Azərbaycan mediasından Türk jurnalistlərinə müraciət

Ölkənin kütləvi informasiya vasitələri türkiyəli həmkarlarını AKP hökumətinin Ermənistan siyasətinə etiraz etməyə çağırdılar

Türkiyə-Ermənistan münasibətlərindəki yaxınlaşma Azərbaycan mətbuatını da ciddi şəkildə narahat edir. Ötən gün ölkənin kütləvi informasiya vasitələrinin nümayəndələri türkiyəli həmkarlarına müraciət ünvanladı. Müraciət Azərbaycan Mətbuat Şurasında imzalandı. Ölkənin aparıcı KİV rəhbərlərinin bir araya gəldiyi toplantını giriş sözü ilə açan Şuranın sədri Əflatun Amaşov bildirdi ki, son günlər Türkiyə və Ermənistan arasında münasibətlərin yaxşılaşdırılması ilə bağlı atılan addımlar, bu məsələylə əlaqədar Türkiyə KİV-də yer alan yazılar ictimaiyyəti narahat edir. Türkiyə ilə Ermənistan arasında sərhədlərin bağlanmasının tarixinə toxunan MŞ sədri qeyd etdi ki, o zaman ermənilərin Türkiyəyə qarşı ortaya qoyduqları iddialardan əl çəkmələri ilə yanaşı Azərbaycanın işğal altında olan torpaqlarının azad olunması şərti də ortaya qoyulub.

"Dağlıq Qarabağ torpaqları erməni işğalından azad olunmayana qədər Türkiyənin Ermənistanla sərhədləri açması yolverilməzdir. İndiki şəraitdə sərhədlərin açılması və Türkiyə mətbuatında bu məsələylə bağlı özünə yer alan narahatedici xəbərlər heç cür başadüşülən deyil. MŞ tərəfindən məsələ ilə bağlı Türkiyə KİV-inə müraciət hazırlanıb.

Daha sonra "Xalq Cəbhəsi" qəzetinin baş redaktoru Elçin Mirzəbəyli ünvanlanan müraciətin mətnini tədbir iştirakçılarının nəzərinə çatdırdı: "Son vaxtlar Türkiyə ilə Ermənistan arasında sərhədlərin açılacağı, diplomatik və iqtisadi əlaqələrin qurulacağı haqqında xəbərlər bütün Azərbaycan ictimaiyyəti kimi, biz jurnalistləri də ciddi narahat etməkdədir. Türkiyənin hakimiyyət nümayəndələrinin bu xəbərləri təkzib etməməsi, eyni zamanda, qardaş ölkənin ictimai-siyasi xadimlərinin çıxışlarında və mediada Ermənistanla Türkiyə arasında əlaqələrin qurulmasını təsdiq edən çoxsaylı faktların açıqlanması bu müraciətin ünvanlanmasını zərurətə çevirən əsas səbəblərdir.

Sənəddə bildirilir ki, Türkiyə ilə Ermənistan arasında münasibətlərin qurulmasından əvvəl bu dövlətlər arasındakı sərhədlərin bağlı olması səbəblərinə, mövcud durumu zəruri edən amillərə, atılması planlaşdırılan addımın haqq-ədalət prinsiplərinə adekvatlığına, nəhayət, eyni soykökə malik, dili, dini, mədəniyyəti, adət-ənənələri bir olan millətin məskunlaşdığı iki ölkə arasındakı münasibətlərə göstərəcəyi təsirə nəzər salınmalıdır".

Bununla yanaşı, müraciətdə bildirilib ki, Azərbaycan xalqı hər zaman Türkiyənin yanında olduğunu nümayiş etdirib. Azərbaycan ictimaiyyəti, dövlət və vətəndaş cəmiyyəti institutlarının nümayəndələri, xaricdəki diaspor təşkilatlarımız Ermənistanın ölkəmizə qarşı işğalçılıq siyasəti ilə yanaşı, Türkiyəyə qarşı "soyqırımı" və ərazi iddialarının ifşa olunması istiqamətində də məqsədyönlü fəaliyyət göstəriblər: "Ermənistan işğal olunmuş Azərbaycan torpaqlarının qeyd-şərtsiz boşaldılması ilə bağlı BMT-nin qətnamələrini yerinə yetirmir, Avropa Şurası, İslam Konfransı Təşkilatı və digər mötəbər beynəlxalq qurumların çağırışlarına məhəl qoymur, ATƏT-in Minsk Qrupunun vasitəçiliyi ilə Ermənistan-Azərbaycan Dağlıq Qarabağ münaqişəsinin həlli istiqamətində aparılan danışıqlar prosesində barışmaz mövqe nümayiş etdirir. Belə bir vəziyyətdə Türkiyənin Ermənistanla sərhədləri açması və hərtərəfli əlaqələr qurmasından yalnız Ermənistanın faydalanacağına şübhə qalmır. Əminik ki, bu addım Azərbaycanla Ermənistan arasındakı danışıqlar prosesinə mənfi təsir göstərəcək, Ermənistanın işğalçı siyasətinə bəraət qazandıracaq və onu yeni işğallara həvəsləndirəcək. Digər tərəfdən, Türkiyə Ermənistanla əlaqələr qurduqdan sonra da ermənilərin Türkiyəyə qarşı ərazi iddiası ilə çıxış edəcəyi, erməni lobbisinin "soyqırımı"nı tanıtmaq cəhdlərindən əl çəkməyəcəyi şübhə doğurmur".

