Şabran, tarixi adın mübarək!
Bir aya yaxındır ki, Azərbaycanın inzibati ərazi
vahidlərindən olan Dəvəçi rayonunun adının
dəyişdirilməsilə bağlı bu rayonda mərasimlər
və bayram tədbirləri keçirilirdi. Azərbaycan
Respublikası Prezidentinin 13 aprel 2010-cu il tarixli “Azərbaycan
Respublikasının Dəvəçi rayonunun Şabran rayonu
adlandırılması haqqında” Azərbaycan Respublikası
Qanununun tətbiq edilməsi barədə sərəncamından
dərhal sonra aprelin 14-də isə mədəniyyət və
istirahət parkında geniş və təntənəli bayram
şənliyi düzənləndi.
Rayon rəsmiləri və
qonaqlar əvvəlcə ulu öndər Heydər Əliyevin
qranit abidəsi önünə gül-çiçək dəstəsi
qoyub, xatirəsini hörmətlə yad etdilər.
Təntənənin rəsmi
hissəsini Şabran Rayon İcra Hakimiyyətinin
başçısının birinci müavini Mehdi Balabəyov
açaraq bildirdi ki, çoxdan arzuladığımız və
gözlədiyimiz gün gəlib çatdı. Tarixi
adımızı, yaşımızı bizə qaytaran, bunun
qürur və sevincini bizə yaşadan Prezidentimiz cənab
İlham Əliyevə sonsuz minnətdarlığımızı
bildiririk.
Azərbaycan
Respublikası Prezidentinin müvafiq sərəncamı
oxunduqdan sonra tarixi yaddaşa nəzər salmaq, Şabranın
ulu keçmişindən danışmaq üçün
söz Azərbaycan Milli Elmlər Akademiyasının Arxeologiya
və Etnoqrafiya İnstitutunun şöbə müdiri, tarix
elmləri doktoru, professor Arif Məmmədova verildi. Alim
Şabranın yaşayış məskəni kimi əsasının
bizim eradan da əvvəl I minilliyin ortalarında qoyulduğunu
və buranın qədim türk tayfaları olan hunlara mənsub
olduğunu tarixi aspektdən əsaslandırıb, konkret
faktları nümunə gətirdi. Şabranın adının
bərpa olunmasını dövlət
başçısının soykökümüzə,
keçmişimizə və maddi-mədəniyyət nümunələrimizə
böyük qayğı və diqqətinin nəticəsi kimi
qiymətləndirdi.
Rayonu Milli Məclisdə
təmsil edən millət vəkili Tahir Süleymanov da
şabranlıları rayonun tarixi adının bərpası
münasibətilə təbrik edərək bildirdi ki, dövlət
və onun Prezidenti möhtərəm İlham Əliyev öz
qətiyyətli sözünü dedi və onu sərəncamla,
qanunla təsdiqlədi. İndi növbə
şabranlılarındır. Biz bundan sonra Şabranın ulu
şöhrətini bərpa etmək və onu daha da inkişaf
etmiş, tərəqqi tapmış sivil bir şəhərə
çevirmək üçün öz səylərimizi əsirgəməməliyik.
Şabran adının bərpası, şübhəsiz, bizi
son dərəcə sevindirir, çünki illərlə bu
adın qaytarılmasını arzulamışıq. Ancaq bu
sevinc həm də üzərimizə şabranlılar kimi
çox böyük məsuliyyət qoyur.
Sonra
çıxış edən Şabran Rayon İcra Hakimiyyətinin
başçısı Novruz Novruzov dedi:
— Təqvimdə adi
günləri tarixə çevirmək yalnız dahilərə
nəsib olur. Azərbaycanın tarixində yeni şanlı,
şərəfli səhifələr yazan ümummilli liderimiz
Heydər Əliyev məhz belə dahi şəxsiyyətlərdəndir.
