Azərbaycanlı pianoçunun albomu beynəlxalq musiqi platformalarında yerləşdirilib

Müasir musiqi ifaçısı kimi tanınan istedadlı pianoçu Humay Qasımzadənin albomu Amerika Bəstəkarları Forumunun məşhur “İnnova Recordings” səsyazma şirkəti tərəfindən seçilərək dünyada tanınan “Apple music”, “Amazon music”, “Spotify” və digər musiqi platformalarında yerləşdirilib.

Azərbaycanlı pianoçunun bu platformalarda təbliğ edilən ifasına müasir Azərbaycan bəstəkarlarının solo fortepiano üçün yazdığı əsərlər daxildir. Albomda Türkər Qasımzadənin fortepiano və canlı elektronika üçün yazılmış "Zikr", Tahir İbişovun "Keçmişin çalarlarının kətan üzərində sezilməyən oyunları", Ayaz Qəmbərlinin "Riqa yağışda", Elmir Mirzoyevin "5 üslub", Said Qəninin "Toccata (“Dəmiri isti-isti döyərlər)" əsərləri yer alır.

“İnnova” səsyazma şirkəti Humay Qasımzadənin bu albomunu tanınmış amerikalı musiqişünaslara rəy yazıları üçün də təqdim etməyi planlaşdırıb.

Xalq Cəbhəsi .- 2026.-  15 yanvar (№2).- S.16.