Azərbaycan elminin yeni dövrü: qarşıda dayanan ən vacib vəzifələr müəyyənləşdirilir

Prezident İlham Əliyev Azərbaycan Milli Elmlər Akademiyasının 80 illik yubileyinə həsr edilmiş tədbirdə çıxışı zamanı bir çox məsələlərə toxunub. Toxunduğu məsələlər sırasında müasir dövrdə elmi-akademik dairələrin qarşısında duran vəzifələr, elmin töhfə verəcəyi sahələr də yer alıb. Prezident İlham Əliyev çıxışı zamanı Azərbaycan tarixinin tədqiqi və təbliği, ermənilərin saxtalaşdırmalarına qarşı mübarizə, Qərbi Azərbaycanda toponimlərimiz, onların saxtalaşdırma və erməniləşdirilməsi problemi haqqında danışıb.

Dövlət başçısının çıxışında toxunduğu bir çox məsələlərlə bağlı “Xalq Cəbhəsi” millət vəkillərinin fikirlərini öyrənib.

“Prezidentin nitqində Akademiyamızın keçdiyi yol təhlil edilir”

Milli Məclis sədrinin müavini Musa Qasımlı bildirib ki, cənab Prezident İlham Əliyevin Azərbaycan Milli Elmlər Akademiyasının 80 illiyinə həsr edilmiş toplantıdakı nitqi böyük əhəmiyyət daşıyır: “Bu nitqdə Akademiyamızın keçdiyi yol təhlil edilir, müasir şəraitin nədən ibarət olduğu diqqətə çatdırılır və yeni şəraitdə elmimizin qarşısında dayanan ən vacib vəzifələr müəyyənləşdirilir. Akademiya 80 ildə böyük bir yol keçib. Cənab Prezidentin söylədiyi kimi, hansı sistemdə mövcud olmasından aslı olmayaraq Azərbaycan elminə diqqət göstərilib. Həm Ulu Öndər Heydər Əliyev, həm də cənab Prezident İlham Əliyev Azərbaycan elminə, Akademiyaya lazımi qiymət veriblər”.

Müasir şəraitin təhlili

M.Qasımlı bildirib ki, digər bir məsələ müasir şəraitin təhlili idi: “Cənab Prezident nitqində müasir dövrdə dünyada baş verən bütün prosesləri prinsipial olaraq təhlil etdi və ondan çıxış edərək elmimizin qarşısında dayanan vəzifələri konkret olaraq müəyyənləşdirdi. Hər şeydən əvvəl, ölkəmizdə yeni texnologiyaların tətbiqini, süni intellektə ayrılan diqqəti, tükənən neft kapitalının tükənməyən insan kapitalına çevrilməsini, informasiya təhlükəsizliyini önə çıxardı. Bildirdi ki, informasiya təhlükəsizliyi sadəcə virtual məkanda, informasiya məkanında təhlükəsizlik deyil, bu, eyni zamanda, hər hansı bir ölkənin, dövlətin fiziki mövcudluğu məsələsidir. Ona görə də kibertəhlükəsizlik mərkəzinin yaradılmasının nə qədər böyük əhəmiyyət daşıdığı cəmiyyətimizə bildirildi”.

Elmin nailiyyətlərinin istehsalata tətbiqi

Deputatın sözlərinə görə, Prezidentin nitqində vurğulanan ən vacib məsələlərdən biri elmin nailiyyətlərinin istehsalata tətbiq olunması, müdafiə sənayesinə xüsusi diqqətin yetirilməsi, dövlət orqanlarının alimlərlə birgə işləməsinin zəruriliyi idi: “İndi dünyada elə bir şərait yaranıb ki, həmin sahəyə xüsusi diqqət yetirilməsində fayda var. Milləti ayaqda saxlayan onun tarixi və dilidir. Nitqində cənab Prezident tariximizin tədqiqini, təbliğini önə çəkdi və eyni zamanda, bizə qarşı xaricdəki erməni diasporu və Ermənistanda olanlar tərəfindən aparılan uydurma təbliğata cavab verilməsinin vacibliyini bildirdi. Xüsusi vurğuladı ki, bu məsələdə çarizm dövründə olan xəritələrdəki toponimlər böyük mənbədir, bu, ərazinin mənsubiyyəti məsələsini, etnomədəni kimliyini təsdiq edir. Bununla cənab Prezident toponimika sahəsində məşğul olan alimlərin, tarixçilərin, coğrafiyaçıların və digərlərinin qarşısında mühüm vəzifələr qoydu”.

