“Səttar dünyası” portretlər silsiləsinin açılışı olub

Azərbaycanın Xalq Rəssamı Səttar Bəhlulzadənin anadan olmasından 107 il ötür. Əlamətdar hadisə ilə bağlı Səttar Bəhlulzadənin ev-muzeyində muzeyin veb-saytının (bahlulzade.az) təqdimatı və gənc rəssam Emin Aslanovun “Səttar dünyası” portretlər silsiləsinin açılışı keçirilib.

Tədbirdə muzeyin direktoru İradə Abdinova Azərbaycan rəssamlıq məktəbinin ən görkəmli nümayəndələrindən biri Səttar Bəhlulzadənin həyat yolu haqqında ətraflı məlumat verib. Qeyd olunub ki, Azərbaycan təsviri sənət tarixində lirik mənzərənin yaradıcısı kimi məşhurlaşan rəssamın əsərləri dünyanın bir sıra ölkələrində nümayiş etdirilib, Praqa, London, İstanbul, Bonn və digər şəhərlərdə fərdi sərgiləri keçirilib. O, əsərləri BMT-nin baş qərargahında nümayiş etdirilən və Avropada fərdi sərgisi olmuş ilk Azərbaycan rəssamıdır.

Mədəniyyət və Turizm Nazirliyi mədəniyyət müəssisələri və xalq yaradıcılığı şöbəsinin müdiri Fikrət Babayev çıxışında Səttar Bəhlulzadənin xatirəsinin anılması məqsədilə nazirlik və onun strukturlarının müxtəlif xarakterli tədbirlər keçirdiyini qeyd edib, gənc rəssam Emin Aslanovun sərgisinin də məhz belə tədbirlərdən olduğunu bildirib. Fikrət Babayev nazirliyin informasiya texnologiyalarının muzeylərdə tətbiqinə xüsusi diqqət yetirdiyini, bu baxımdan Səttar Bəhlulzadənin ev-muzeyinin veb-saytının yenilənməsinin vacib əhəmiyyət kəsb etdiyini vurğulayıb.

Əməkdar İncəsənət Xadimi Ziyadxan Əliyev çıxışında Səttar Bəhlulzadənin yaradıcılığından söz açıb.

Xalq rəssamı Arif Hüseynov Səttar Bəhlulzadə obrazının bir çox rəssam və heykəltəraşlar tərəfindən təsvir olunmasından danışıb. Bu baxımdan gənc rəssam Emin Aslanovun “Səttar dünyası” silsiləsini yaratmasının heç də təsadüfi olmadığını, kompüter qrafikası ilə işlənmiş əsərlərin rəssamın obrazını yeni rakursdan görməyə imkan verdiyini söyləyib.

Rəsmlərin təqdimatından sonra ev-muzeyinin direktoru İradə Abdinova Emin Aslanova təşəkkürnamə və hədiyyə təqdim edib.

Sonda muzeyin saytı təqdim olunub.

Xalq cəbhəsi.- 2016.- 17 -19 dekabr.- S.16.