Keçirilən yığıncaqda türkiyəli həmkarlarına üz tutan Azərbaycan KİV-nin müraciətində vurğulanıb ki, mediamız Türkiyə KİV-inin hər iki ölkənin maraqlarına zidd addımlar atılmasına imkan verməyəcəyinə ümidlidir: "Biz tarixin sərt məqamlarında türkiyəli həmkarlarımızın ədalətin müdafiəsinə qalxma cəsarətinə, yüksək peşəkarlığına, dəyanətinə və dönməzliyinə istinad edərək sizi "bir milllət, iki dövlət" ideyasına zərbə vura biləcək təhlükənin qarşısının alınmasında yenə öncüllük göstərməyə səsləyirik. İnanırıq ki, sizin həmrəyliyiniz, əməli fəaliyyətiniz və qətiyyətiniz AKP iqtidarının Ermənistanla sərhədləri açmaq niyyətinin qarşısına keçilməz sədd çəkəcək".

Bundan sonra müraciətlə bağlı fikirlərini bildirmək üçün söz tədbirdə iştirak edən digər media rəhbərlərinə verildi.

"Səs" qəzetinin baş redaktoru Bəhruz Quliyev öz çıxışında vurğuladı ki, Azərbaycan KİV-i tərəfindən belə bir müraciətin ünvanlanması çox vacibdir: "Çünki Azərbaycan üçün böyük əhəmiyyət kəsb edən bu hadisədə iqtidar-müxalifət məsələsi bir kənara qoyulmalıdır. Hər bir KİV rəhbəri azərbaycanlı mövqeyindən çıxış edərək müraciətə mütləq imza atmalıdır".

"Şərq" qəzetinin baş redaktoru Akif Aşırlı bildirdi ki, Türkiyədə hakimiyyətdə olan qüvvələrin sərgilədiyi siyasət Türkiyə ictimaiyyətinin mövqeyi kimi səciyyələndirə bilməz: "Türkiyə regionda Azərbaycanın strateji müttəfiqidir. Bu ölkədə iqtidarın yürütdüyü siyasət Azərbaycanın maraqlarına ziddir. Ona görə də hesab edirəm ki, Azərbaycan KİV-inin mövqeyi tamamilə doğrudur. Hesab edirəm ki, cəmiyyətin digər təbəqələri, siyasi partiyalar, qeyri-hökumət təşkilatlara da bizim bu işimizə dəstək olmalıdır. Çünki xeyli müddət idi ki, həm Türkiyə mətbuatında, həm dünya mətbuatında Türkiyə ilə Ermənistan arasında danışıqların getdiyi, sərhədlərin açılmasına hazırlıq görüldüyü barədə yazılar yazılırdı. Amma düşünürəm ki, yenə də gec deyil. Bizim bu həmrəyliyimiz ümumi türk həmrəyliyindən doğan bir jestdir. Bizim atdığımız addım türkiyəli həmkarlarımız tərəfindən də dəstəklənəcək".

"Bakı Xəbər" qəzetinin baş redaktoru Aydın Quliyev də bu müraciətin Türkiyə KİV-ni hərəkətə gətirəcəyinə inandığını söylədi: "Ermənistana qarşı Türkiyə rəhbərliyi tərəfindən tutulan mövqe sadə türk ictimaiyyətinin mövqeyi kimi başa düşülməməlidir. Bu, Türkiyədə hakimiyyətdə olan siyasi qüvvənin hansısa təmayüllərlə yürütdüyü siyasətdir. İnanırıq ki, yaxın gələcəkdə Türkiyədə Azərbaycanın, ümumilikdə Türk dünyasının maraqlarına hörmətlə yanaşan qüvvələr hakimyyətə gələcək".

"Xalq Cəbhəsi" qəzetinin baş redaktoru bu müraciətlə bağlı xəbərin KİV-lərin baş yazısı olmasını təklif etdi. Elçin Mirzəbəylinin təklifi digər media qurumlarının rəhbərləri tərəfindən də dəstəkləndi.

Qeyd edək ki, müraciət dünən Türkiyənin Azərbaycandakı səfirliyinə təqdim olunub və qardaş ölkənin bütün kütləvi informasiya vasitələrinə göndərilib.

Ülviyyə Şamilqızı

Xalq Cəbhəsi .- 2009.- 8 aprel.- S.7.