Qəbələdə gənc arxeoloq alim və tələbələrin
yay məktəbi təşkil olunub
Qəbələdə AMEA-nın
İctimai Elmləri Bölməsinin və Gənc Alim və
Mütəxəssislər Şurasının birgə təşkilatçılığı
ilə gənc arxeoloq alim və tələbələrin beynəlxalq
yay məktəbinə start verilib.
Məqsəd
respublikada və dünyada arxeologiya sahəsində aparılan
tədqiqatların nəticələri və əhəmiyyət
kəsb edən əsas istiqamətlər üzrə
müzakirələrə gənclərin cəlb
olunmasıdır.
AMEA-dan AZƏRTAC-a bildirilib ki, tədbirin açılış mərasimində çıxış edən şuranın sədri, fizika üzrə fəlsəfə doktoru, dosent Famin Salmanov akademiyada gənc alim və mütəxəssislər üçün yay və qış məktəblərinin təşkilinin ənənə halını aldığını bildirib. Qeyd edib ki, ötən dövr ərzində şuranın təşkilatçılığı ilə Şamaxıda gənc kimyaçılar üçün yay məktəbi, Bakıda isə gənc bioloqlar üçün qış məktəbi uğurla təşkil olunub. Bu dəfə ictimai elmlər üzrə ixtisaslaşmış tarixçi və arxeoloq gənclərin aktual mövzularda beynəlxalq həmkarları ilə birgə fikir mübadiləsinə cəlb olunması nəzərdə tutulub.
F.Salmanov hazırda koreyalı arxeoloqların Qəbələdə tədqiqatlar apardıqlarını və bunun yay məktəbinin iştirakçıları üçün təcrübə baxımından əhəmiyyətli olduğunu vurğulayıb.
Sonra Arxeologiya və Etnoqrafiya İnstitutunun aparıcı elmi işçisi, tarix üzrə fəlsəfə doktoru Ceyhun Eminlinin "Qəbələdə arxeoloji tədqiqatlar və ilkin nəticələri" mövzusunda məruzəsi dinlənilib. O, çıxışında Qafqaz Albaniyası və onun paytaxtı olmuş Qəbələ haqqında yazılı mənbələr, burada aparılmış ilk arxeoloji tədqiqatlara dair məlumat verib, həmçinin son illər rayonun Səlbir ərazisindəki qazıntılardan danışıb. Ərazidə aşkar olunmuş antik və orta əsr tikili qalıqları, su təchizatı sistemi, istehsalat qurğuları və qəbirlər gənc alimlərin böyük marağına səbəb olub.
Beş gün
davam edəcək yay
məktəbinin iştirakçılarının
dünyanın sivilizasiya tarixi
və mədəniyyəti üçün
böyük əhəmiyyət kəsb edən
“Səlbir” ərazisinə ekskursiyası nəzərdə tutulur. Bundan əlavə,
iştirakçılar çöl tədqiqatlarında
da iştirak edəcəklər.
Xalq cəbhəsi.-2019.- 11-12 iyul.-
S.6.