Suraxanı rayonunda birinci rübün yekunları
müzakirə edilmişdir
Azərbaycan Respublikasının Prezidenti İlham Əliyevin
Nazirlər Kabinetinin 2010-cu ilin birinci rübünün
sosial-iqtisadi inkişafının yekunlarına həsr
olunmuş iclasında dövlət
başçısının nitqindən irəli gələn
vəzifələr Suraxanı Rayon İcra Hakimiyyəti
başçısı yanında Şuranın
toplantısında ətraflı müzakirə edilmişdir.
İclası giriş
sözü ilə açan rayon icra hakimiyyətinin
başçısı İlqar Abbasov ölkə
iqtisadiyyatının sosial-iqtisadi inkişafından bəhs etmiş,
bu tərəqqinin rayonun həyatında da özünü
qabarıq büruzə verdiyindən
danışmışdır. Natiq bildirmişdir ki, rayonun sənaye
müəssisələri 2010-cu ilin 1-ci rübü ərzində
28,1 milyon manatlıq iş yerinə yetirmiş və xidmət
göstərmiş, bir işçinin orta aylıq əmək
haqqı 366 manata çatmış, müəssisələrdə
və firmalarda 273 nəfər yeni iş yerləri ilə təmin
olunmuşdur.
Ölkə Prezidenti
İlham Əliyev tərəfindən ekoloji durumun
yaxşılaşdırılması üçün
Bakıda 3 milyon ağacın əkilməsi və 2010-cu ilin
“Ekologiya ili” elan edilməsinə dair verilən
tapşırığın icrası ilə əlaqədar
rayon ərazisində ətraf mühitin mühafizəsi,
çirklənmiş torpaqların bərpası, ekoloji vəziyyətin
yaxşılaşdırılması, mövcud park və
yaşıllıqların qorunub saxlanılması, yenilərinin
salınması istiqamətində ardıcıl işlər
görülmüş, rayonun bütün qəsəbələrində,
o cümlədən Heydər Əliyev prospektinin sağ tərəfindəki
ərazidən köçürülmüş “Binə” ticarət
mərkəzinin yerində bu günə kimi 18 mindən
artıq müxtəlif növ ağac əkilmiş, qəsəbələrdə
ümumrayon iməcilikləri keçirilmiş, neftlə
çirklənmiş torpaqlarda aparılmış rekultivasiya
işləri nəticəsində 9 hektara yaxın sahə tam
təmizlənmişdir.
“Azərbaycan
Respublikasında ekoloji vəziyyətin
yaxşılaşdırılmasına dair 2006-2010-cu illər
üçün Kompleks Tədbirlər Planı”na uyğun
olaraq Bülbülə gölünün səviyyəsinin
aşağı salınması üçün kanalizasiya
şəbəkəsinin qurulması, “Dədə Qorqud”
adlandırılan yeni yaşayış sahəsinin yanında
“Hövsan”, Yeni Günəşli, “V” yaşayış sahəsinin
yaxınlığında “Günəşli” su anbarı
kompleksinin inşası və anbara su xətlərinin çəkilməsi,
Heydər Əliyev Fondu tərəfindən Qaraçuxur qəsəbəsi,
“D” yaşayış sahəsində “Qayğı” əlil
uşaqların reabilitasiyası mərkəzinin tikintisi,
Hövsan kanalının yenidən qurulması işləri
davam etdirilmişdir.
Zığ dairəsi –
Heydər Əliyev Beynəlxalq Hava Limanı avtomobil yolunun və
Heydər Əliyev prospektinin Suraxanı rayonu ərazisindən
keçən hissəsinin ətrafında dekorativ divarların
tikilməsi, yeni parkların salınması, yolun kənarlarının
yaşıllaşdırılması və
abadlaşdırılması işləri davam etdirilmiş, “Atəşgah”
məbədinin yenidən qurulmasına, küçə və
yolların, məhəllədaxili ərazilərin
asfaltlanmasına başlanılmışdır.
Qəsəbələrdə
qəza vəziyyətində olan qaz, elektrik və su xətlərinin
dəyişdirilməsi və yeni xətlərin çəkilməsi
də diqqət mərkəzində saxlanılmışdır.
Belə ki, I rübdə 38 480 metr qaz xətti çəkilmiş,
400 ədəd qaz sayğacı həyətdən kənara
çıxarılmış, 272 ədəd elektrik dirəyi
basdırılmışdır.
İcra hakimiyyətinin
başçısı çıxışında ictimai-mədəni
tədbirlərin təşkilinə xüsusi önəm
verildiyini diqqətə çatdırmışdır.
