“Azərbaycanda rəssamlıq sahəsində son zamanlarda hərəkətlənmə başlayıb

Elşən Karaca: “İstər beynəlxalq, istərsə də yerli əhəmiyyətli sərgilər artıq daha fərqli formatda keçirilir”

Müasir İncəsənət Mərkəzində Azərbaycan Rəssamlar İttifaqının təşkilatçılığı ilə təsviri sənət həftəsi çərçivəsində “ÜstArt” sərgisinin açılışı keçirilib. Bildirək ki, sərginin ərsəyə gəlməsində rəssam Bəhram Xəlilov əsas kurator, Elşən Karaca isə köməkçi kurator olaraq rol oynayıb.

Qeyd edək ki, sərgi aprelin 22-dək davam edəcək.

E.Karaca həmçinin sərgi və Azərbaycanda bu sahənin ümumi vəziyyəti ilə bağlı suallarımızı da cavablandırdı.

- Bildirim ki, “ÜstArt” sərgisi tamaşaçılara incəsənətlə daha yaxından tanış olmaq məqsədilə təsviri sənət həftəsi boyunca tanınmış rəssamların masterklas və ustad dərslərində iştirak etmək şansı yaradır. Bir həftə boyunca sərgi çərçivəsində hər gün ayrı rəssamın masterklası olacaq və masterklasa qoşulanlar özləri də rəsm çəkərək rəssamlarla birlikdə işləmək şansından yararlanacaqlar.

Sərgidə heykəltəraşlıq, qrafika və rəngkarlıq əsərlərindən ibarət 50-dən çox tanınmış rəssamın sənət əsərləri nümayiş olunur. Bu sərgini digərlərindən fərqləndirən cəhətlərindən biri də multidisiplinar tədbir olaraq planlanmasıdır. Belə ki, rəssamlardan ibarət qrup sərgidə yalnız rəsm əsərləri ilə deyil, həm də musiqi nümunələri ilə də çıxış etdilər. “Ocaq” qrupu ilə tanınan rəssamlar sərgi zamanı etnik musiqi formatında flaşmob hazırladılar. Musiqi nömrəsi gözlənilməzliyi ilə yanaşı, ifa tərzi ilə də tamaşaçıları təəcübləndirməyi bacardı. Layihənin çoxşaxəli olması sənətçilərin bir çox tərəfdən insanlarla yaxınlaşmasında bilavasitə rol oynayır.

- Elşən bəy, bilmək istərdik ki, Azərbaycanda rəssamlıq sahəsinə maraq hansı yerdədir? Müşahidələriniz nə deyir?

- Ümumi olaraq götürsək deyə bilərəm ki, Azərbaycanda pandemiyadan sonra rəssamlıq sahəsində əvvəlki illərə nisbətən durğunluq yaşanırdı. Amma son zamanlarda hərəkətlənmə başlayıb, dövlət səviyyəsində bu sahəyə diqqət artmağa başlanıb. Müxtəlif incəsənət layihələri və sərgilər həyata keçirilir. İstər beynəlxalq, istərsə də yerli əhəmiyyətli sərgilər artıq daha fərqli formatda keçirilir. Əvvəllər eynilik baş verirdi, eynitipli sərgilər keçirilirdi. İndi daha fərqli və daha müasir sərgilər keçirilməyə başlanıb. Bu, bəlkə də insanların eynilikdən sıxılmasının da təzahürü ola bilər. Həmçinin bu, incəsənətin inkişafı üçün çox müsbət haldır.

- Çəkdiyiniz əsərlərinizi satırsınızmı? Satırsınızsa insanlarda almağa istək olurmu?

- İşlədiyim əsərləri satıram. Düşünürəm ki, bu belə də olmalıdır. Çünki rəsm əsəri işlənib bitdikdən sonra öz yeni məkanını tapmalıdır və ora öz işığını yaymalıdır. İnsanlarda rəsm almağa istək həmişə olub, sadəcə hər rəssamın öz alıcısı olur və bu, çox olmur. Çünki incəsənət tələbat yox, zövq işidir.

-Bir rəsm əsərinin ərsəyə gəlməsi haqqında danışardınız. Necə yaranır? və ya bir rəsm əsərinin ərsəyə gəlməsində ən vacib olan nədir?

- Bir rəsm əsərinin ərsəyə gəlməsi üçün xüsusi bir ilham pərisinə ehtiyac duymuram. Mənim üçün həyatda olmaq özü ilham qaynağıdır. Yaşanılan hər şey ilhamvericidir. Sadəcə işlədiyim zaman mən səmimi olmağa çalışıram. Günün tələbinə uyğun deyil, mənə maraqlı hisslər, duyğular və ya mövzular üzərində işləməyi seçirəm. Düşünürəm ki, yaradıcılıq belə olmalıdır. İşlədiyim hər mövzu üzərində uzun müddət araşdırma aparmağı sevirəm. Hər hansı bir mövzunu uzun müddət işləyə bilərəm Çünki araşdırmalarım zamanı müxtəlif eskizlər və fikirlər yaranmış olur. Beləliklə, deyə bilərəm ki, mənim üçün bir rəsmin ərsəyə gəlməyində ən vacib olan peşəkarlıqdan əlavə sənətə qarşı səmimiyyətdir.

-Çox gözəl. Sizə işlərinizdə, yaradıcılığınızda uğurlar diləyirik.

-Çox sağ olun.

Röya İsrafilova

Xalq Cəbhəsi .- 2025.- 17 aprel(№14).- S.14.