Fikri, düşüncəsi
həmişə gələcəyə, xalqının daha
işıqlı, nurlu sabahına yönələn
ümummilli liderimiz həm də Vətənimiz Azərbaycanın
ulu keçmişinə, qədim və şanlı tarixinə
bağlı bir insan idi.
“Keçmiş gələcəyin
peyğəmbəridir” düşüncəsi ilə Azərbaycanın
tarixinə sonsuz hörmət və məhəbbətin,
öz xalqının mənəvi və maddi dəyərlərinə
böyük ehtiramın parlaq təzahürü idi ki, ulu
öndərin şəxsi təşəbbüsü və səyi
ilə zamanın yaddaşından az qala silinməkdə olan
Şabran şəhərində 1979-cu ilin sonlarında
arxeoloji tədqiqat və qazınıtı işlərinə
başlanıldı. Bununla da ümummilli lider tarixin
yaddaşından silinməkdə olan Şabrana yenidən həyat
bəxş etdi.
Nəhəng bir dövlətin
— keçmiş SSRİ-nin rəhbərlərindən biri
Sov.İKP MK Siyasi Bürosunun üzvü, SSRİ Nazirlər
Soveti sədrinin birinci müavini olan Heydər Əliyev
1983-cü ilin sentyabrında qədim Şabranda oldu. Burada
aparılan arxeoloji qazıntı işləri ilə şəxsən
özü maraqlandı. Bundan sonra “Şabran Azərbaycanda qədim
şəhər mədəniyyətinin ən gözəl
nümunəsidir” deyən ümummilli liderimizin Şabrana bu
diqqət və qayğısı nəticəsində arxeoloji
qazıntı, elmi tədqiqat işləri daha da genişləndirildi.
Şabranlılar
böyük iftixar hissi ilə qeyd edirlər ki, möhtərəm
Prezidenitmiz cənab İlham Əliyev bu tarixi səylərdə
ulu öndərimizlə həmişə birgə olmuşdur.
Qədirbilən
Şabran sakinlərinin istər indiki, istərsə də gələcək
nəsilləri həmişə minnətdarlıqla
xatırlayacaqlar ki, əbədiyaşar liderimiz
“Çıraqqala” tarixi abidələr kompleksinin bərpası
və qorunması haqqında 23 iyun 2003-cü ildə, şəhərsalma
tariximizin nadir incilərindən olan “Şabran şəhəri”
tarix və mədəniyyət abidəsinin qorunması
haqqında 27 sentyabr 2003-cü ildə sərəncamlar
imzalamışdır.
Millət var ki, olmayan
saxta, yalançı hadisələrlə, faktlarla “tarix” uydurur.
Şabran isə bizim daş yaddaşımız, şanlı
tariximiz, həm də ulu öndərin bizlərə əmanətidir.
Azərbaycan
Respublikası Milli Məclisinin Dəvəçi rayonunun
Şabran rayonu adlandırılması haqqında Qanunun millət
vəkilləri tərəfindən qəbul edilməsi,
Şabran adının tarixi, coğrafi ərazi kimi xəritələrə
düşməsi də ölkə rəhbərinin, cənab
İlham Əliyevin öz xalqının tarixinə diqqət və
qayğısının parlaq nümunəsidir.
Bu tarixi hadisəni məhz
belə dəyərləndirən rayon sakinləri
Şabranı öz yeni adı ilə daha da şöhrətləndirəcək
və möhtərəm Prezidentimizin həyata keçirdiyi
siyasət sayəsində bu rayonu müasir və
yaraşıqlı bir diyara çevirəcəkdir.
Sonra təntənəli
mərasim iştirakçılarının Azərbaycan
Respublikasının Prezidenti cənab İlham Əliyevə
müraciəti oxundu və gurultulu alqışlarla qəbul
edildi.
Rəsmi hissə
başa çatdıqdan sonra respublikanın
tanınmış incəsənət ustalarının
iştirakı ilə böyük bayram konserti oldu.
İlqar RÜSTƏMOV
Xalq qəzeti.- 2010.- 17 aprel.- S. 3.