Yeni Azərbaycan təşviqat qrupu Sumqayıtda tədbir keçirib

Tədbirdə iştirak edən seçicilər martın 18-də keçiriləcək Referendumda Konstitusiyaya təklif olunan əlavə və dəyişikliklərin lehinə səs verəcəklərini bildiriblər

Martın 18-də Konstitusiyaya təklif edilən əlavə və dəyişikliklərlə bağlı keçiriləcək Referendumla əlaqədar “Yeni Azərbaycan” təşviqat qrupu Sumqayıtda tədbir keçirib. Görüşdə çıxış edən “Yeni Azərbaycan” təşviqat qrupunun Sumqayıt şəhər şöbəsinin sədri Asif İmaməliyev bildirib ki, ölkə Konstitusiyasına təklif olunan əlavə və dəyişikliklər dövlətçiliyimizin möhkəmlənməsinə, insan hüquq və azadlıqlarının genişləndirilməsinə xidmət edir: “Azərbaycanın beynəlxalq aləmdə mövqeyi möhkəmlənib, bir sıra beynəlxalq qurumlara üzv qəbul edilmişik. Digər tərəfdən, Azərbaycan bir sıra insan hüquq və azadlıqları ilə bağlı konvensiyalara qoşulub. Məhz bu yeniliklər Konstitusiyamızda müəyyən dəyişikliklərin edilməsini zərurət halına gətirib çıxarıb. Dünyanın hər bir ölkəsində qanunlar dəyişilir, yenilənir, zamanın tələbinə uyğun şəklə salınır. Bildiyiniz kimi, Konstitusiyaya əlavə və dəyişikliklərin edilməsi ilə bağlı xalqın tələbi Yeni Azərbaycan Partiyası tərəfindən ümumiləşdirilərək parlament səviyyəsində səsləndirilib. Parlamentin razılığı ilə məsələ Konstitusiya Məhkəməsinə təqdim edilib və xalqın ümumi müzakirəsinə verilib. İnanıram ki, martın 18-də keçiriləcək referenduma çıxarılan məsələlər xalq tərəfindən dəstəklənəcək, seçicilərimiz hər zaman olduğu kimi, bu dəfə də dövlətimizin inkişafına, qüdrətlənməsinə, yeniliyə səs verəcək”.

“Yeni Azərbaycan” təşviqat qrupunun səlahiyyətli nümayəndəsi, millət vəkili Nizami İsgəndərov çıxışında bildirib ki, Sumqayıt seçiciləri son prezident seçkilərində olduğu kimi, martın 18-də keçiriləcək refendumda da fəal iştirak edəcəklər: “Sumqayıtlılar hər zaman ictimai-siyasi proseslərdə fəal olublar, ulu öndərimiz Heydər Əliyevin müəyyənləşdirdiyi siyasəti və bu siyasəti uğurla həyata keçirən Prezident İlham Əliyevi dəstəkləyirlər. Bu mənada 101-ci maddəyə təklif olunan dəyişiklik seçicilər tərəfindən dəstəklənir. “Xalqın seçimini məhdudlaşdırmaq olmaz. Bu dəyişiklik məhz xalqın istək və arzusunu ifadə edir” - deyən səlahiyyətli nümayəndənin fikrincə, müxalifətin əks-təbliğatı uğursuzluğa düçar olacaq. Çünki xalq onların yalan üzərində qurulmuş siyasətinə inanmır. N.İsgəndərov vurğulayıb ki, bu layihə xalqımızın sosial rifahının yüksəldilməsinə yaxından kömək edəcək: “Ulu öndərimizin siyasi kursu Azərbaycanı yaşatdı. Bu siyasi kursu davam etdirən Prezidentimiz İlham Əliyev dövlət başçısı olduğu dövrdə dövlətin inkişaf xəttini müəyyənləşdirib və bu strategiyanı uğurla həyata keçirir. Biz məhz bu səbəbdən Peferendum Aktını dəstəkləməklə Prezidentimizə dayaq olmalıyıq”.

Referenduma çıxarılan əlavə və dəyişikliklərlə bağlı geniş izahat verən millət vəkili bu sənəddə yer alan bütün müddəaların xalqın həyatının yüksəldilməsinə xidmət etdiyini bildirib.

