“Sülh sazişinə qarşı real maneə qalmayacaq”

“Azərbaycan və Ermənistan arasında real sülh gündəliyi mövcuddur və bu gündəlik üzrə münasibətlərin normallaşdırılması istiqamətində ciddi addımlar atılır”.

Bunu politoloq Elçin Xalidbəyli Xalqcebhesi.az-a açıqlamasında bildirib.

Onun sözlərinə görə, Azərbaycanın öz ərazisi vasitəsilə Ermənistana yüklərin daşınmasına imkan yaratması, eləcə də rəsmi Bakının siyasi iradə nümayiş etdirərək Ermənistana enerji resurslarının satılması barədə qərar qəbul etməsi mühüm etimad qurucu addımlardır: “Artıq bir neçə ildir ki, neftlə yüklənmiş Azərbaycan qatarları Ermənistana göndərilir. Bu, iki ölkə arasında münasibətlərin normallaşdırılması üçün kifayət qədər əlverişli mühitin formalaşdığını göstərir.Bütün bunlara baxmayaraq, yekun sülh sazişinin imzalanması yolunda hələ də müəyyən problemlər qalmaqdadır. Onun fikrincə, bu problemlərin başında Rusiyanın Cənubi Qafqazdakı maraqları və Moskvanın Ermənistan üzərində təsir mexanizmlərinin müəyyən dərəcədə qorunub saxlanılması dayanır. Düzdür, avqustun 8-də Azərbaycan, ABŞ və Ermənistan arasında TRIPP layihəsi üzrə əldə olunan anlaşmadan sonra Rusiyanın təsiri nisbətən balanslaşdırılıb, hətta müəyyən mənada zəiflədiyi də müşahidə olunur. Ancaq bu faktor hələ də tam aradan qalxmayıb”.

Politoloqun sözlərinə görə, yekun sülh sazişinin imzalanması üçün ümumilikdə münbit şərait mövcuddur, lakin iki mühüm amil prosesi həlledici şəkildə təsirləndirir: “Bunlardan biri Ermənistanda keçiriləcək növbəti parlament seçkiləridir. Rusiya bütün diqqətini bu seçkilərə yönəldib və Paşinyan hakimiyyətinin dəyişdirilməsinə çalışır. Əgər Kreml buna nail olarsa, Azərbaycan və Ermənistan arasında yekun sülh sazişinin imzalanması ciddi şəkildə əngəllənə bilər. Çünki Rusiyaya bağlı siyasi şəbəkələrin hakimiyyətə gətirilməsi Kremlin təlimatları ilə idarə olunan yeni siyasi sistemin formalaşması deməkdir”.

Elçin Xalidbəyli əlavə edib ki, əgər Paşinyan hakimiyyəti parlament seçkilərində mövqeyini qoruya bilsə, bu halda ilin sonunadək Ermənistanda referendumun keçirilməsi və konstitusiyaya dəyişiklik edilərək Azərbaycana qarşı ərazi iddialarından tam imtina olunması ehtimalı yaranacaq: “Bu ssenari reallaşarsa, Azərbaycan və Ermənistan arasında yekun sülh sazişinin imzalanması qarşısında heç bir real maneə qalmayacaq. Məhz bu səbəbdən Cənubi Qafqazda davamlı sülhün və sabitliyin təmin olunması baxımından Ermənistanda mövcud hakimiyyətin parlament seçkilərində qalib gəlməsi olduqca vacib və həlledici amildir”.

Günel Elxan

Xalq Cəbhəsi .- 2026.-  15 yanvar (№2).- S.4.