Mədəniyyətimiz Danimarkada təbliğ olunur

Danimarkanın Fredensborq bələdiyyəsinin Nivo şəhərində BMT-nin "Dünya Mədəniyyətləri Dialoqu" layihəsi çərçivəsində "Fergli ve Birge" adlı kütləvi tədbir keçirilib. Diasporla İş üzrə Dövlət Komitəsindən daxil olan məlumata görə, tədbirin təşkilində Danimarka-Azərbaycan Dostluq Cəmiyyəti də fəal iştirak edib. Danimarkada fəaliyyət göstərən ictimai, mədəni və milli icmaların, uşaq və gənclər təşkilatlarının iştirakıyla təqdim olunan müxtəlif xalqların milli yeməklərinin, əl işlərinin, rəsm əsərlərinin sərgisinin, eləcə də beynəlmiləl musiqi, rəqs və tamaşaların nümayiş etdirildiyi tədbirdə Fredensborq burqomisteri Olav Aaen çıxış edərək Danimarka hökumətinin bu layihəni reallaşdırmasının məqsədi və gələcəkdə həyata keçiriləcək planlardan danışıb. "Fergli ve Birge" layihəsinin işçi qrupunun üzvü, Danimarka-Azərbaycan Dostluq Cəmiyyətinin sədri Elxan Hüseynov isə öz çıxışında mədəniyyətlərarası dialoqun vacibliyindən, cəmiyyətin bu layihə çərçivəsində fəaliyyətindən söz açıb. Tədbirdə Azərbaycan musiqisi Kəmalə Maisqızının ifasında tamaşaçılara təqdim olunub. Bununla yanaşı, Azərbaycan Respublikasını təbliğ edən stend də sərgilənib. Stenddəki Azərbaycan Respublikasının dövlət rəmzləri, dövlət başçısı haqqında məlumat, Ermənistan hərbi birləşmələrinin işğal etdiyi ərazilərimizin xəritəsi və bununla bağlı ətraflı izahat, eləcə də ölkəmiz haqqında digər bilgilər tədbirə qatılanların marağına səbəb olub.

Turqut

Xalq Cəbhəsi.- 2009.- 29 aprel.- S.4.