Xalq artisti İlham Əsgərovun xatirəsi anılacaq

 

Oktyabrın 11-də Akademik Milli Dram Teatrında görkəmli aktyor, Xalq artisti İlham Əsgərovun 60 illiyinə həsr olunan tədbir keçiriləcək.

Xatirə gecəsi Mədəniyyət Nazirliyi, Azərbaycan Teatr Xadimləri İttifaqı Akademik Milli Dram Teatrının təşkilatçılığı ilə reallaşacaq. Təbir çərçivəsində Cəfər Cabbarlı adına Azərbaycan Dövlət Teatr Muzeyinin arxivindən İlham Əsgərovun həyat yaradıcılığını əks etdirən fotosərgi təqdim olunacaq, sənətkara həsr olunan videoçarx nümayiş etdiriləcək.

Anım mərasimində İlham Əsgərovun Azərbaycan Teatrının inkişafındakı xidmətlərindən danışılacaq, sənət dostları onunla bağlı xatirələrini bölüşəcəklər. Sonra isə İlham Əsgərovun xatirəsinə həsr olunan УQürbətdən gələn məktublarФ tamaşası nümayiş olunacaq.

Yazıçı-diplomat Həsən Həsənovun eyniadlı əsəri əsasında hazırlanan ikihissəli dramın rejissoru Xalq artisti Mərahim Fərzəlibəyovdur. Səhnə əsərinin quruluşçu rəssamı Əməkdar mədəniyyət işçisi İlham Elxanoğlu, musiqi tərtibatçısı Həmid Kazımzadədir. Tamaşada əsas rolları Xalq artistləri Ramiz Məlik, Laləzar Mustafayeva, Hacı İsmayılov, Əjdər Həmidov, Əməkdar artistlər Kazım Abdullayev, Elşən Cəbrayılov, Vəfa Zeynalova, aktyor Elçin Əfəndi ifa edəcək.

Çağdaş günümüzlə səsləşən tamaşada M.F.Axundzadənin obrazını vaxtilə Xalq artisti İlham Əsgərov canlandırıb.

Qeyd edək ki, İlham Əsgərov 1958-ci il iyulun 16-da anadan olub. 1980-ci ildə Azərbaycan Dövlət Mədəniyyət və İncəsənət Universitetinin dramkino aktyoru fakültəsini bitirib. 1982-ci ildən Akademik Milli Dram Teatrında aktyor kimi fəaliyyətə başlayıb. İ.Əsgərov Azərbaycan dövlət radiosunun məşhur "Bulaq" verilişinin aparıcılarından olub.

 

Xalq Cəbhəsi.- 2018.- 10 oktybar.- S.16.