İlin birinci rübü səbaillilər
üçün uğurlu olmuşdur
Prezident İlham Əliyevin Nazirlər
Kabinetinin 2010-cu ilin birinci rübünün sosial-iqtisadi
inkişafın yekunlarına həsr olunmuş geniş
iclasındakı nitqindən irəli gələn vəzifələr
Səbail Rayon İcra Hakimiyyəti başçısı
yanında şuranın rayon fəallarının
iştirakı ilə keçirilən iclasında ətraflı
müzakirə olunmuşdur.
İclası giriş
sözü ilə açan Səbail Rayon İcra Hakimiyyətinin
başçısı Asif Əsgərov qeyd etmişdir ki,
2010-cu ilin ilk üç ayı ərzində rayonun müəssisələri
istehlakçılara 57,4 milyon manatlıq sənaye məhsulu
göndərmiş və xidmətlər göstərmişdir.
Nəqliyyatçılar 107,1 milyon manatlıq və ya
keçən ilin müvafiq dövrünə nisbətən
27,6 faiz çox, rabitəçilər 172,9 milyon manatlıq və
ya 19,3 faiz çox xidmətlər göstərmişlər. Bütün
maliyyə mənbələri hesabına 536,5 milyon manatlıq
investisiyalardan istifadə edilmişdir ki, bu, keçən ilin
müvafiq dövrünə nisbətən 50,6 faiz çoxdur.
İlin əvvəlindən əhaliyə 126,1 milyon
manatlıq istehlak malları satılmış və ya pullu
xidmət göstərilmişdir, bu isə ötən illə
müqayisədə 9,8 faiz çoxdur. Pərakəndə əmtəə
dövriyyəsi 17,3 faiz artaraq 64,2 milyon manata, pullu xidmətlərin
həcmi isə 9,1 faiz yüksələrək 61,9 milyon manata
çatmışdır.
Rayonda
çalışan işçilərin sayı 83300 nəfər,
orta aylıq əmək haqqının məğləği
isə 767,1 manat olmuşdur ki, bu da keçən illə
müqayisədə 23,6 faiz çoxdur. 2010-cu ilin I
rübü ərzində Səbail rayonu ərazisində 356
yeni iş yeri açılmışdır ki, bunların
hamısı daimi iş yerləridir. Ümumilikdə,
2003-cü ilin oktyabr ayından 2010-cu ilin mart ayına kimi
rayonda 31932 iş yeri açılmışdır ki,
onların 31276-sı daimidir.
Başçı daha
sonra bildirmişdir ki, ilin əvvəlindən rayonda yerləşən
bir sıra müxtəlif təyinatlı obyektlərin
inşası, təmir-yenidənqurulması işləri
müvəffəqiyyətlə davam etdirilmişdir. Bu ilin
birinci rübündə Prezident İlham Əliyevin
iştirakı ilə Dənizkənarı Milli Bulvarda möhtəşəm
Bakı Biznes Mərkəzinin və Neftçilər prospektində
“Dalğa Plaza” İş Mərkəzinin
açılış mərasimi olmuşdur. Əsaslı təmir-yenidənqurma
işlərindən sonra Respublika Klinik Uroloji Xəstəxanasının
binası istifadəyə verilmişdir.
Hazırda Azərbaycan
Xalçası və Xalq Tətbiqi Sənəti Dövlət
Muzeyi üçün yeni binanın tikintisi və Dövlət
Bayrağı Meydanındakı inşaat işləri davam
etdirilir. Badamdar qəsəbəsində MTN-nin yeni hospitalı
tikilir. “Yaxt-klub”da yenidənqurma, “Xaqani” bağında əsaslı
təmir, “Fəvvarələr Meydanı”nda yenidənqurma və
Nizami küçəsindəki tarixi binalarda təmir-bərpa
işləri aparılır. Bibiheybət qəsəbəsindən
şəhərin mərkəzinə uzanan yeni magistral yolun
çəkilişi, Neftçilər prospektində “Four
seasons” və “Hilton” mehmanxanalarının inşası davam
etdirilir.
