Qorxma, mən səninləyəm"

Azərbaycanın Rusiyadakı səfiri Polad Bülbüloğlu Aleksandr Nevski mükafatına layiq görülüb

Rusiya diplomatı, bağışlayın, Azərbaycan Respublikasının Rusiya Federasiyasındakı səfiri Polad Bülbüloğlu dünən mükafatlandırılıb. Regionlararası Beynəlxalq Fond adlı təşkilat görkəmli müğənni və diplomatiyanı yeni öyrənən diplomatı Müqəddəs knyaz Aleksandr Nevski mükafatına layiq görüb. "Rossiya" dövlət konsert salonunda keçirilən tədbirdə fondun sədri, SSRİ xalq artisti Vasili Lanovoy və məşhur telejurnalist Yuri Kovelenov müğənni Polad Bülbüloğluna diplom və Aleksandr Nevskinin heykəlciyini təqdim ediblər. Rus mətbuatı yazır ki, bu mükafatı Polad Bülbüloğlu "Millətlərarası sülhün qorunması, Rusiya və Azərbaycan xalqları arasında yekdillik və dostluğun möhkəmləndirilməsi" nominasiyası üzrə alıb. Tədbirin təşkilatçıları Polad Bülbüloğlunun həm Azərbaycanın mədəniyyət naziri kimi, həm də səfir kimi iki ölkə arasında mədəniyyət sahəsində əməkdaşlığın və dostluğun möhkəmləndirilməsində xüsusi rolunu qeyd ediblər. Bu yüksək mükafata Rusiyanın mərhum patriarxı Aleksiy II, keçmiş baş nazir Yevgeni Primakov və başqaları layiq görülüblər.

...Qəribədir. Polad Bülbüloğlu artıq 5 ildən çoxdur ki, Rusiyada səfirdir. Bu müddət ərzində Moskvanın Azərbaycana vurduğu zərbələrin miqyası, sayı ölçüyəgəlməzdir. Elə bu yaxınlarda Rusiyanın Ermənistana 800 milyon dollarlıq silah və texnika verdiyi məlum oldu. Müğənni-diplomatımızın səsi çıxmadı, yaxud çıxdısa, səsi gəlib Azərbaycan mətbuatına çatmadı. Bir tərəfdən, yaxşı ki, Polad Bülbüloğlu danışmadı. Əgər danışsaydı, İrandakı səfir Abbasəli Həsənov kimi Azərbaycan mətbuatını günahlandıracaqdı. Erməniyə milyonlarla dollar dəyərində silah verən Rusiya "aydan arı, sudan duru çıxacaqdı". Bir neçə il əvvəl miqrantlarla bağlı problem ortaya çıxanda səfirimiz Rusiya hökumətinin tərəfini saxladı.

...Nominasiyadakı "millətlərarası sülhün qorunması" sözləri də maraq doğurur. Polad Bülbüloğlu hansı "sülhü qoruyub"? Bəlkə burada Ermənistanın Rusiyadakı səfiri, keçmiş mədəniyyət naziri ilə birgə işğal olunmuş Azərbaycan torpaqlarına səfər edən Polad Bülbüloğlu o qədər canfəşanlıq nəzərdə tutulur. "Xalq diplomatiyası" ilə faktiki olaraq Moskvanın planlarına uyğun addımlar atan, nümayəndə heyətinin işğal olunmuş Azərbaycan torpaqlarına səfərini təşkil edən Polad Bülbüloğlunun "xidmətləri" unudulmayıb. Həmin xalq diplomatiyası "nümunəsinin" Azərbaycan ictimai rəyini necə təlaşlandırdığı, əsəbiləşdirdiyi unudulmayıb.

Səfirimizin cənfaşanlığı hətta Azərbaycanın Xarici İşlər Nazirliyini də mat-məətdəl qoymuşdu. Amma Polad müəllim qorxmurdu, narahat deyildi. Bu hal bir zamanlar onun çəkildiyi "Qorxma, mən səninləyəm" kinofilmini yada salırdı.

Yuxarıdakı informasiyadan da gördünüz ki, bu mükafata layiq görülənlər arasında Azərbaycan xalqına 20 Yanvar faciəsini yaşadanlardan biri, keçmiş baş nazir Yevgeni Primakovdur. Əgər Polad Bülbüloğlu 20 Yanvar faciəsi ilə bağlı bu faktı bilsəydi, yəqin ki, mükafatdan Azərbaycan naminə imtina edərdi.

...Dünən Türkiyənin əsli-nəsli gürcü olan, dinçi baş naziri Rəcəb Tayyib Ərdoğan türklərə türkçülük öyrətməyə çalışıb. Türkiyə ilə Türk Dünyasının əlaqələrinə ciddi zərbə vuran, işğalçı Ermənistanı və terrorçu "Həmas"ı dəstəkləyən Ərdoğan türk-Osmanlı tarixinin iftixar duyduğu səhifələrini xatırladıb. Bu sırada Osmanlı sultanı Səlim Yavuzun Səfəvi İmperiyasının hökmdarı Şah İsmayıl Xətai üzərində qələbə qazandığı Çaldıran döyüşünü də göstərib: "Biz tariximizə baxdıqda Mohaçı, Niğbolunu, Çaldıranı, Malazgirti görürük. İstanbulun fəthini, Çanaqqala dastanını, Qurtuluş savaşımızı görürük. Biz bu ruhla yaşadıq, bu ruhla böyüdük, bu ruhda tərbiyə edildik və gələcəyin Türkiyəsini bu ruh üzərində inşa etməyə çalışırıq".

Əslində gürcü əsilli, dinçi Rəcəb Tayyib Ərdoğanın bu sözləri Osmanlı tarixi ilə fəxr etmək deyil. Məqsədyönlü şəkildə Türkiyə ilə Türk Dünyası, o cümlədən Azərbaycan arasında xatırlanılmasına ehtiyac duyulmayan tarixi faktları xortladıb üzə çıxarmaq cəhdidir. Onu da deyək ki, Şah İsmayıl Xətainin həm Türk Dünyasını, həm də islamı parçalaması, Azərbaycan dövlətçiliyini get-gedə fars dövlətinə çevirməsini hamı bilir. Amma Rəcəb Tayyib Ərdoğan kimi etnik mənsubiyyətini dövlət siyasətinə çevirən yalançı dinçilərin siyasəti Türkiyə-Azərbaycan münasibətlərinə zərər gətirir. Çox təəssüf ki, Türk xalqı səs verərək etnik mənşəyini dövlət siyasətinə çevirən siyasətçiləri hələ də hakimiyyətdə saxlayır.

Bayram

Xalq Cəbhəsi.- 2009.- 19 fevral.- S.4.