"Haradasan, göy adamı?"

Yazıçılar Birliyində Qiymət Məhərrəmlinin kitabının təqdimatı oldu

Dünən Yazıçılar Birliyinin "Natəvan" klubunda istedadlı şairə Qiymət Məhərrəmlinin "Haradasan, göy adamı?" adlı kitabının təqdimatı keçirildi. Tədbirə xeyli poeziyasevər qatılmışdı. Tədbiri giriş sözüylə yazıçı Mahirə Abdulla açdı, Qiymət Məhərrəmli haqqında duyğularını bildirdi: "Mənim aləmimdə bəşərin ən incə hisslərini qadınlar ifadə etməyə daha çox qadirdir. Yaşadığımız yeni yüzildə qadınların ictimai həyatımızda fəallığının artması məni çox sevindirir. Qadının sözünə, nəfəsinə cəmiyyətin hər addımda ehtiyacı var. Qadın əvəzsiz varlıqdır. Sevinirəm ki, cəmiyyətdə bu yöndə qənaətlər daha da möhkəmlənir. Qadın dünyanın indiki gərgin vaxtında özünün sülhpərvərliyi, analığı ilə diqqəti daha çox cəlb edir. Arzu edirəm ki, dünya qadınların, anaların ürəyinin səsinə qayıtsın, onda dünya var olar, məhv olmaqdan qurtular. Sevindirici haldır ki, bu gün Azərbaycanda incəsənətin demək olar, bütün sahələrində qadınların rolu artır. Bu mənada Qiymət xanımın yeni kitabının təqdimatına yığışmağımız təsadüfi deyil.

Qiymət xanım duyğusal şairdir, hisslərini çox gözəl ifadə etməyi bacarır".

Yazıçılar Birliyinin Qazax bölməsinin sədri Barat Vüsal Qiymət xanımın yaradıcılığı haqqında ürək sözlərini bildirdi: "Poeziyada ruh iştirak etməyəndə o, adicə söz yığınından ibarət olur. Çox zaman böyük ədəbiyyatımızın oması ilə öyünürük. Amma bu böyük ədəbiyyata əsil mənada sahib durmaq haqqında daha çox fikirləşməliyik. Qiymət xanımın kitabının təqdimat mərasiminin keçirilməsi təqdirəlayiq haldır. O, ürəyinin səsini, dünyanın dərdini ürəyindən keçirib yazır".
Professor Himalay Qasımov Qiymət xanımı tələbəlik dövründən tanıdığını bildirdi: "Qiymət Məhərrəmlini çoxdan tanıyıram. Həmişə onun mənəviyyatını yüksək dəyərləndirmişəm. O, gözəl ailə başçısıdır, həm də istedadlı tədqiqatçıdır. Qiymət xanım bütün şəraitlərdə xarakterini qoruyub saxlaya bilib. Onun hələ yaradıcılıqda deyilməmiş çoxlu sözü var".

Ədəbiyyatşünas Elçin Mehrəliyev də Qiymət xanımı yaradıcı insan kimi çoxdan tanıdığını bildirdi: "Onun bədii və elmi yaradıcılığına çoxdan bələdəm. Qiymət xanımın xoşbəxtliyi ondadır ki, şəxsi keyfəyyətləri ilə yaradıcı keyfiyyətləri üst-üstə düşür. O, həyatında çox çətinliklər görüb, zəhmətkeşdir".

Qiymət xanımın müəllimi Əbdül müəllim onun haqında ürək sözlərini söylədi: "Qiymət xanım həmişə istedadlı olması ilə diqqətimi cəlb edib. O, aradıcılığının uçmaq məqamındadır.

Sevinirəm ki, Qiymətin zəhməti hədər getməyib. Onun yeni kitabını səbirsizliklə gözləyirəm". Tənqidçi Vaqif Yusifli dedi: "Qiymət xanımı Bəxtiyar Vahabzadənin "Uğurlu yol"undan tanıdım. Xalq şairinin xeyir-duasından sonra uğurlu addım atmamaq mümkün deyildi".

Tədbirdə Q.Məhərəmlinin şeir kitabı ilə yanaşı "Elimiz-Günümüz" qəzetinin şairəyə həsr edilmiş xüsusi buraxılışı da təqdim olundu. Xüsusi buraxılışa Dərviş Osman Əhmədoğlu "Ey Yolçu!" adlı giriş sözü yazıb. Həmçinin xüsusi buraxılışda akademik Budaq Budaqovun, professorlar Məhərrəm Qasımlının, İsmayıl Vəliyevin, Vaqif Arzumanlının, Aydın Dadaşovun, Şahin Fazilin, yazıçı Əlibala Hacızadənin, Barat Vüsalın və başqalarının ürək sözləri yer alıb, Qiymət Məhərrəmlinin şeirlərindən parçalar, fotoşəkillər dərc olunub.

Qiymət xanım bizimlə söhbətində günümüzün indiki çağında qadının şeir yazması, bu və ya digər dərəcədə mənəvi ağrıları yaşaması ilə bağlı qənaətlərini bölüşdü: "Təbii ki, bir qadının, xüsusən də ananın ev, ailə işləri bəs deyincədir. O da ola ki, bütün bu qayğıları yaşaya-yaşaya Tanrı pıçıltılarını ipə-sapa düzməyə imkan tapasan. Hesab edirəm ki, şairlik bir taledir. Nə qədər çətin olsa da, hər halda şeir yazandan sonra daxilən rahatlanırsan, ürəyin boşalır, halını ifadə edirsən. Ən çətin anda dəftər-qələm köməyə gəlir. Qadın şairlərin kişi şairlərdən fərqi odur ki, qadınların qayğısı həddən artıq çoxdur. Şairliyindən, işləməyindən asılı olmayaraq ilk növbədə sən anasan. Ailə qayğısı ilə, hansısa bir məişət qayğısı ilə o qədər yüklənirsən ki, onda əlbəttə, şair deyilsən. Söhbət məhz həmin məqamdan gedir. Şübhəsiz, elə məqamlar var ki, sən ancaq şairsən: o zaman insan tamam başqa bir adam olur. Hər kəsin həyatda, yaradıcılıqda öz meyarı var. Yaradıcılığın hazır qəlibi olmur. Elə sənətin bənzərsizliyi də bundadır. Ruminin gözəl bir sözü var ki, ya olduğun kimi görün, ya da göründüyün kimi ol. Bu məqamı şairliyə də aid etmək olur. Bir də görürsən, şeirlərinə vurulduğun şair tamam başqa adammış. Öz-özünə deyirsən ki, ilahi, görəsən bu şeirləri o yazıb? Qələm sahibi daim dərdlə bir olmalıdır. Hələ ki, ümumiyyətlə, yaradıcı əhvallarda Vətən təəssübkeşliyi tam şəkildə ifadəsini tapmır, ömürlərə keçmir. Ədəbiyyat adamları bu gün çoxlu qayğıların məngənəsindədir".

Elçin Qaliboğlu

Xalq Cəbhəsi.-2009.- 28 yanvar.- S.14.