nümayəndələr Palatası sədri cənab Marzuki Alie qeyd edib ki, 2014-cü ildə Cakartada Ermənistan səfirliyinin açılması planları İndoneziyanın Dağlıq Qarabağ münaqişəsində və Xocalı Soyqırımı məsələsində tutduğu ədalətli mövqeyini və siyasətini dəyişməyəcək.
Elnur Eltürk
Xalq Cəbhəsi.- 2014.- 23 yanvar.- S.9.