Çıxış edən “Yeni Azərbaycan” qəzetinin baş redaktoru Hikmət Babaoğlu Azərbaycan xalqının mühüm tarixi hadisə ərəfəsində olduğunu deyib. Onun sözlərinə görə, dövlət institutlarında, qanunvericiliklərdə vaxtaşırı təkmilləşdirmələrin aparılması inkişaf xəttinin əsas meyarıdır. Azərbaycanın son illərdə böyük inkişaf yolu keçdiyini önə çəkən natiq bu inkişaf nəticəsində ortaya çıxan yeni münasibətlərin tələbindən irəli gələrək hüquq sistemində də müəyyən əlavə və dəyişikliklərə ehtiyac yarandığını qeyd edib: “Xalqdan gələn təkliflər ümumxalq partiyası olan Yeni Azərbaycan Partiyası tərəfindən Milli Məclisdə səsləndirilib və parlamentimiz bu yeniliklər layihəsinin ümumxalq səsverməsinə çıxarılmasına səs verib. Hazırda reallaşan görüşlər, təşviqat kampaniyası da məhz bu əlavə və dəyişikliklərin izahı, xalqın bu yeniliklərlə daha yaxından tanış edilməsi xarakteri daşıyır. Həyata keçiriləcək əlavə və dəyişikliklər ölkəmizdə yeni hüquqi münasibətlərin əsasını qoyacaq və qanunlarımızın daha da təkmilləşməsinə stimul verəcək. Hər bir dövlətin idarə olunmasında qanunlar əsas rola malikdir. Bu qanunların qəbulunun, işlənib hazırlanmasının əsasında isə Konstitusiya dayanır”.

Martın 18-də keçiriləcək referenduma çıxarılan 41 əlavə və dəyişikliyi Azərbaycan vətəndaşlarının hüquq və azadlıqlarının genişlənməsinə, onun sosial rifahının yaxşılaşmasına, vətəndaş-dövlət münasibətlərinin daha da təkmilləşməsinə, eyni zamanda, insanların dini azadlıqlarının təmin olunmasına xidmət edəcək yeniliklər adlandıran baş redaktor qeyd edib ki, bəzi insanların bu məsələyə qara yaxmağa çalışması onların hüquqi arqumentlərə malik olmamasından irəli gəlir: “O baxımdan həmin insanlar yalnız kortəbii halda, pafoslu çıxışlarla diqqəti əsas məsələdən yayındırmağa çalışırlar. Bəzi qüvvələr iddia edirlər ki, Konstitusiyaya əlavələr edilməsi ilə bağlı referendumun keçirilməsi qanuna ziddir. Amma Konstitusiyanı oxumayan bu insanlar unudurlar ki, Ana Yasamızın 3-cü maddəsində göstərilir ki, Azərbaycan xalqı öz hüquqları və mənafeləri ilə bağlı hər bir məsələni referenduma çıxararaq müzakirə edə bilər. Bu, bir daha göstərir ki, xalqın sosial sifarişi kimi meydana gələn bu əlavə və dəyişikliklər Azərbaycanda hakimiyyət-xalq birliyinə kölgə salmaq istəyənlərin maraqlarına xidmət etmir. Çünki bu dəyişikliklər birbaşa xalqın mənafeyinə xidmət edir”.