İçərişəhərdə
yerləşən XI əsr abidəsi “Həzrət Məhəmməd”
məscidinin bərpa və konservasiyası işləri
aparılır. Şəhərimizin qocaman təhsil müəssisələrindən
olan 132 saylı orta məktəbin və “İstedad” beynəlxalq
təhsil kompleksinin binalarında əsaslı təmir və
yenidənqurma işləri böyük sürətlə davam
edir.
Rayon icra hakimiyyəti tərəfindən
hazırlanmış “Abad həyət” layihəsi əsasında
Badamdar qəsəbəsində daha bir həyətin təmir
olunması üçün layihə-smeta sənədləri
hazırlanmış və onun təmirinə
başlanmışdır. Yanvar ayında Badamdar qəsəbəsində
boş sahədə gözəl istirahət parkı
salınmış, qəsəbə mədəniyyət evində
aparılan əsaslı təmir işləri yekunlaşmaq
üzrədir. Burada inşa olunan “Xeyir-şər” evində
tamamlama işlərinə başlanmışdır. Heydər
Əliyev parkında təmir-yenidənqurma aparılması
üçün layihə sənədləri
hazırlanmışdır. Parkda ümummilli liderin
büstünün qoyulması
planlaşdırılmışdır. Hazırda Səbail
Rayon Polis İdarəsinin yeni binasında tamamlama işləri
aparılır. Yeni Azərbaycan Partiyası Səbail rayon təşkilatının
3 mərtəbəli yeni binasında isə dam
örtüyünün quraşdırılması və
binadaxili işlər görülür.
Yanvar ayında Azərbaycan
Vətən Müharibəsi Veteranları Birliyi Səbail rayon
şöbəsinin Şəhidlər Xiyabanında yerləşən
qərargahında əsaslı təmir işləri başa
çatdırılmışdır. Bibiheybət qəsəbəsinin
girişində II Dünya müharibəsində həlak olan
döyüşçülərin xatirə abidəsində
aparılan əsaslı təmir-yenidənqurma işləri
başa çatdırılmış və qələbənin
65 illiyi ərəfəsində bu abidənin təntənəli
açılışı nəzərdə tutulmuşdur. Qəsəbənin
dənizkənarı hissəsində mini futbol
meydançasının təmiri işləri aparılır.
Rəşid Behbudov
adına 2 saylı musiqi məktəbində əsaslı təmir,
Bayıldan 20-ci sahə dairəsinə kimi — Qurban Abbasov, Əhəd
Yaqubov və Bibiheybət yolu küçələri boyunca
mövcud mağaza, ofis və ticarət obyektlərinin üzlənməsi
işləri aparılır. Hazırda bu ərazidə 110
mağazada üzlənmə başa çatmış, digərlərində
də hazırlıq işləri aparılır.
Müzakirələrdə
qeyd olunmuşdur ki, Səbail Rayon Mənzil Kommunal Təsərrüfatı
Birliyi bir sıra binalara gedən istilik xətlərində, 5
binanın dam örtüyündə təmir işləri
aparmış, su və kanalizasiya xətlərini dəyişdirmişdir.
Mərkəzdəki bir sıra binaların fasadı təmir
olunmuş, rəngləmə işləri
görülmüşdür.
Elektrik Təchizatı və
Satış İdarəsi tərəfindən 2010-cu ilin
birinci rübü ərzində yeni inşa olunmuş 110/35/10
kv-luq “İçərişəhər” yarımstansiyası
şəbəkəyə qoşulmuşdur. Dənizkənarı
Milli Bulvarda yeni transformator məntəqəsi, Şıx
çimərliyi ərazisində 10 kv-luq paylayıcı
qurğu və Badamdarda 35 kv-luq yarımstansiya istismara
verilmişdir. Yeni 6 kv-luq qapalı paylayıcı qurğu
tikilmiş, burada 2 yeni transformator quraşdırılır. Badamdar
yolunda 250 kva-lıq KTM quraşdırılmış, rayon ərazisində
8900 metr uzunluğunda kabel xətti çəkilmişdir. Hazırda
20-ci sahədə, Badamdar qəsəbəsinin qəbiristanlıq
yolunda yeni “SİP” xətləri çəkilir, abonentlərə
sayğaclar quraşdırılır. Şəhidlər
Xiyabanının yaxınlığında 35/10 kv-luq
yarımstansiya inşa olunur.
