Ədliyyə Nazirliyinin Bələdiyyələrlə İş Mərkəzi hesabat verdi

Çirkli pullara nəzarət üçün yeni mexanizm formalaşdırılacaq

"Qanunvericilikdə Türkiyə türkcəsinin Azərbaycan türkcəsinə tərcümə edilməsilə bağlı imperativ tələb yoxdur"

Ramiz Mikayıloğlu

Dünən Milli Məclisin iclası keçirildi. Cari məsələlər üçün ayrılmış vaxtda çıxış edən AVP sədri Fəzail Ağamalı Bakının Xəqani, Nizami, Səməd Vurğun və digər mərkəzi küçələrində yerləşən mağazalarda rus dilində danışılmasına diqqət çəkdi. Mağazaların, restoranların da adları, o cümlədən restoranlardakı menyu da Azərbaycan dilində deyil. Onun fikrincə, bu "Azərbaycan dili haqqında" qanuna ziddir. Ancaq millət vəkili bu kimi hallara görə ayrı-ayrı insanların cəzalandırılması barədə məlumatlara rast gəlinmədiyini söylədi. O, spiker Oqtay Əsədovdan xahiş etdi ki, müvafiq qurumlarla danışsın və Bakının mərkəzi küçələrindəki mağaza və restoranlarda monitorinq aparılsın. Deputat Fəzail Ağamalı Qubada üzə çıxarılmış insan sümüklərinin məhv olmaq təhlükəsiylə üzləşdiyini nəzərə çatdırdı. Onun fikrincə, məzarlığın qorunması yönündə işlərin görülməsi üçün prezident sərəncamına ehtiyac var.

Müsavat deputat qrupunun üzvü Arzu Səmədbəyli qlobal maliyyə böhranına toxundu və sanki böhranın Azərbaycandan yan keçdiyi görüntüsünün yaradılmağa çalışıldığını bildirdi. Millət vəkili qazın, elektrik enerjisinin, suyun qiymətinin iki dəfə aşağı salınmasını təklifini irəli sürdü: "Enerji daşıyıcılarının qiyməti üç dəfə artandan sonra əhali çıxılmaz duruma düşüb". Arzu Səmədbəyli İqtisadi İnkişaf Nazirliyini böhranın zərərlərini sahibkarlardan çıxarmağa çalışdığını iddia etdi: "Əvvəllər nazirliyin işçiləri sahibkarlardan bir alırdılarsa, indi 3 qat alırlar".

Spikerin də cavabı gecikmədi: "İstəyirsiniz ki, iqtisadi böhran Azərbaycana təsir etsin? Böhran Azərbaycana o qədər də təsir etməyəcək".

Millət vəkili Vahid Əhmədov Rusiyanın Ermənistana 800 milyon dollarlıq silah və sursat ötürməsilə bağlı məsələnin parlamentdə müzakirəsinin gecikməməsinin tərəfdar olduğunu açıqladı. Oqtay Əsədov müdafiə nazirimizin Rusiyada danışıqlar apardığını və müvafiq qərar qəbul ediləcəyini söylədi.

"Evlər sökülməsin"

BQP sədri Fazil Mustafa Kollektiv Təhlükəsizlik Müqaviləsi Təşkilatına üzv dövlətlərin, Ermənistan da daxil olmaqla, birgə hərbi birləşmələr yaratmaq barədə qərar verdiklərini xatırlatdı: "Bəs Azərbaycan hansı addımlar atacaq? Rəsmi şəxslər məsələyə aydınlıq gətirməlidirlər".

Fazil Mustafa deputat seçildiyi Sabunçu rayonunda qanunsuz tikilmiş evlərin sökülməsiylə bağlı çoxsaylı məhkəmə qərarlarının olduğunu dedi. O, vəziyyətdən çıxmaq üçün müvafiq bir yol tapılmasının və vətəndaşlara humanist yanaşılmasının tərəfdarıdır: "Həmin vətəndaşlara evlərinin sökülməsinə görə kompensasiya verilə bilər. Belə yoxsul vətəndaşlar çölə atılmamalıdırlar".