Göstərmişdir ki, Heydər Əliyev Mərkəzi
qısa müddət ərzində rayonun ideoloji mərkəzinə
çevrilmiş, bir çox tədbirlər məhz burada
keçirilmişdir. Azərbaycan Qızıl Aypara Cəmiyyətinin
yaranmasının 90 illik yubileyi, Diabet Cəmiyyətinin təşkilatçılığı
ilə ölkəyə gətirilən tibbi
avadanlığın təqdimatı ilə bağlı tədbirlər
buna misal ola bilər. Mərkəzdə “Azərbaycanlıların
soyqırımı günü” münasibəti ilə
reallaşdırılan tədbir də yaddaqalan olmuşdur. Tədbirə
dəvət edilən tarix elmləri üzrə fəlsəfə
doktoru, Azərbaycan Milli Elmlər Akademiyasının Tarix
İnstitutunun elmi işlər üzrə direktor müavini Cəbi
Bəhramov geniş məruzə ilə çıxış
edərək erməni quldurlarının xalqımızın
başına gətirdiyi müsibətlər haqqında
geniş məlumat vermişdir.
Azərbaycan
Pespublikasının Prezidenti İlham Əliyevin tövsiyəsinə
uyğun olaraq rayon icra hakimiyyəti və Səhiyyə
Nazirliyinin birgə təşkilatçılığı ilə
rayon əhalisinin tibbi müayinəsi davam etdirilmiş, bu
günə kim 73 min nəfər sakin tibbi müyinədən
keçmiş və bu iş uğurla davam etdirilir.
Vətəndaşların
sosial müdafiəsinin gücləndirilməsi istiqamətində
də müəyyən işlər
görülmüşdür. Məşğulluq Mərkəzi
tərəfindən 75 vətəndaş işlə təmin
olunmuş, 28 nəfərə işsizlik müavinəti təyin
edilmişdir. Bu dövrdə Əhalinin Sosial Müdafiəsi Mərkəzi
tərəfindən isə 1,5 milyon manat sosial yardım ödənilmiş,
sosial-məişət xidməti sektorunda 291 nəfər tənha
ahıl və əlil vətəndaşa evlərində
sosial-məişət xidməti göstərilmişdir.
Rayon icra hakimiyyətinin
başçısı rayonun hərtərəfli
inkişafı, sakinləri narahat edən sosial-məişət
problemlərinin vaxtında müəyyən edilməsi,
onların optimal həlli yollarının tapılması
istiqamətində bir sıra işlər
görüldüyünü diqqətə
çatdırmış, Mərkəzləşdirilmiş
İnformasiya Təminatı Sistemi
yaradıldığını vurğulamış və bu
sistemin vasitəsi ilə 2006-2009-cu illərdə rayonda
görülmüş işlər müqayisəli şəkildə
təhlil edilmişdir. Eyni zamanda, RİH-də “Elektron
icraçı” avtomatlaşdırılmış idarəetmə
sistemi tədbiq edilmiş, bununla aparata daxil olan bütün sənədlərin,
verilən tapşırıq və göstərişlərin
icrasına nəzarət gücləndirilmişdir.
Xatırladılmışdır ki, bu sistem hər bir
icraçı üçün avtomatik tapşırıqlar
formalaşdırır, təhlil və saxlanılması
üçün vahid informasiya məkanı yaradır.
Natiq
çıxışında vurğulamışdır ki, vətəndaşların
qəbullarında, səyyar görüşlərdə səslənən
təkliflər, “Qaynar xətt”, “Elektron poçt” və digər
qaynaqlardan daxil olan əhalinin sosial sifarişləri rayon icra
hakimiyyəti tərəfindən ümumiləşdirilərək
yerli proqramlara daxil edilmiş və daxili imkanlardan istifadə
etməklə “Nümunəvi abad məhəllələr”,
“Mövcud parkların yenidən qurulması və yeni
parkların salınması”, “Şəhid xatirə komplekslərinin
tikintisi və əsaslı təmiri”, “Küçə və
məhəllədaxili yolların əsaslı təmiri və
asfaltlanması”, “Şəhid ailələrinə, müharibə
əlillərinə və digər imtiyazlı vətəndaşlara
sosial yardım”, “Veteranlara dəstək” kimi və digər
proqramların həyata keçirilməsi təmin
edilmişdir.
İcra hakimiyyətinin
başçısı İ.Abbasov
çıxışının sonunda sakinlər adından
rayona göstərilən diqqətə görə bir daha Azərbaycan
Respublikasının Prezidenti İlham Əliyevə minnətdarlığını
bildirdi və xüsusi vurğuladı ki, Heydər Əliyev
siyasi kursunu yeni, müasir dünyanın tələblərinə
uyğun davam etdirən dövlət
başçımızın ölkəmizi tərəqqiyə
aparan yolda tapşırıq və tövsiyələri
vaxtında və yüksək keyfiyyətlə icra
olunacaqdır.
Məruzə ətrafında
çıxış edən digər natiqlər də cari
ilin birinci rübündə ölkə üzrə əldə
olunmuş uğurları, Prezident İlham Əliyevin Azərbaycanın
sosial-iqtisadi inkişafının daha da sürətləndirilməsi
məqsədi ilə həyata keçirdiyi tədbirləri
yüksək qiymətləndirdilər.
Vaqif BAYRAMOV
Xalq qəzeti.- 2010.- 21 aprel.- S. 5.