Qaz istismar sahəsi təchizatı
yaxşılaşdırılması məqsədi ilə 5710
metr yeni qaz xətləri çəkmiş, 17 qaztənzimləyici
şkaf və 2 siyirtmə quraşdırmışdır. Badamdar
qəsəbəsinin, 3-cü yaşayış massivində və
Tofiq Məmmədov küçəsində 1900 metr qaz kəmərinin
çəkilib dairəvi birləşdirilməsi işləri
aparılır. Həmin ərazidə 1000 metr yerüstü
qaz xətti çəkilməsi nəzərdə
tutulmuşdur.
RİH-in tədbirlər planına uyğun olaraq, iməciliklər zamanı Səbail rayonunda 25 minə yaxın ağac əkilmişdir. Uzun illərdən bəri neftlə çirklənmiş Bibiheybət yaşayış massivinin təmizlənməsi və yaşıllaşdırılması istiqamətində Azərbaycan Respublikası Dövlət Neft Şirkəti bir sıra tədbirlər həyata keçirmişdir. “Bibiheybətneft” NQÇİ-nin ərazisində 216 hektar ərazi rekultivasiya olunmuş, 60 minə yaxın ağac əkilmişdir. Yazın gəlişi ilə bağlı rayon ərazisində aparılan abadlıq və yaşıllaşdırma işlərinin həcmi daha da artmışdır. “Ekologiya ili” elan olunmuş 2010-cu il ərzində Səbail rayonu ərazisində 38000 ağac əkilməsi planlaşdırılmışdır.
Yeniyetmələrin sağlam böyüməsinin təmin olunması və respublikada futbolun kütləviliyinin artırılması məqsədilə ilk dəfə olaraq AFFA, Azərbaycan Respublikası Təhsil Nazirliyi, “Azərcell” və Səbail Rayon İcra Hakimiyyəti fevral ayında rayonun 16 orta məktəbinin 4-cü sinif şagirdləri arasında “Məktəbli kuboku” yarışları keçirmişdir.
Toplantıda bildirilmişdir ki, Prezident İlham Əliyevin Nazirlər Kabinetinin iclasındakı çıxışında əhaliyə keyfiyyətsiz malların satılmasına qadağa qoyulması və buna nəzarətin gücləndirilməsi üçün yerlərdə ciddi işlərin aparılmasına dair tapşırığının icrası ilə bağlı RİH başçısının müvafiq sərəncamı ilə rayonda istehlak mallarının qiymətinə və keyfiyytinə nəzarət üzrə ictimai komissiya yaradılmışdır. Komissiyanın tərkibinə müvafiq qurum və ictimaiyyətin nümayəndələri cəlb olunmuş və qurum artıq fəaliyyətə başlamışdır.
Şuranın yığıncağında yolların təmiri, ərazinin abadlaşdırılması işlərində bələdiyyələrin yaxından iştirakının vacibliyi də qeyd edilmiş və bu istiqamətdə müvafiq tapşırıqlar verilmişdir. İclasda əldə olunmuş nailiyyətlərlə yanaşı, həllini gözləyən problemlər, çatışmazlıqlar və onların aradan qaldırılması yolları, nəzərdə tutulan abadlıq işləri və vətəndaşların müraciətləri ilə bağlı görülən işlər də müzakirə olunmuşdur.
İclasda Milli Məclisin iqtisadi siyasət daimi komitəsinin sədri, akademik Ziyad Səmədzadə və millət vəkili Fuad Muradov iştirak etmişlər.
Tahir AYDINOĞLU
Xalq qəzeti.- 2010.- 18 aprel.- S. 4.