Millət vəkili son vaxtlar Azərbaycanda geniş yayılmağa başlayan şəbəkə oyunlarına da son qoyulmasını zəruri sayır: "Bu oyunlar Daxili İşlər Nazirliyinin gözü qarşısında baş verir, yüzlərlə insan aldadılır. Nazirlik şəbəkə oyunlarının qarşısını almaq üçün əhali arasında qeyri-rəsmi maarifləndirmə işi aparmalıdır".

Millət vəkili İqbal Ağazadə parlamentin yaz sessiyasında hökumətin tərkibində müdafiə və xarici işlər nazirlərinin də hesabat verməsini gərəkli saydı. O, hökuməti restoranlarda, şadlıq evlərində uşaq əməyindən istifadəyə son qoyulması üçün müvafiq addımların atmağa çağırdı: "Restoranlarda gecə saatlarında belə gətirib uşaqlara rəqs etdirirlər. Spiker səlahiyyətlərindən istifadə edib bu məsələni qaldırsın".

"Hərbi prokuror Xocalı faciəli barədə hesabat versin"

Millət vəkili Cəmil Həsənli iki həftədən sonra 17-ci ildönümü tamam olacaq Xocalı soyqırımıyla bağlı Hərbi Prokurorluğun hansı araşdırmaları aparmasıyla maraqlandı və hərbi prokurorun bu məsələylə əlaqədar hesabat verməsinin gələn iclasın gündəliyinə salınmasını vacib saydı. O, yüksək mərtəbəli və istilik sistemləri olmayan binalarda qazdan istifadədə təhlükəsizlik tədbirlərinə də toxundu: "Bəs o binalarda yaşayan insanlar nə ilə qızınmalıdırlar? Günümüzdə tikilən yüksək mərtəbəli binalarda da istilik sistemi nəzərdə tutulmayıb". Cəmil Həsənli insanlara 5-10 ilin işıq, qaz borcları ilə bağlı yüksək məbləğin əksini tapdığı bildirişlərin gəlməsinə də diqqət çəkdi: "Bu məsələyə də son qoyulmalıdır".

Fərqli təşviqat qruplarının qeydiyyata alınması üçün Milli Məclisin Mərkəzi Seçki Komissiyasına xahiş ünvanlamasını istəyən millət vəkili Pənah Hüseyn diqqəti son günlər Hərbi Prokurorluğun Ermənistanın hərbi təcavüzü zamanı baş vermiş cinayətlərlə bağlı yaydığı məlumata yönəltdi: "Həmin siyahıda Robert Köçəryanın, Serj Sərkisyanın adı yoxdur. Prokurorluq siyasi orqan deyil. Hərbi Prokurorluğun bu məsələyə aydınlıq gətirməsini xahiş edirəm". O, Türkiyə türkcəsində yayımlanan film və proqramlara qadağa qoyulmasının qnunvericiliklə əlaqələndirilməsini də doğru saymadı: "Qanunvericilikdə Türkiyə türkcəsinin Azərbaycan türkcəsinə tərcümə edilməsilə bağlı imperativ tələb yoxdur".

Əhəd Abıyev də şəbəkə biznesindən şikayətləndi: "İnsanlardan yüz min manatlarla pul yığırlar. Adını da qoyurlar ki, xaricdəki uşaq evlərinə kömək edirik. Əgər belədirsə, niyə Azərbaycandakı uşaq evlərinə həmin yardımdar verilmir?"

Siyavuş Novruzov Pənah Hüseynin təşviqat qruplarının Milli Məclisin xahişiylə MSK-nın qeydiyyata alması yönündə təklifinə reaksiya verdi: "MSK-a xahişlə təşviqat qruplarını qeydiyyata almır, Seçki Məcəlləsinin tələblərini əsas götürür". O, Hərbi Prokurorluğun Xocalı ilə bağlı qaldırdığı cinayət işində Robert Köçəryanın, Serj Sərkisyanın və digərlərinin adlarının olduğunu da söylədi.