Konstitusiyaya edilməsi nəzərdə tutulan dəyişikliklərin bir neçə qrupda birləşdiyini deyən H.Babaoğlu burada həm bizim sosial həyatımızı, həm siyasi sferanı, həm dini-əxlaqi meyarları, həm də idarəetmə sistemini əhatə edən maddələrin yer aldığını söyləyib: “Məsələn, Konstitusiyanın 18-ci və 48-ci maddələrinə nəzərdə tutulan əlavə və dəyişikliklər din və dövlət münasibətlərini, o cümlədən, insanların vicdan azadlıqlarını özündə ehtiva edir. Bu iki məsələ bir-biri ilə sıx əlaqədardır. Düzdür, bizim Konstitusiyamıza görə, Azərbaycan müasir, dünyəvi dövlətdir. Eyni zamanda, bu gün Azərbaycanda münasibətlərin formalaşmasında din amili olduqca böyük rola malikdir. O baxımdan, bu gün Azərbaycanda dini ritualların nə qədər sərbəst, tolerantcasına həyata keçirildiyi göz önündədir. Təəssüf ki, bəzən bundan fərqli istiqamətlərdə istifadə etməyə cəhd göstərmək arzusunda olanlar da tapılır. 1995-ci ildə qəbul olunan Konstitusiyada dinlərin sərbəst təbliğinə icazə verilirdi, amma 18-ci maddədə insan ləyaqətini alçaldan və ya insanpərvərlik prinsiplərinə zidd olan dinlərin yayılması qadağan olunurdu. Yeni əlavədə bu tip dini cərəyanların da təbliği qadağan edilir. Bu dini cərəyanlar, hətta yarandığı dövlətlərdə qadağan edilir. Bu cür hallara qarşı mübarizə aparmaq üçün Konstitusiyamızda belə bir qadağanın olması vacibdir. 48-ci maddədə göstərilən vicdan azadlığı məsələsi də tolerantlığı nəzərdə tutan, insanların azad şəkildə yaşamasını özündə ehtiva edən başlıca amillərdəndir. Bu maddəyə olunan əlavədə insanların hansısa dini rituallara məcbur edilməsi qadağan olunur. Bu, insan hüquq və azadlıqlarının artırılmasına xidmət edir”.

Konstitusiyanın 101-ci maddəsinə təklif olunan dəyişikliklə bağlı geniş izahat verən baş redaktor bu müddəanın Azərbaycan dövlətçiliyinin inkişafına yeni töhfə verəcəyini bildirib və insan hüquqlarının genişləndirilməsi istiqamətində atılan mühüm addım kimi qiymətləndirib: “Təklif olunan düzəlişi Azərbaycan vətəndaşlarının hüquqlarının artırılması istiqamətində atılan addım kimi dəyərləndirmək daha düzgün olar. Referenduma təqdim olunan əlavə və dəyişikliklərin hamısı vacib xarakterə malikdir, amma 101-ci maddənin beşinci bəndi xüsusi əhəmiyyət daşıyır. Dəyişiklikdə bir şəxsin iki dəfədən artıq prezident seçilməsinə qoyulan məhdudiyyətin aradan qaldırılması nəzərdə tutulur. Bu, bir sıra Avropa ölkələrinin də təcrübəsində var. Hətta demokratiyanın beşiyi sayılan ABŞ-da XX əsrin birinci yarısının sonuna qədər belə bir qadağa olmayıb. Ali icraedici orqanın başında baş nazir dayanan dövlətlərdə hökumət rəhbəri xalqın dəstəyini nə qədər qazansa, o qədər də hökumət başçısı olur. Azərbaycanda ali icraedici orqanın başında dayanan prezidentlik institutuna isə məhdudiyyət qoyulur. Bu, insan haqlarına ziddir. Digər tərəfdən, bu maddə sadəcə bir şəxsin Azərbaycan prezidentliyinə üçüncü dəfə namizəd olmasına şərait yaradır. Son qərar xalqındır. Bununla yanaşı, fövqəladə hallarda, müharibə vəziyyətində prezidentin və parlamentin səlahiyyət müddətinin uzadılması olduqca əhəmiyyətli bir məsələdir. Biz belə bir acı hadisə ilə rastlaşmışıq. Şuşa şəhəri ermənilər tərəfindən işğal olunan zaman bir tərəfdən Azərbaycan müharibə aparır, digər tərəfdən seçkilərə hazırlaşırdı. Bu isə anormallıq yaradır. Bu səbəbdən müharibə şəraitində həm ali qanunverici, həm də ali icraedici orqanın səlahiyyətlərinin artırılması mühüm bir məsələdir”.

Hikmət Babaoğlu Sumqayıt seçicilərinin hər zaman dövlətçiliyi müdafiə etdiklərini vurğulayaraq onları hamılıqla martın 18-də xalqımızın, dövlətimizin daha da güclənməsinə, qüdrətlənməsinə kömək edəcək məsələlərə səs verməyə çağırıb.

Ramil VƏLİBƏYOV

Yeni Azərbaycan.- 2009.- 6 mart.- S.4.