Milli dövlətçilik tarixi

O əlavə edib ki, məsələnin digər çox zəruri tərəfi cənab Prezidentin nitqində milli dövlətçilik tariximizin yazılmasıdır: “Müstəqillik tarixinin dərindən yazılması, onun müxtəlif tərəflərinin araşdırılması vətəndaşlarda milli dövlətçilik hislərinin artırılmasında müstəsna rol oynayır və cənab Prezidentimiz bu məsələni önə çəkdi. Nitqdə Azərbaycan dili ilə bağlı məsələnin irəli sürülməsi, dilimizin saflığının qorunması ən ümdə məsələ kimi diqqətə çatdırıldı. Bizi bir millət olaraq ayaqda saxlayan əgər bir tərəfdə milli tariximizdirsə, o biri tərəfdə Ana dilimizdir, dövlətimizin dilidir və bu dilin qorunması çox vacibdir. Dili zibilləmək olmaz, zaman-zaman dilin lüğət tərkibi daim zənginləşər. Ona görə də cənab Prezidentimiz bu nitqində dilçi alimlər qarşısında da çox prinsipial məsələlərin həllini qoydu. Hesab edirəm ki, Akademiyanın 80 illik yubiley toplantısında cənab Prezident İlham Əliyevin nitqi Azərbaycan elmininin inkişafında, ən vacib məsələlərin həllində yeni səhifə açır”.

Çoxsaylı dövlət proqramları

Milli Məclisin deputatı Aydın Mirzəzadə bildirib ki, cənab Prezidentin Milli Elmlər Akademiyasının 80 illik yubiley tədbirində iştirakı Azərbaycan dövlətinin elmə, elmin inkişafına diqqətinin yüksək nümunəsi oldu: “Eyni zamanda, Prezidentin hərtərəfli, dərin çıxışı ölkə Prezidentinin elm, təhsil məsələlərini daim diqqətdə saxlaması, onun problemlərinin həll edilməsinə qayğı göstərməsinin nümunəsi oldu və bu zaman Ulu Öndər Heydər Əliyevin vaxtilə elmin inkişafına göstərdiyi qayğını vurğulaması onu göstərir ki, o xətt, o münasibət bundan sonra da davam edəcək. Cənab Prezident elmin və onun ayrı-ayrı sahələrinin inkişafı ilə bağlı çoxsaylı dövlət proqramları, fərman və sərəncamlar verib. Elmin inkişafına dövlət büdcəsindən hər il daha çox vəsaitlər ayrılıb. Elmi təşkilatların maddi-texniki bazasının möhkəmləndirilməsi, bina və laboratoriyaların təmiri də bu qəbildən olan məsələlərdir”.

Gənc alimlərin yetişdirilməsi

Deputat deyib ki, elmi tədqiqatlar dövlətin diqqətində olub və həqiqətən də maraq doğuran, Azərbaycanda elmin inkişafına dəstək olan sahələr dövlət tərəfindən müdafiə olunur: “Həmçinin gənc alimlərin yetişdirilməsi Azərbaycan dövlətinin əsas inkişaf sahələrindən olub. Gənc istedadlarımızın nüfuzlu xarici universitetlərdə təhsil alması da bu qəbildən olan məsələlərdəndir. Cənab Prezident Elmlər Akademiyasında dəfələrlə çıxış edib, alimlərin fəaliyyəti ilə tanış olub, onlar qarşısında dövlət adından müəyyən vəzifələr qoyub. Bu, göstərir ki, Elmlər Akademiyası dövlətin qayğısındadır, dövlət başçısının diqqətindədir və bundan sonra da dövlət milli elmimizin inkişafına daim qayğı göstərəcək. Əsas vəzifələr cənab Prezidentin çıxışında öz əksini tapdı. Müasir elmin inkişafı ilə ayaqlaşmaq, Azərbaycan dövlətinin tarixininin, ədəbiyyatının öyrənilməsinə diqqət yetirmək, onun inkişafına töhfə vermək, eyni zamanda, elmi nailiyyətlərdə Azərbaycan alimlərinin də töhfə verməsinə şərait yaradılması, işğaldan azad olunmuş torpaqlarımızın bərpası, orada elm və təhsilin inkişafı, eləcə də Qərbi Azərbaycan mövzusunun daim diqqətdə saxlanması, bu məsələdə Azərbaycan elminin də iştirakı arzu olunandır və bundan sonra da olacaq”.

Röya İsrafilova

Xalq Cəbhəsi .- 2025.- 6 noyabr (№41).- S.3.