"Parlament televiziyasının yaradılmasına ehtiyac var"

Elmira Axundova deputatların fəaliyyətinin kütləvi informasiya vasitələrində, xüsusən telekanallarda işıqlandırılmadığı qənaətindədir. O, Gürcüstanda parlamentin, millət vəkillərinin fəaliyyətini işıqlandırmaq, siyasi partiyaların pulsuz debatının efirə verilməsi üçün ikinci ictimai kanalın yaradılacağını xatırlatdı: "Azərbaycanda da parlament televiziyasının, yaxud ikinci bir İctimai Televiziyanın yaradılmasına ehtiyac var. Bu məsələ tək spikerin üzərinə düşməsin. Millət vəkilləri imza yığaq və Milli Televiziya və Radio Şurasına müraciət edək".

Oqtay Əsədov dedi ki, Elmira Axundovanın çıxışı məhz spikerin telekanal açmaq istəyinin olduğu anlamı verir: "Məsələni mənim boynuma qoydunuz. Milli Məclisin daxili televiziyası var". Pənah Hüseyn yerindən replika ataraq "o televiziyanı göstərin, dediyiniz kameradır" dedi. Spiker də orjinal cavab verdi: "Pənah bəy, sizin çıxışınızın hamısı həmin daxili televiziyada göstərilir. Əgər televiziya olmasaydı, mikrafona iki dəfə vurardınız, qabağınızda durmaq olmazdı".

Vitse-spiker Bahar Muradova da Pənah Hüseynin referendumla bağlı təşviqat qruplarının qeydiyyatı barədə söylədiklərinə toxundu: "Həmin qrupların qeydiyyatı qanunla müəyyənləşir. Digər tərəfdən, az əvvəl bir qrup müxalifət partiyaları Milli Məclisə müraciət etmişdi ki, referendum qərarı ləğv edilsin. Hər kəs qanunla göstərilmiş qaydada vaxtında hərəkət etməlidir".

Bahar Muradova türkcənin türkcəyə tərcüməsinə haqq qazandırdı. O, MTRŞ-in xarici radiostansiyalarla bağlı qərarının da qanundan qaynaqlandığını vurğuladı. Daha sonra gündəlikdəki məsələlərin müzakirəsinə keçildi.

Maliyyə monitorinq qurumu yaradılacaq

Milli Məclisin Hüquq siyasəti və dövlət quruculuğu daimi komissiyasının sədri Əli Hüseynov üçüncü oxunuşa çıxarılmış "Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında" qanun layihəsi barədə məlumat verdi. Avropa Şurasının qanunun qəbulu prosesində xüsusən maraqlı olduğunu nəzərə çatdıran Əli Hüseynov maliyyə nəzarəti orqanının fəaliyyətindən sahibkarların əziyyət çəkəcəyilə bağlı narahatlıqları aradan qaldırmaq üçün layihəyə bir sıra dəyişikliklər edildiyini dilə gətirdi. Maliyyə nəzarətindən keçəcək pulun minimum məbləğini və əmlakın dəyərini müvafiq icra orqanı müəyyənləşdirəcək. Maliyyə əməliyyatını həyata keçirəcək şəxs bu barədə müvafiq icra qurumuna məlumat verməlidir. Cinayət yolu ilə əldə edilmiş pulla bağlı maliyyə əməliyyatını maliyyə monitorinq qurumu 72 saat ərzində dayandıra bilər. Bu müddət də iki iş günündən çox deyil. Əli Hüseynova görə, operativ araşdırma aparılması üçün Prsessual Məcəlləyə də düzəlişlər edilə bilər.

Qiymətli Kağızlar üzrə Dövlət Komitəsinin sədri Rüfət Aslanlı da qanunun sahibkarlar üçün hər hansı təhdid yaratmadığını düşünür: "Gələn həftə cinayət yoluyla əldə edilmiş pul vəsaitləri və digər əmlakın leqallaşdırılmasına qarşı mübarizə aparan Avropa Şurasının müvafiq qurumunun iclası olacaq. Həmin iclasa qədər qanunun qəbulu yaxşı olardı". Layihə səsverməyə çıxarılaraq qəbul edildi.

"Ədliyyə Nazirliyi hüquqları pozulmuş bələdiyyələrə yardım göstərmir"

Millət vəkilləri bələdiyyələrin fəaliyyətinə inzibati nəzarəti həyata keçirən orqanın-Ədliyyə Nazirliyinin Bələdiyyələrlə İş üzrə Mərkəzinin rəhbəri Vilayət Zahirovun hesabatını da dinlədilər. Regional siyasət daimi komissiyasının sədri Arif Rəhimzadə Ədliyyə Nazirliyinin işinin ildən-ilə təkmilləşdirdiyini söyləsə də, iradını da gizlətmədi: "Ədliyyə Nazirliyi bələdiyyələrin hüquqları pozulduğu halda məsələyə müdaxilə etməlidirmi? Bu, nazirliyin səlahiyyətlərini aşması kimi qiymətləndirilə bilərmi? Yox. Ədliyyə Nazirliyi bu vaxta qədər hüquqları pozulmuş bir bələdiyyəyə də yardım etməyib, "bu, bizim səlahiyyətlərə aid deyil", deyiblər. Bələdiyyələrin parlament qarşısında hesabat verməsi müvafiq qanunvericiliklə tənzimlənməlidir. Bu işdə Ədliyyə Nazirliyinin fəal iştirak etməsini istərdik".

Elmira Axundovanın fikrincə, Ədliyyə Nazirliyinin Bələdiyyələrlə İş üzrə Mərkəzinə 1600 şikayət daxil olubsa, bələdiyyələrin yol verdikləri pozuntu halları bundan 10 dəfə çoxdur. Bələdiyyələr əsasən süni torpaq mübahisələri yaradırlar. Digər tərəfdən, son vaxtlar bir sıra mədəniyyət və incəsənət obyektləri bələdiyyələrə verilir. Ancaq bələdiyyələr ya onlarla maraqlanmır, ya da həmin mədəniyyət və incəsənət oybektlərini gəlir götürmək məqsədiylə biznesmenlərə icarəyə verirlər: "Bələdiyyələrdə ali savad məsələsində də problem var. Məsələn, Masallıda 1401 bələdiyyədən yalnız 40-nın sədri ali təhsillidir. Həm də bələdiyyələr vergi yığa bilmirlər". O, avtomobillərin texniki baxışdan keçirilməsi səlahiyyətinin də Dövlət Yol Polisindən alınaraq, bələdiyyələrə verilməsini lazım sayır: "2002-ci ilə qədər həmin səlahiyyət bələdiyyələrdə olub".

Bələdiyyə sədrləri bir-birlərinin adına torpaq keçirirlər

Gülər Əhmədova xüsusən Bakıdakı bələdiyyə sədrlərinin bir-birinin adına qarşılıqlı olaraq böyük torpaq sahələri keçirərək sənədləşdirdiklərini söylədi. Pənah Hüseyn Sabirabadda bələdiyyənin tapşırığını yerinə yetirən şəxsləri polislərin döyməsindən şikayətləndi. O, Bakı Şəhər Baş Polis İdarəsinə pasport məsələsilə bağlı müraciətinə verilən cavabı da nəzərə çatdırmağı zəruri saydı: "Rafiq Abbasov mənə yazıb ki, həmin şəxsin atası Gürcüstan, anası Azərbaycan vətəndaşı olduğu üçün pasport verilmir. Cənab generalın nəzərinə çatldırıram ki, Azərbaycan qanunvericiliyi bunun əksini deyir". O, bələdiyyələrin icra hakimiyyətinin qoçuları funksiyasını yerinə yetirdiyini bildirdi.

Azay Quliyev icra qurumları ilə bələdiyyələrin səlahiyyətinin qanunla bir daha dəqiqləşdirilməsini zəruri sayır. Deputat təklif edir ki, şəffavlıq üçün hər bir bələdiyyənin İnternet saytı yaradılsın. AVP sədri Fəzail Ağamalı Ramana Südçülük Sovxozunun ərvazisində yaşayan 5 min insanın problemindən söz açdı: "Onlar nə etməlidirlər ki, inzibati ərazi vahidi formalaşsın, öz bələdiyyə sədrlərini seçsinlər?"

Mübariz Qurbanlı xırda bələdiyyələrin birləşdirilməsini zəruri sayır: "Elə kənd var ki, 8 bələdiyyəsi mövcuddur".

Sonda hesabat səsverməyə qoyalaraq qəbul edildi.

Xalq cəbhəsi.- 2009.- 11 fevral.- S. 9.